Go long ol haf insaed long hem

Go long lis blong ol haf

 STORI 66

Esra i Tijim Ol Man Long Loa Blong God

Esra i Tijim Ol Man Long Loa Blong God

Bighaf blong ol man Isrel oli gobak long Jerusalem finis, be sam oli stap yet long ol defdefren ples we Pesia i rul long olgeta. Wan long olgeta ya, hemia pris Esra, we i stap tijim ol man long Loa blong Jehova. Afta we 70 yia i pas, Esra i harem nius se ol man long Jerusalem oli no stap folem Loa, nao hem i wantem gobak blong givhan long olgeta. King Ataksekses blong Pesia i talem long Esra se: ‘God i mekem yu yu waes blong yu save tijim ol man long Loa blong hem. Yu go, mo yu tekem eni man we i wantem go wetem yu.’ Ale Esra i singaot ol man we oli wantem gobak long Jerusalem wetem hem. Oli joen wanples blong prea, mo oli askem long Jehova blong i lukaot gud long olgeta long rod. Nao oli wokbaot i go.

Fo manis biaen, oli kasem Jerusalem. Ol lida blong taon ya oli talem long Esra se: ‘Ol man oli no obei long Jehova, oli stap tekem ol woman we oli wosipim ol giaman god.’ ?Esra i mekem wanem? Esra i nildaon long fored blong ol man, i prea se: ‘Jehova, yu mekem plante samting long mifala, be mifala i mekem sin agens long yu.’ Ol man ya oli tanem tingting blong olgeta, be oli nidim yet blong stretem sam samting. Esra i jusumaot sam haeman mo jaj blong oli lukluk long ol problem ya. Oli gohed tri manis blong sanemaot olgeta we oli no wosipim Jehova.

Twelef yia biaen, Esra i singaot ol man oli kam wanples blong i ridimaot Loa blong God long olgeta. Long taem ya, oli wokem gud finis stonwol blong Jerusalem. Taem Esra i openem buk blong Loa, ol man oli stanap. Nao hem i presem Jehova, mo evriwan oli leftemap han blong olgeta blong soemaot se oli agri. Oli lesin gud taem Esra i ridimaot Loa ya mo i eksplenem. Oli luksave se oli gowe long Jehova bakegen, oli harem nogud, nao oli krae. Long nekis dei, Esra i ridimaot Loa ya bakegen. Oli kasem save se taem blong mekem Lafet blong Wokem ol Wansaed Haos i klosap. Wantaem nomo, oli rerem ol samting blong lafet ya.

 Long ol seven dei blong lafet ya, ol man oli glad we oli glad, mo oli talem tangkiu long Jehova from we garen i karem fulap kakae. Stat long taem blong Josua, i no gat wan Lafet blong Wokem ol Wansaed Haos we i olsem. Afta long lafet ya, ol man oli joen wanples, nao oli prea se: ‘Jehova, yu tekemaot mifala long ples we mifala i wok slef long hem, yu givim kakae long mifala long draeples, mo yu lidim mifala i kam long gudfala kantri ya. Be plante taem mifala i no obei long yu. Yu sanem ol profet blong oli givim woning long mifala, be mifala i no lesin. Nating se i olsem, yu no lego mifala. Yu holem promes we yu mekem wetem Ebraham. Naoia mifala i promes se bae mifala i obei long yu.’ Nao oli raetemdaon promes ya, mo ol lida, ol Livaet, mo ol pris, oli saenem.

“!Ol man we oli harem tok blong God mo oli stap obei long hem, olgeta ya nao oli glad!”—Luk 11:28