Go long ol haf insaed long hem

Go long lis blong ol haf

 STORI 103

“Yu Mekem Kingdom Blong Yu i Kam”

“Yu Mekem Kingdom Blong Yu i Kam”

Jehova i promes se: ‘Bambae ol man oli no moa krae, oli no moa harem i soa, oli no moa sik, mo oli no moa ded. Bae mi ravemaot wota blong ae blong olgeta. Ol nogud samting we oli hapen bifo, bae oli no moa tingbaot.’

Jehova i putum Adam mo Iv i stap long garen blong Iden, blong tufala i glad, mo tufala i stap long pis. Tufala i mas wosipim Papa blong tufala long heven, mo fulumap wol wetem ol pikinini. Be tufala i no obei long Jehova. Nating se i olsem, tingting blong Jehova i no jenis. Yumi luk finis long buk ya se evri promes blong Jehova i stap kamtru. Kingdom blong God bambae i mekem se wol i kasem ol nambawan blesing, olsem we hem i promes long Ebraham.

I no longtaem, Setan, ol rabis enjel, mo ol rabis man bambae oli lus. Olgeta man we oli stap laef long taem ya bambae oli wosipim Jehova. Bambae yumi no moa sik mo ded. Be evri dei bambae yumi wekap we bodi blong yumi i gat fulap paoa, mo yumi glad blong  stap laef. Wol bambae i kam wan paradaes. Evriwan bambae oli gat gudfala kakae, mo gudfala haos. Ol man bambae oli kaen, bambae oli no spolem ol narafala mo kilkilim olgeta. Ol wael anamol bambae oli no fraet long yumi, mo yumi tu bambae yumi no fraet long olgeta.

Bambae yumi glad bitim mak taem Jehova i stat blong mekem ol man oli laef bakegen. Bambae yumi welkamem ol man blong bifo, olsem Ebel, Noa, Ebraham, Sera, Moses, Rut, Esta, mo Deved. Olgeta ya bambae oli joen wetem yumi, blong mekem wol ya i kam paradaes. Mo oltaem bambae i gat plante gudfala wok blong mekem.

Jehova i wantem se yu tu yu stap long niufala wol. Bambae yu kasem save plante samting long saed blong hem, we yu neva tingbaot bifo. !I gud yu kam klosap moa long Jehova evri dei, mo yu gohed blong mekem olsem, gogo i no save finis!

“Jehova, God blong mifala. Yu yu gat bigfala paoa, mo yu mekem olgeta samting. . . . From samting ya, i stret nomo blong ol man oli leftemap nem blong yu, mo blong oli ona long yu.”—Revelesen 4:11