Go long ol haf insaed long hem

Go long lis blong ol haf

 STORI 78

Jisas i Talemaot Gud Nius Blong Kingdom

Jisas i Talemaot Gud Nius Blong Kingdom

Smoltaem afta we Jisas i baptaes, hem i stat blong prij, se: ‘Kingdom blong God i kam klosap finis.’ Ol disaepol oli folem hem i go long ol defdefren ples long Galili mo Judia. Taem Jisas i gobak long Nasaret, hem i go long haos prea, i openem buk blong Aesea, mo i ridimaot se: ‘Jehova i givim tabu spirit long mi blong mi talemaot gud nius.’ ?Tok ya i minim wanem? I min se bigfala risen from wanem Jisas i kasem tabu spirit, hemia blong talemaot gud nius, nating se ol man oli wantem tumas we hem i mekem merikel. Biaen, hem i talem se: ‘Tede profet tok ya i kamtru.’

Jisas i wokbaot i go long bigfala lugun blong Galili. Nao hem i singaot fo man blong pulum fis, i se: ‘Yufala i folem mi, mo bae mi mekem yufala i kam man blong pulum man.’ Wantaem nomo, Pita, Andru, Jemes, mo Jon oli lego wok blong olgeta mo oli folem hem. Oli go talemaot Kingdom blong Jehova long olgeta ples long Galili. Oli prij long ol haos prea, ples blong maket, mo long rod, mo plante man oli biaen long olgeta. Nius blong Jisas i goaot long olgeta ples, go kasem Siria.

Biaen, Jisas i givim paoa long sam man blong hem blong oli mekem sikman i kam gud bakegen, mo oli ronemaot devel long man. Sam narafala oli folem hem i go long ol taon mo ol vilej we hem i prij long olgeta. Plante woman we oli obei long God, olsem Meri Magdala, Joana, Susana, mo sam narafala, oli lukaot long Jisas mo ol man blong hem.

Afta we Jisas i trenem ol disaepol blong hem, hem i sanem olgeta oli go prij. Taem oli stap prij long Galili, i gat plante man oli kam disaepol mo oli baptaes. From we oli plante tumas, Jisas i tokbaot olgeta olsem wan garen we kakae blong hem i rere finis, i se: ‘Yufala i mas prea blong Jehova i sanem sam moa man oli kam blong karem kakae.’ Biaen, hem i sanem 70 disaepol oli go tutu, blong oli prij long ol ples long Judia. Oli tijim enikaen man long saed blong Kingdom. Taem oli kambak, oli glad  tumas blong talemaot long Jisas ol samting we i hapen. Setan i no save mekem wan samting blong stopem wok blong prij.

Jisas i wantem se ol man blong hem oli mas gohed long impoten wok ya afta we hem i gobak long heven. Hem i talem se: ‘Yufala i mas go talemaot gud nius long olgeta ples long wol, tijim ol man blong oli save Tok blong God, mo baptaesem olgeta.’

“Mi mas talemaot gud nius blong Kingdom blong God long ol narafala taon tu, from we hemia nao samting we God i sanem mi blong mi mekem.” —Luk 4:43