Go long ol haf insaed long hem

Go long lis blong ol haf

 STORI 80

Jisas i Jusumaot 12 Aposol

Jisas i Jusumaot 12 Aposol

Jisas i prij wan yia haf, nao hem i mas mekem wan impoten desisen. ?Bambae hem i jusum hu blong oli wokbaot wetem hem oltaem? ?Bambae hem i trenem hu blong oli lidim Kristin kongregesen? Jisas i wantem we Jehova i givhan long hem blong i mekem desisen ya. Ale hem i go antap long wan hil hem wan, mo i prea blong wan fulnaet. Long moning, Jisas i singaot ol disaepol blong hem oli kam, nao hem i jusumaot twelef aposol. ?Yu tingbaot nem blong olgeta? I gat Pita, Andru, Jemes, Jon, Filip, Batolomiu, Tomas, Matiu, Jemes we i pikinini blong Alfeas, Tadeas, Saemon, mo Judas Iskariot.

Andru, Pita, Filip, Jemes

Ol 12 aposol ya oli stap wokbaot wetem Jisas. Be afta we hem i trenem olgeta, oli go prij olgeta nomo. Jehova i givim paoa long olgeta blong oli ronemaot devel mo mekem ol sikman oli kam gud.

Jon, Matiu, Batolomiu, Tomas

Jisas i singaotem ol 12 aposol ya se oli fren blong hem, mo hem i trastem olgeta. Ol Farisi oli ting se ol aposol ya oli no skul gud mo oli no gat nem. Be Jisas i no tingting olsem, hem i trenem olgeta  blong oli naf blong mekem wok we hem i givim. Oli stap wetem Jisas long ol impoten taem long laef blong hem, olsem bifo we hem i ded mo afta we hem i laef bakegen. Plante long ol aposol ya oli blong Galili, olsem Jisas. Sam long olgeta oli mared.

Jemes we i pikinini blong Alfeas, Judas Iskariot, Tadeas, Saemon

From we ol aposol oli sinman, oli mekem mastik. Samtaem oli no tingting gud bifo we oli toktok, oli mekem sam nogud desisen, oli no gat longfala tingting, mo oli rao se hu long olgeta i hae moa. Be oli gudfala man we oli lavem Jehova. Olgeta nao ol faswan long Kristin kongregesen, we bambae oli mekem impoten wok afta we Jisas i lego olgeta.

“Mi singaotem yufala se ol fren, from we mi mi talemaot long yufala evri samting we mi harem long Papa blong mi.”—Jon 15:15