Go long ol haf insaed long hem

Go long lis blong ol haf

 STORI 15

Jehova i No Fogetem Josef

Jehova i No Fogetem Josef

Taem Josef i stap long kalabus, Fero we i king blong Ijip, i luk sam drim, be i no gat wan man we i save mining blong olgeta. Wan slef i talem long hem se, Josef i save talemaot mining blong ol drim. Wantaem nomo, Fero i sanem sam man blong hem blong oli tekem Josef i kam.

Fero i askem long hem se: ‘?Yu save talemaot mining blong ol drim blong mi?’ Josef i talem se: ‘Mining blong ol drim ya i olsem. Bae i gat plante kakae long Ijip blong seven yia, be afta, bae i gat hadtaem blong kasem kakae we i gohed blong seven yia bakegen. Yu mas jusumaot wan man we i waes blong i hivimap kakae mo putum gud blong ol yia we i no gat kakae.’ Fero i talem se: ‘!Mi mi jusumaot yu! !Yu bae yu kam nambawan haeman blong mi!’ ?Olsem wanem Josef i save mining blong ol drim blong Fero? Jehova i givhan long hem.

Long ol seven yia we i gat kakae, Josef i hivimap plante kakae. Long evri ples long wol i gat hadtaem blong kasem kakae, olsem Josef i talem finis. Plante man oli aot long olgeta ples, oli kam blong pem kakae long Josef. Jekob i harem nius se i gat kakae long Ijip, ale hem i sanem ten boe blong hem oli go blong pem kakae.

Ol boe blong Jekob oli go luk Josef. Wantaem nomo Josef i luksave olgeta. Be ol brata blong hem oli no luksave hem. Nao oli bodaon long hem olsem we drim blong hem i soemaot taem hem i yangfala. Josef i wantem traem ol brata blong hem blong luk sipos oli jenisim fasin blong olgeta. Ale hem i talem long olgeta se: ‘!Yufala ol spae nomo! Yufala i wantem faenemaot sipos mifala i strong, blong yufala i save kam mekem faet long mifala.’ Oli talem se: ‘!Nogat! Mifala i 12 brata, be wan long  mifala i ded, mo lasbon i stap wetem papa blong mifala long Kenan.’ Josef i talem se: ‘Yufala i go karem lasbon blong yufala i kam, nao bae mi bilivim yufala.’ Ale oli gobak long papa blong olgeta.

Taem famle blong Jekob i sot long kakae bakegen, hem i sanem ol boe blong hem oli gobak long Ijip. Be long taem ya, oli karem lasbon blong olgeta, Benjamin, i go wetem olgeta. Nao Josef i traem ol brata blong hem bakegen. Hem i haedem silva kap blong hem long bag we Benjamin i karem kakae long hem, nao hem i talem long ol brata blong hem se oli stilim kap ya. Taem ol man blong Josef oli faenem kap ya long bag blong Benjamin, ol brata blong hem oli sek nogud. Oli askem strong long Josef blong i panisim olgeta, be i no panisim Benjamin.

Naoia Josef i save se fasin blong olgeta i jenis. Josef i no moa save blokem filing blong hem, nao hem i krae bigwan, mo i talem se: ‘Mi mi Josef, brata blong yufala. ?Papa blong mi i laef yet?’ Ol brata blong hem oli sapraes tumas. Nao Josef i talem se: ‘Yufala i no harem nogud. God i sanem mi mi kam fastaem long ples ya, blong sevem laef blong yufala. Yufala i go tekem papa blong mi i kam.’

Nao oli go talemaot gud nius ya long papa blong olgeta, mo oli tekem hem i go long Ijip. Plante yia, Jekob i no moa luk boe blong hem, be naoia i luk hem bakegen.

“Sipos yufala i no fogivim ol man from ol rong blong olgeta, Papa blong yufala tu bambae i no fogivim yufala from rong blong yufala.”—Matiu 6:15