Go long ol haf insaed long hem

Go long lis blong ol haf

 STORI 92

Jisas i Kamtru Long Ol Man Blong Pulum Fis

Jisas i Kamtru Long Ol Man Blong Pulum Fis

Smoltaem afta we Jisas i kamtru long ol aposol, Pita i go pulum fis long Lugun blong Galili. Tomas, Jemes, Jon, mo sam narafala disaepol tu oli go wetem hem. Oli sakem net fulnaet, be oli no kasem wan fis nating.

Taem i brok delaet, oli luk wan man i stanap long sanbij. Hem i singaot se: ‘!Olgeta! ?Yufala i kasem hamas fis?’ Oli ansa se: “!No gat!” Man ya i se: “Yufala i sakem net long raet saed blong bot.” Taem oli mekem olsem, oli no moa save pulum net i kambak long bot from we i fulap gud long fis. Wantaem nomo, Jon i luksave se Jisas ya, nao hem i se: “!Hemia Masta ya!” Kwiktaem nomo, Pita i jam long solwota mo i swim i goso. Ol narafala disaepol oli pul i kam biaen.

Taem oli goso, oli luk fis mo bred we i tan finis long wan sakol faea. Jisas i talem long olgeta blong oli tekem sam moa fis i kam. Nao hem i se: ‘Yufala i kam kakae.’

 Taem oli kakae finis, Jisas i askem long Pita se: ‘?Yu yu lavem mi moa i bitim we yu lavem wok ya blong pulum fis?’ Pita i se: ‘Yes Masta, yu save se mi lavem yu.’ Jisas i se: ‘Ale, yu givim kakae long ol smol sipsip blong mi.’ Jisas i askem bakegen se: ‘Pita, ?yu yu lavem mi?’ Pita i se: ‘Masta, yu save se mi lavem yu.’ Jisas i se: “Yu lidim ol smol sipsip blong mi.” Be Jisas i askem sem kwestin bakegen, nao Pita i harem nogud, i se: ‘Masta, yu yu save evri samting. Yu save finis se mi lavem yu.’ Jisas i se: “Yu givim kakae long ol smol sipsip blong mi.” Afta, hem i se: “Yu gohed, yu folem mi.”

Nao [Jisas] i talem long tufala se: ‘Yutufala i biaen long mi, bambae mi mi mekem yutufala i kam man blong pulum man.’ Wantaem nomo tufala i livim net blong tufala, mo tufala i folem hem.” —Matiu 4:19, 20