Go long ol haf insaed long hem

Go long lis blong ol haf

 STORI 82

Jisas i Tijim Ol Disaepol Blong Oli Prea

Jisas i Tijim Ol Disaepol Blong Oli Prea

Oltaem ol Farisi oli traem pulum ae blong ol man. Oli kaen long narafala blong pulum ol man blong oli lukluk olgeta. Oli prea long ol pablik ples blong ol man oli save luk olgeta. Oli lanem gud ol prea, mo oli stap talem bakegen mo bakegen long ol haos prea mo long ol big rod, blong ol man oli harem olgeta. Taswe, ol man oli sapraes taem Jisas i talem se: ‘Yu no mas folem fasin blong ol Farisi. Oli ting se God i glad long ol toktok we oli talem long prea, be God i no glad. Taem yu prea, hemia yu wetem Jehova nomo. Yu no mas talem sem samting bakegen mo bakegen. Jehova i wantem se yu talemaot olgeta filing blong yu.

‘Yu mas prea olsem: “Papa blong mifala long heven, plis yu mekem we nem blong yu i tabu. Yu mekem Kingdom blong yu i kam. Yu mekem  samting we yu wantem i kamtru long wol ya olsem long heven.”’ Jisas i talem long ol man se oli mas prea blong God i givim kakae we i naf blong tede, mo blong hem i fogivim sin blong olgeta, mo oli save tokbaot ol narafala samting long laef blong olgeta.

Jisas i talem se: ‘Yu mas gohed nomo blong prea. Yu gohed blong askem long Papa Jehova, blong i givim ol gudfala samting long yu. Ol papa mo mama oli wantem givim ol gudfala samting long pikinini blong olgeta. Sipos pikinini blong yu i askem bred, ?bae yu givim ston long hem? Sipos hem i askem wan fis, ?bae yu givim wan snek long hem?’

Biaen, Jisas i eksplenem se: ‘Yu yu stap givim ol gudgudfala samting long pikinini blong yu. Taswe, ?yu no ting se Papa blong yu long heven, we i gud moa i winim yu, i save givim tabu spirit long yu? Yu nidim nomo blong askem long hem.’ ?Olsem wanem? ?Yu tu yu stap folem advaes ya blong Jisas? ?Yu yu tokbaot wanem long ol prea blong yu?

“Yufala i mas gohed blong askem, nao bambae yufala i kasem, mo yufala i mas gohed blong lukaotem, nao bambae yufala i faenem, mo yufala i mas gohed blong noknok, nao doa bambae i open long yufala.”—Matiu 7:7