Go long ol haf insaed long hem

Go long lis blong ol haf

 STORI 75

Setan i Traem Jisas

Setan i Traem Jisas

Jisas i baptaes, nao tabu spirit i lidim hem i go long draeples. Hem i no kakae blong 40 dei, nao hem i hanggri tumas. Nao Setan i kam traem hem, i se: ‘Sipos i tru se yu yu Pikinini blong God, yu talem long ol ston ya blong oli kam bred.’ Be Jisas i yusum wan vas blong Baebol blong ansa, i se: ‘Baebol i talem se yu no save laef long kakae nomo. Yu mas lesin tu long olgeta tok we Jehova i talem.’

Biaen, Setan i traem Jisas bakegen, i se: ‘Sipos i tru se yu yu Pikinini blong God, yu go long haos blong God long ples we i hae moa, nao yu jam i godaon. Baebol i talem se, God bae i sanem ol enjel blong hem, blong oli holem yu.’ Be Jisas i yusum wan vas blong Baebol bakegen, i se: ‘Baebol i talem se yu no mas traem Jehova.’

Biaen bakegen, Setan i soemaot olgeta kantri blong wol long Jisas, wetem ol gudgudfala samting blong olgeta, mo i talem se: ‘Sipos yu mekem wan samting nomo blong wosipim mi, bae mi givim olgeta kantri ya long yu, wetem ol gudfala samting blong olgeta.’ Be Jisas i ansa se: ‘!Setan! !Yu gowe! Baebol i talem se yu mas wosipim Jehova nomo.’

Nao Setan i gowe, mo ol enjel oli kam givim kakae long Jisas. Stat long taem ya, Jisas i talemaot gud nius blong Kingdom. Hemia nao wok we hem i kam long wol ya blong mekem. Ol man oli laekem tumas ol tijing blong hem, mo oli folem hem i go long evri ples.

“Taem [Setan] i giaman, hem i stap mekem fasin blong hem nomo, from we hem i wan man blong giaman mo hem i papa blong ol giaman toktok.” —Jon 8:44