Go long ol haf insaed long hem

Go long lis blong ol haf

 STORI 58

Ol Ami Oli Spolem Jerusalem

Ol Ami Oli Spolem Jerusalem

Ol man Juda oli lego Jehova bakegen mo bakegen, blong wosipim ol giaman god. Jehova i gohed plante yia blong traem givhan long olgeta. Hem i sanem plante profet oli go blong givim woning long olgeta, be oli no lesin. Oli girap oli jikim ol profet ya. ?Jehova i mekem wanem blong finisim wosip blong ol giaman god ya?

Nebukadnesa, king blong Babilon, i stap winim plante kantri. Taem hem i winim Jerusalem, hem i holemtaet King Jehoeakin, wetem ol lida blong Jerusalem, ol strong man blong faet, mo ol man we oli gat gudhan blong wokem ol samting. Nao hem i tekem olgeta oli go long Babilon. Mo tu, hem i karemaot ol gudgudfala samting long haos blong Jehova. Biaen, hem i mekem Jedekia i kam king blong Juda.

Fastaem, Jedekia i obei long Nebukadnesa. Be ol kantri raonabaot mo ol giaman profet oli talem se i moa gud hem i girap agensem Babilon. Jeremaea i givim woning ya se: ‘Sipos yu girap agensem Babilon, fulap man Juda bae oli ded, mo ol narafala man bae oli hanggri mo sik.’

Be Jedekia i no lesin. Afta we hem i rul blong eit yia, hem i askem long ol ami blong Ijip blong oli givhan long hem blong agensem Babilon. Nao Nebukadnesa i sanem ol ami blong hem oli kam long Jerusalem, mo oli raonem taon ya. Nao Jeremaea i talem tok blong Jehova long Jedekia se: ‘Sipos yu nomo yu putum yu long han blong ol ami blong Babilon, bae yu no save ded, mo taon ya bae i stap gud. Be sipos yu no mekem olsem, ol ami blong Babilon bae oli bonem Jerusalem mo oli tekem yu yu go kalabus.’ Be Jedekia i talem se: ‘!Mi no save putum mi long han blong olgeta!’

 Wan yia haf biaen, ol ami blong Babilon oli brekem stonwol blong Jerusalem, oli go insaed, mo oli bonem taon ya. Oli bonem haos blong God, oli kilim plante man oli ded, mo oli tekem plante taosen man oli go kalabus.

Kwiktaem nomo, Jedekia i aot long Jerusalem i ronwe. Be ol ami blong Babilon oli ronem hem go kasem Jeriko. Nao oli tekem hem i gobak long King Nebukadnesa, mo king i talem long ol man blong hem blong oli kilim ol pikinini blong hem i ded, stret long fes blong hem. Biaen, Nebukadnesa i tekemaot tufala ae blong Jedekia, i sakem hem long kalabus, mo hem i ded long ples ya. Be Jehova i promes long ol man Juda se: ‘Afta long 70 yia, bae mi tekem yufala i gobak long Jerusalem.’

?Be olsem wanem long ol yangfala we oli go kalabus long Babilon? ?Bambae oli holemstrong long Jehova?

“Jehova God, yu yu gat olgeta paoa, mo ol jajmen blong yu oli tru mo oli stret.”—Revelesen 16:7