Go long ol haf insaed long hem

Go long lis blong ol haf

 STORI 87

Las Kakae Blong Jisas

Las Kakae Blong Jisas

Evri yia, long namba 14 blong manis Nisan, ol man Isrel oli mekem lafet blong Pasova blong tingbaot taem ya we oli kam fri long Ijip, nao Jehova i tekem olgeta oli go long Promes Lan. Long yia 33, Jisas wetem ol aposol blong hem oli mekem lafet blong Pasova long wan rum antap long wan haos long Jerusalem. Taem oli kakae finis, Jisas i talem se: ‘Wan long yufala bae i putum mi mi go long han blong ol enemi blong mi.’ Ol aposol oli sek nogud, nao oli askem long Jisas se: ‘?Hu ya?’ Jisas i se: ‘Hemia man ya we bambae mi givim bred ya long hem.’ Nao hem i givim bred long Judas Iskariot. Wantaem nomo, Judas i girap mo i goaot.

Biaen, Jisas i prea, i brekem bred, i pasem long ol 11 aposol we oli stap, mo i talem se: ‘Yufala i kakae bred ya. Hemia i minim bodi blong mi we mi givim from yufala.’ Biaen hem i prea from waen, i pasem long ol aposol, mo i talem se: ‘Yufala i dring waen ya. Hemia i minim blad blong mi, we i ron blong tekemaot ol sin blong yufala. Mi mi promes se bae yufala i rul wetem mi olsem ol king long heven. Evri yia, yufala i mas mekem samting ya blong tingbaot mi bakegen.’ Tede tu, ol man blong Jisas oli kam wanples evri yia blong tingbaot hem. Nem blong miting ya se Kakae Blong Masta.

 Afta we oli kakae, ol aposol oli stap rao se hu long olgeta i hae moa. Be Jisas i talem se: ‘Man we i hae moa, hem i mas kam olsem we i yang moa mo i no impoten.

‘Yufala i fren blong mi. Mi mi talem evri samting we Papa blong mi i wantem se mi talem long yufala. I no longtaem, bae mi gobak long Papa blong mi long heven. Bae yufala i stap, mo from we yufala i lavlavem yufala, ol man bae oli save se yufala i man blong mi. Yufala i mas lavlavem yufala olsem we mi mi soemaot long yufala finis.’

Biaen, Jisas i prea, i askem long Jehova blong i lukaot gud long ol disaepol blong hem, mo i halpem olgeta blong oli joen gud blong wok. Hem i prea blong nem blong Jehova i tabu. Afta, Jisas wetem ol aposol blong hem oli singsing blong presem Jehova, nao oli go afsaed. Taem i klosap finis blong ol man oli kam holemtaet Jisas.

“Yufala smol grup blong ol sipsip, yufala i no fraet, from we Papa blong yufala i jusum finis blong givim Kingdom long yufala.” —Luk 12:32