Go long ol haf insaed long hem

Go long lis blong ol haf

 STORI 76

Jisas i Ronemaot Ol Man Long Haos Blong God

Jisas i Ronemaot Ol Man Long Haos Blong God

Long yia 30, taem ol tri oli stap putum flaoa, Jisas i go long Jerusalem. Plante man oli kam blong mekem lafet blong Pasova. Long lafet ya, oli bonem ol anamol blong mekem sakrefaes long haos blong God. Samfala oli karem ol anamol ya i kam wetem olgeta, be sam oli pem long Jerusalem.

Taem Jisas i go long haos blong God, hem i luk we ol man oli stap salem ol anamol blong winim mane. ?Hem i mekem wanem? Hem i tekem sam rop mo i mekem wan wip long hem. Nao hem i ronemaot ol sipsip mo ol buluk long haos blong God, mo i kafsaedem ol tebol  blong ol man we oli stap jenisim mane, i sakem ol mane blong olgeta i go olbaot. Jisas i talem long ol man we oli stap salem ol pijin se: ‘!Yufala i tekemaot ol samting ya! !Yufala i no mekem haos blong Papa blong mi i kam ples blong mekem maket!’

Ol man oli sapraes long samting we Jisas i mekem. Ol disaepol blong hem oli tingbaot profet tok we i tokbaot Mesaea se: ‘Mi mi wantem tumas we evri samting long haos blong Jehova oli mas stret gud.’

Long yia 33, Jisas i ronemaot ol man bakegen long haos blong God. Hem i wantem se ol man oli mas respektem haos blong Papa blong hem.

“Yufala i no save kam slef blong God mo long semtaem yufala i slef blong mane.”—Luk 16:13