Go long ol haf insaed long hem

Go long lis blong ol haf

 Haf 5

?Fastaem God i Gat Wanem Tingting Long Wol Ya?

?Fastaem God i Gat Wanem Tingting Long Wol Ya?

1. ?God i mekem wol ya blong wanem?

Jehova i mekem wol ya blong ol man mo woman oli stap long hem. Hem i ples blong yumi. Taem God i mekem Adam mo Iv, hem i no mekem tufala blong tufala i stap long heven, from we hem i mekem ol enjel finis blong oli stap long heven. (Job 38:4, 7) God i putum Adam long paradaes ya Iden. (Jenesis 2:15-17) Jehova i givim janis long hem blong i laef long wol ya gogo i no save finis. Ol pikinini we oli kamaot biaen long hem, olgeta tu bambae oli gat janis ya.​—Ridim Ol Sam 37:29; 115:16.

Fastaem, Iden nomo i paradaes. Fas man mo woman tufala i mas gat plante pikinini we bambae oli fulumap wol ya. Bambae oli lukaot long wol ya mo oli mekem fulwol i kam paradaes. (Jenesis 1:28) Wol ya i no save lus samtaem. Bambae hem i ples blong ol man olwe.​—Ridim Ol Sam 104:5.

2. ?From wanem wol ya i no moa paradaes?

Adam mo Iv tufala i no obei long Jehova, ale hem i putumaot tufala long Iden. Paradaes i lus, mo i no gat wan man we i save mekem i kambak. Baebol i talem se: “Wol ya, God i letem i go long han blong ol man nogud.”—Job 9:24.​—Ridim Jenesis 3:23, 24.

?Olsem wanem? ?Jehova i lego tingting we hem i gat fastaem? !Nogat! Jehova i gat olgeta paoa. Samting we hem i wantem i mas kamtru. (Aesea 45:18) Bambae hem i mekem se ol man oli gat gudfala laef, olsem fastaem.​—Ridim Ol Sam 37:11, 34.

3. ?Paradaes bambae i kambak olsem wanem?

Taem Jisas i rulum wol ya, bambae fulwol i kam paradaes bakegen. Jisas bambae i lidim ol enjel blong hem blong oli mekem faet ya Amagedon. Long faet ya, bambae oli spolem olgeta man we oli agens long God. Biaen, Jisas bambae i sakem Setan i go long kalabus blong 1,000 yia. Ol man blong God bambae oli no ded long faet ya, from we Jisas bambae i lukaot long olgeta  mo i lidim olgeta. Bambae oli kasem laef we i no save finis long Paradaes long wol.​—Ridim Revelesen 20:1-3; 21:3, 4.

4. ?Wetaem ol man bambae oli no moa harem nogud?

Maet yu stap tingbaot se: ?Wetaem bambae God i finisim ol trabol long wol? Jisas i talem wan “saen” we i soemaot se en i klosap. Sipos ol trabol long wol i stap gohed, olgeta man oli save lus. Ol trabol ya nao oli soemaot se yumi stap klosap long en.​—Ridim Matiu 24:3, 7-14, 21, 22.

Taem Jisas i stap rul antap long wol ya blong 1,000 yia, bambae hem i finisim ol trabol we i mekem ol man oli harem nogud. (Aesea 9:6, 7; 11:9) Jisas i King, mo bambae hem i mekem wok blong Hae Pris tu. Bambae hem i tekemaot sin blong ol man we oli lavem God. God bambae i yusum Jisas blong finisim sik, mo ol trabol blong olfala, mo ded.​—Ridim Aesea 25:8; 33:24.

5. ?Hu bambae i laef long Paradaes?

Yu save kam long Haos Kingdom blong ol Witnes, blong joen wetem ol man we oli lavem God mo oli wantem lanem blong mekem God i glad

Ol man we oli obei long God bambae oli laef long Paradaes. (1 Jon 2:17) Jisas i sanem ol man blong hem oli go blong lukaot ol man we tingting blong olgeta i stap daon. Oli mas tijim ol man ya blong oli mekem samting we God i glad long hem. Long taem blong yumi, Jehova i stap rerem plante milian man blong bambae oli stap long Paradaes long wol. (Sefanaea 2:3) Long ol miting long Haos Kingdom blong ol Witnes blong Jehova, ol man oli lanem blong kam ol gudfala papa, mo ol woman oli lanem blong kam ol gudfala mama. Ol pikinini wetem ol papa mama, olgeta evriwan oli kasem ol save blong Baebol we i mekem laef blong olgeta i kam gud moa.​—Ridim Maeka 4:1-4.