Go long ol haf insaed long hem

Go long lis blong ol haf

 STORI 95

I No Gat Wan Samting i Save Blokem Olgeta

I No Gat Wan Samting i Save Blokem Olgeta

Evri dei, wan man we i no save wokbaot i sidaon long get blong haos blong God, mo i askem mane long ol man. Wan dei, long aftenun, Pita mo Jon i stap go insaed long haos blong God, nao man ya i singaot se: ‘Plis, yutufala i givim smol mane long mi.’ Pita i se: ‘Mi gat wan samting we i moa gud i bitim mane. !Long nem blong Jisas, mi mi talem long yu se, yu girap, yu wokbaot!’ !Pita i holem han blong hem, i leftemap hem, nao man ya i wokbaot! Ol man we oli luk merikel ya oli glad tumas, mo plante long olgeta oli bilif.

Be ol pris mo ol Sadusi oli kros tumas. Oli holem tufala aposol ya, oli pulum tufala i go long kot, mo oli askem se: ‘?Hu i givim paoa long yutufala blong hilim man?’ Pita i talem se: ‘Jisas Kraes ya we yufala i kilim hem i ded.’ Ol lida blong skul oli singaot bigwan, se: ‘!Yutufala i no moa tokbaot Jisas!’ Be tufala aposol i talem se: ‘Mitufala i mas tokbaot hem. Mitufala i no save stop.’

Taem oli lego Pita mo Jon, tufala i go lukaot ol narafala disaepol blong talemaot samting we i hapen. Nao oli prea long Jehova se: ‘Plis yu givhan long mifala blong mifala i no fraet blong gohed blong mekem wok blong yu.’ Jehova i givim tabu spirit long olgeta, nao oli gohed blong prij mo mekem ol sikman oli kam gud, mo plante moa man oli bilif. Nao ol Sadusi oli jalus, oli holem ol aposol, mo oli sakem olgeta long kalabus. Be long naet, Jehova i sanem wan enjel blong openem doa blong kalabus. Enjel ya i talem ol aposol se: ‘Yufala i gobak long haos blong God blong tijim ol man.’

Long nekis moning, ol gad oli kam talem long ol lida blong skul long kot ya Sanhedrin, se: ‘!Doa blong kalabus i lok, be ol man we mifala i holem olgeta oli no moa stap! !Oli stap tijim ol man long haos blong God!’ Ale oli holem ol aposol bakegen, mo oli pulum olgeta oli kam long kot ya Sanhedrin. Hae pris i talem se:  ‘!Mifala i talem long yufala finis se yufala i no moa tokbaot Jisas!’ Be Pita i ansa se: “Mifala i mas obei long God we i rula blong mifala, i bitim we mifala i obei long ol man.”

Ol lida blong skul oli kros we oli kros, mo oli wantem kilim ol aposol oli ded. Be wan Farisi we nem blong hem Gamaliel, i stanap mo i talem se: ‘!Yufala i lukaot! Maet God i stap wetem ol man ya. ?Yufala i ting se i gud blong faet agensem God?’ Oli lesin long advaes blong hem, ale oli wipim ol aposol, mo oli talem strong long olgeta bakegen se oli no moa prij, nao oli lego olgeta oli gofri. Be ol aposol oli no stop. Oli gohed wetem strong tingting blong talemaot gud nius, insaed long haos blong God mo long haos blong ol man.

“Mifala i mas obei long God we i rula blong mifala, i bitim we mifala i obei long ol man.”—Ol Wok 5:29