Go long ol haf insaed long hem

Go long lis blong ol haf

 STORI 98

Kristin Skul i Kasem Plante Kantri

Kristin Skul i Kasem Plante Kantri

Ol aposol oli obei long tok blong Jisas blong talemaot gud nius long olgeta ples blong wol. Long yia 47, ol brata long Antiok oli sanem Pol mo Banabas i go long wan trip blong prij. Tufala i wok strong blong prij long ol ples long Esia Maena, olsem Debe, Listra, mo Ikoniam.

Pol mo Banabas i prij long olgeta man, nating se oli rij no oli pua, oli yangfala no oli olfala. Plante man oli bilif long trutok long saed blong Kraes. Taem tufala i prij long Sejas Polas we i hedgavman blong Saepras, wan kleva i traem blong blokem tufala. Pol i talem long kleva ya se: ‘Jehova bae i panisim yu.’ Wantaem nomo, kleva ya i kam blaen. Taem hedgavman Polas i luk samting ya, hem i bilif.

Pol mo Banabas i prij long haos blong ol man, long ples blong maket, long rod, long haos prea blong ol man Jiu, mo long ol narafala ples we tufala i faenem man. Long Listra, tufala i hilim wan man we i no save wokbaot. Ol man we oli luk merikel ya oli wantem wosipim Pol mo Banabas olsem ol god. Be tufala i blokem olgeta, tufala i se: ‘!Yufala i mas wosipim God! Mifala i man nomo.’ Nao sam man Jiu oli kam, mo oli pulum ol man blong oli agensem Pol. Oli holemtaet hem, oli stonem hem, oli tekem hem i go afsaed long taon, mo oli lego hem i stap from oli ting se hem i ded. !Be Pol i no ded! Kwiktaem nomo, ol brata oli kam, mo oli tekem hem i gobak long taon. Biaen, Pol i gobak long Antiok.

Long yia 49, Pol i go long wan narafala trip. Hem i gobak blong luk ol brata long Esia Maena bakegen, mo biaen, hem i go talemaot gud nius long plante narafala ples long Yurop, olsem Atens, Efesas, Filipae,  mo Tesalonaeka. Saelas, Luk, mo yangfala Timoti, trifala i folem Pol. Oli stanemap ol kongregesen mo mekem olgeta oli kam strong. Pol i stap wan yia haf long Korin blong givhan long ol brata long ples ya. Hem i prij, i tijim ol man, mo i raetem leta i go long plante kongregesen. Mo tu, hem i mekem wok ya blong somap ol haos tapolen. Biaen, Pol i gobak long Antiok.

Long yia 52, Pol i mekem namba tri trip blong hem. Hem i aot long Esia Maena, i wokbaot i go long not kasem Filipae, mo biaen i godaon long Korin. Hem i stap longtaem long Efesas blong tijim ol man, hilim ol sikman, mo givhan long kongregesen. Mo tu, evri dei hem i mekem pablik tok long klasrum blong wan skul. Plante man oli lesin mo oli jenisim ol fasin blong olgeta. Afta we Pol i talemaot gud nius long plante kantri, hem i go long Jerusalem.

“Yufala i mas go long ol man blong olgeta neson, yufala i pulum olgeta oli kam disaepol blong mi.”—Matiu 28:19