Go long ol haf insaed long hem

Go long lis blong ol haf

 STORI 62

Kingdom We i Olsem Bigfala Tri

Kingdom We i Olsem Bigfala Tri

Wan naet, Nebukadnesa i luk wan drim we i mekem hem i fraet tumas. Hem i singaot ol waes man blong oli talemaot mining blong drim ya. Be i no gat wan long olgeta we i save. Nao king i singaot Daniel.

Nebukadnesa i talem drim long Daniel i se: ‘Mi luk wan tri we i kam bigwan we i bigwan, gogo i kasem skae antap, mo olgeta man long wol oli save luk. Ol lif blong hem i gud we i gud, mo ol frut blong hem i plante we plante. Ol anamol oli stap spel long sed blong hem, mo ol pijin oli stap mekem nes blong olgeta long ol han blong hem. Afta, wan enjel i kamdaon mo i singaot se: “Yufala i katemdaon tri ya wetem ol han blong hem. Yufala i livim stamba nomo i stap, mo yufala i tekem wan bigfala strap we oli wokem long aean mo bras, yufala i fasem stamba ya. Bae tingting blong man i lus long hem, bae hem i gat tingting blong anamol nomo go kasem seven yia. Olgeta man oli mas save se God i rulum wol ya, mo i save givim kingdom long man we hem i jusumaot.”’

Jehova i talemaot mining blong drim long Daniel. Taem Daniel i harem, hem i fraet we i fraet, i talem se: ‘King, sipos drim ya i tokbaot ol enemi blong yu, bae i gud moa, be bigfala tri ya we oli katemdaon, hemia yu ya. Bae yu no moa rul long Kingdom blong yu. Bae yu go stap wetem ol wael anamol mo yu kakae gras olsem buluk. Be from we stamba blong tri ya i stap, hemia i min se bae yu kam king bakegen.’

Wan yia biaen, Nebukadnesa i stap wokbaot antap long ruf blong haos blong hem, i stap lukluk taon ya Babilon, mo i tingbaot se i naes tumas. Hem i talem se: ‘!Maewad! Mi nao mi wokem naesfala taon ya. !Mi yes, mi gat paoa!’ Taem hem i stap toktok yet, wan voes i kamaot long heven i se: ‘!Nebukadnesa! Naoia nomo, bae yu lusum paoa mo kingdom blong yu.’

Wantaem nomo, hed blong Nebukadnesa i kam krangke, mo hem i kam olsem wan wael anamol. Hem i aot long flas haos blong hem, i go stap long bus wetem ol wael anamol. Hea blong hem i gru i kam longfala, olsem ol feta blong igel, mo ol selfingga blong hem oli kam longfala olsem blong ol pijin.

 Afta we seven yia i pas, hed blong Nebukadnesa i kam gud, nao Jehova i mekem hem i kam king bakegen. Nao hem i talem se: ‘Mi mi presem Jehova we i king antap long heven. Naoia mi save se Jehova i rul oltaem nomo. Hem i daonem ol man we oli flas, mo hem i givim kingdom i go long man we hem i jusumaot.’

“Man we i praod bambae i kasem trabol we i spolemgud hem, mo man we i flas tumas bambae i foldaon we i foldaon olgeta.”—Ol Proveb 16:18