Go long ol haf insaed long hem

Go long lis blong ol haf

 Haf 10

?Olsem Wanem Blong Luksave Skul We i Tru?

?Olsem Wanem Blong Luksave Skul We i Tru?

“Yufala i mas lukaot long ol giaman profet.”—MATIU 7:15.

“Ol man ya oli stap talem se oli save God, be ol fasin we oli stap mekem, i soemaot we tok ya blong olgeta i no tru.”—TAETAS 1:16.

1. ?I gat wan skul nomo we i tru?

Jisas i tijim ol man blong hem se i gat wan skul nomo we i tru. Hemia nao rod blong kasem laef we i no save finis. Jisas i talem se, “smol man nomo oli faenem” rod ya. (Matiu 7:14) God i glad long wosip we i stanap long Baebol nomo. Ol man we oli wosipim tru God, oli joen long wan bilif nomo.​—Ridim Jon 4:23, 24; 14:6; Efesas 4:5.

2. ?Jisas i tokbaot ol giaman Kristin olsem wanem?

Jisas i givim woning se sam giaman profet bambae oli girap, oli traem spolem Kristin skul. Olgeta ya oli mekem olsem we oli folem tru wosip. Oli talem se ol skul blong olgeta oli Kristin. Be oli giaman nomo. ?From wanem yumi talem olsem? From we ol tru Kristin oli gat ol gudfala fasin mo oli mekem ol gudfala wok.​—Ridim Matiu 7:13-23.

3. ?Wanem i save givhan long yu blong yu luksave ol tru Kristin?

Yu traem tingbaot faef fasin we oli makemaot ol tru Kristin:

  • Oli bilif se Baebol i Tok blong God. Ol tru Kristin oli traehad blong folem Tok blong God. Taswe skul we i tru i defren long ol skul we oli folem tingting blong man nomo. (Matiu 15:7-9) Ol tru Kristin oli folem ol tok blong Baebol long laef blong olgeta, oli no jes talemaot ol tok ya blong ol narafala oli folem.​—Ridim Jon 17:17; 2 Timoti 3:16, 17.

  •   Oli leftemap nem blong God, Jehova. taem Jisas i talemaot nem blong God, hem i stap leftemap nem ya. Hem i givhan long ol man blong oli save God. Hem i tijim olgeta blong oli prea se nem blong God i tabu. (Matiu 6:9) Long ples blong yu, ?wanem skul i talemaot nem blong God?​—Ridim Jon 17:6; Rom 10:13, 14.

  • Oli talemaot Kingdom we hemia gavman blong God. God i sanem Jisas i kam long wol blong i talemaot gud nius blong Kingdom. Kingdom ya nomo i save winim ol trabol blong ol man. Jisas i tokbaot Kingdom ya oltaem. (Luk 4:43; 8:1; 23:42, 43) Hem i talem se ol man blong hem tu bambae oli talemaot Kingdom ya. Sipos wan man i kam luk yu blong tokbaot Kingdom blong God, ?yu ting se hem i blong wanem skul?​—Ridim Matiu 24:14.

  • Oli no joen long rabis wol ya. Yumi luksave ol man we oli tru Kristin, from we oli no joen long politik, mo ol faet, mo ol raorao blong ol man. (Jon 17:16; 18:36) Mo tu, oli no folem ol nogud fasin mo tingting blong wol.​—Ridim Jemes 4:4.

  • Oli lavlavem olgeta. Taem ol tru Kristin oli stadi Baebol oli lanem blong gat respek long ol man, nomata se oli blong wanem laen mo kantri. Plante taem ol giaman skul oli sapotem ol faet blong ol kantri, be ol tru Kristin oli no mekem olsem. (Maeka 4:1-3) Oli yusum taem mo ol narafala samting blong olgeta, blong oli givhan long ol man mo oli leftemap tingting blong olgeta.​—Ridim Jon 13:34, 35; 1 Jon 4:20.

4. ?Yu yu luksave skul we i tru?

Long tingting blong yu, ?wanem skul nao we ol tijing blong hem oli stanap long Baebol? ?Wanem skul i leftemap nem blong God, mo i talemaot se Kingdom blong God nomo i save stretem ol trabol? ?Wanem skul we ol man blong hem oli lavlavem olgeta mo oli no joen long faet?​—Ridim 1 Jon 3:10-12.