Go long ol haf insaed long hem

Go long lis blong ol haf

 JAPTA 6

Ol Man Blong Prij​—Ol Man Blong God Oli Glad Blong Prij

Ol Man Blong Prij​—Ol Man Blong God Oli Glad Blong Prij

?JAPTA YA I TOKBAOT WANEM?

Ol man blong prij we King i hivimap, oli olsem wan bigfala ami

1, 2. ?Jisas i talem wanem profet tok? ?Wanem impoten kwestin we yumi mas faenem ansa blong hem?

OL MAN BLONG POLITIK oli mekem plante promes we oli no kamtru. Maet oli mekem ol promes ya wetem gudfala tingting, be oli no naf blong mekem olgeta i kamtru. Mesaea Jisas Kraes we hem i King blong yumi, hem i defren. Oltaem hem i mekem ol promes blong hem oli kamtru.

2 Taem Jisas i kam King long yia 1914, hem i rere blong mekem wan profet tok i kamtru. Samwe long 1,900 yia bifo, smoltaem bifo we Jisas i ded, hem i talem profet tok ya se: “Gud nius ya blong kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.” (Mat. 24:14, NW) Hemia haf blong saen ya we bambae i soemaot se Jisas i stap rul long Kingdom. Be bambae i had blong faenem ol man we oli glad blong prij tede, from we yumi stap long ol las dei we ol man oli tingbaot olgeta nomo, oli no moa tingbaot God. ?Olsem wanem? ?King ya bambae i faenem ol man we oli glad blong prij? (Mat. 24:12; 2 Tim. 3:1-5) Yumi ol tru Kristin, yumi mas save ansa blong kwestin ya, from we i joen wetem laef blong yumi.

3. ?Tok blong Jisas se ‘bambae oli talemaot,’ i soemaot wanem? ?From wanem hem i trastem ol man blong hem olsem?

3 Yu traem lukluk bakegen long tok blong Jisas se ‘bambae oli talemaot.’ Tok ya i soemaot se bambae i gat ol man we oli glad blong prij long ol las dei. ?From wanem Jisas i trastem ol man blong hem olsem? From we, bifo we hem i kamdaon long wol, hem i luk fasin blong Papa blong hem Jehova. (Jon 12:45; 14:9) Jehova i trastem ol man we oli wosipim hem, se bambae oli glad blong mekem wok blong hem. Bambae yumi luk olsem wanem Jehova i soemaot se hem i trastem olgeta.

‘Ol Man Blong Yu Oli Glad’ Blong Wok

4. ?Jehova i singaot ol man Isrel blong oli sapotem wanem wok? ?Nao olgeta oli mekem wanem?

4 Yu traem tingbaot taem ya we Jehova i talem long Moses blong i mekem wan haos tapolen we ol man Isrel oli save kam mekem wosip long hem. Hem i talem long Moses blong i singaot  ol man blong oli givim samting blong sapotem wok ya, i se: “Man we tingting blong hem i glad blong givim sam samting, hem i save givim.” ?Wanem i hapen? ‘Evri moning, ol man oli stap tekem plante samting i kam,’ gogo i plante tumas. Ale, oli ‘blokem olgeta oli no moa givim ol samting ya.’ (Eks. 35:5; 36:3, 6) !Yu luk! !I stret nomo we Jehova i trastem ol man Isrel ya!

5, 6. ?Ol Sam 110:1-3 i talem se ol man blong mekem tru wosip long ol las dei, bambae oli gat wanem fasin?

5 Jehova i save se ol man blong hem bambae oli glad blong mekem wok blong hem long ol las dei. Bitim 1,000 yia bifo we Jisas i bon, Jehova i pulum Deved blong i raetemdaon samting we bambae i hapen taem Mesaea i rul. (Ridim Ol Sam 110:1-3.) Bambae King ya Jisas i gat plante enemi. Be bambae hem i gat fulap man blong hem tu. Olgeta ya oli glad nomo blong mekem wok blong hem, hem i no fosem olgeta. Ol yangfala tu bambae oli glad nomo blong wok. Bambae oli kam plante we i plante, olsem wota blong naet we i stap olbaot long graon long moning. *

Ol man we oli glad blong talemaot Kingdom oli plante we i plante, olsem wota blong naet (Yu luk haf 5)

6 Jisas i save se profet tok long Ol Sam 110 i stap tokbaot hem. (Mat. 22:42-45) Taswe hem i trastem ol man blong hem se bambae oli glad nomo blong talemaot gud nius long olgeta ples long wol. ?Olsem wanem? ?Long ol las dei ya, King i hivimap finis ol man we oli glad blong prij? !Yes! Yu traem tingbaot ol samting we i hapen long ol yia bifo.

“Mi Mi Glad Blong Prij, Hemia Wok Blong Mi”

7. Afta we Jisas i kam King, ?wanem ol samting we hem i mekem blong rerem ol man blong hem from wan bigfala wok?

7 Smoltaem afta we Jisas i kam King, hem i mekem plante samting blong rerem ol man blong hem from wan bigfala wok. Yumi luk finis long Japta 2 se, stat long yia 1914 kasem 1919,  Jisas i jekem ol man blong God, mo i mekem se oli kam klin gud long fes blong God. (Mal. 3:1-4) Long yia 1919, hem i putumap slef we i stret mo waes blong i lidim ol man blong hem. (Mat. 24:45) Stat long taem ya, slef ya i givimaot save blong God long ol asembli mo long ol buk we hem i wokem. Hem i talem bakegen mo bakegen se ol Kristin wanwan oli mas prij.

8-10. ?Wanem ol tok we oli kamaot long asembli blong pulum ol man blong God blong oli prij? (Yu luk pej ya tu, “ Ol Asembli Oli Pulum Ol Brata Blong Oli Prij.”)

8 Ol asembli. Long namba 1 kasem namba 8 Septemba 1919, ol Baebol Studen oli joen long wan asembli long taon ya Cedar Point, long Amerika. Hemia fas bigfala asembli we oli mekem afta long Wol Wo Wan. Oli wantem save se oli mas mekem wanem wok naoia. Long namba tu dei, Brata Rutherford i givim wan tok, mo hem i talem stret se: “Wok blong evri Kristin long wol . . . i blong talemaot kingdom blong Masta.”

9 Long namba faef dei, Brata Rutherford i givim bigfala tok blong asembli ya, nem blong hem, “Tok We i Go Long Ol Man Blong Wok.” Biaen, tok ya i kamaot long Wajtaoa, long haf ya we nem blong hem se, “Talemaot Kingdom.” Long tok ya, hem i talem se: “Samtaem ol Kristin wanwan oli wantem save se, ‘?From wanem mi mi stap long wol ya?’ Ansa we i mas kam long tingting blong olgeta, hemia: ‘Masta i soemaot gladhat blong hem, nao i mekem mi mi kam wan ambasada blong hem. Wok blong mi i blong talemaot ol tok we oli save mekem man i fren gud wetem God. Mi mi glad blong prij, hemia wok blong mi.’”

10 Afta long tok ya, Brata Rutherford i talemaot wan niufala magasin, nem blong hem, Golden Age (we naoia hem i Wekap!). Magasin ya bambae i pulum tingting blong ol man i go long Kingdom, hemia nomo rod blong oli gat wan gudfala laef long fiuja. Nao brata i askem long ol man long asembli ya se, ?hu nao i wantem joen long wok blong seremaot magasin ya? Wan ripot i talem se: “Ol sikis taosen man evriwan oli stanap. Samting ya i tajem hat blong evriwan we oli stap.” * !I klia nomo se i gat ol man we oli glad blong sapotem King mo talemaot Kingdom blong hem!

11, 12. Long yia 1920, ?Wajtaoa i talemaot se wetaem nao bambae oli mekem wok we Jisas i tokbaot?

11 Ol buk. Sloslo, Wajtaoa i eksplenem wok ya blong talemaot gud nius blong Kingdom. Yu traem tingbaot sam eksampol long ol yia afta 1920.

12 Wajtaoa blong namba 1 Julae 1920, i talem wanem tok nao bambae oli talemaot, folem Matiu 24:14. Long haf ya “Gud Nius Blong Kingdom,” hem i talem se: “Gud nius ya, hemia se ol rabis fasin blong wol ya bambae oli finis mo kingdom blong Kraes i stanap.” Mo tu, Wajtaoa i talem wetaem bambae oli mekem wok ya, i se: “Yumi mas talemaot gud nius ya long ol yia  stat long Wol Wo Wan go kasem taem blong ‘bigfala trabol.’” Hem i gohed se: “Taswe naoia i stret taem blong talemaot gud nius ya long ol man blong ol giaman Kristin skul.”

13. Long yia 1921, ?Wajtaoa i talem wanem blong pulum ol tabu Kristin blong oli glad blong prij?

13 ?Olsem wanem? ?Bambae oli fosem ol man blong God blong oli mekem wok blong prij? Nogat. Wan haf long Wajtaoa blong namba 15 Maj 1921, we nem blong hem “Yu Mas Gat Strong Tingting,” i pulum ol tabu Kristin blong oli glad blong prij. Haf ya i talem se ol Kristin wanwan oli mas tingting long kwestin ya: “?Mi mi tingbaot wok blong prij olsem wan bigfala blesing, no mi ting se wok ya i wan wok we mi mas mekem nomo?” Magasin ya i gohed se: “Jeremaea i talem se ‘ol tok blong God i stap bon olsem faea insaed long tingting blong hem,’ ale hem i no save holem i blong hem nomo, hem i mas talemaot. Yu tu yu save gat tingting olsem Jeremaea, sipos yu tingbaot wok blong prij olsem wan bigfala blesing.” (Jer. 20:9) Ol gudfala tok ya i soemaot se Jehova mo Jisas tufala i trastem ol man we oli talemaot Kingdom.

14, 15. Long yia 1922, ?Wajtaoa i talem se ol tabu Kristin oli mas mekem wok blong prij olsem wanem?

14 ?Ol tabu Kristin oli mas mekem wok blong prij olsem wanem? Wajtaoa blong namba 15 Ogis 1922 we i tokbaot “Yumi Mas Prij,” i talem se ol tabu Kristin ‘oli mas karem ol buk i go long ol man long haos blong olgeta. Mo oli mas storian wetem olgeta long kingdom blong heven.’

15 I klia se stat long yia 1919, Kraes i yusum slef we i stret mo waes blong talem bakegen mo bakegen, se ol tabu Kristin we oli stap yet long wol, oli gat wan wok blong mekem we i wan bigfala blesing, hemia wok blong talemaot Kingdom. ?Ol Baebol Studen oli mekem wanem? ?Oli glad blong joen long wok ya blong talemaot Kingdom? Bambae yumi luk.

‘Ol Tru Kristin Oli Glad Blong Prij’

16. ?Wanem tingting blong sam elda taem oli harem se oli mas prij?

16 Long ol yia we oli kam biaen long 1920 mo 1930, samfala oli ting se i no olgeta tabu Kristin we oli mas prij. Wajtaoa blong namba 1 Novemba 1927 i tokbaot samting ya, i se: “I gat sam elda long jos [kongregesen] . . . we oli no pulum ol brata blong oli prij, mo olgeta tu oli no wantem prij. . . . Oli laf taem oli harem ol tok se oli mas prij long ol haos wanwan blong talemaot tok blong God, wetem King mo kingdom blong hem.” Magasin ya i talem stret se: “Naoia bambae yumi makem ol man olsem, mo yumi no moa joen wetem olgeta. Bambae oli no moa mekem wok blong elda.” *

17, 18. ?Plante brata mo sista oli mekem wanem, taem oli harem advaes blong slef we i stret mo waes? Long 100 yia we i pas finis, ?plante milian man oli mekem wanem?

17 Yumi glad se plante brata mo sista oli wantem tumas blong folem advaes blong slef we i stret mo waes. Wajtaoa blong namba 15 Maj 1926, i talem se: “Ol tru Kristin bambae oli glad  nomo . . . blong talemaot gud nius long ol man.” Ol gudfala brata mo sista ya oli mekem profet tok blong Ol Sam 110:3 i kamtru. Oli glad nomo blong mekem wok blong Mesaea we i King blong olgeta.

18 I mekem 100 yia nao we plante milian man oli glad nomo blong mekem wok blong talemaot Kingdom. Long sam narafala japta, bambae yumi tokbaot olsem wanem oli prij, i min se ol rod blong prij, mo ol samting we oli yusum blong prij. Mo bambae yumi tokbaot wanem frut i kamaot. Be fastaem, bambae yumi tokbaot from wanem plante milian man oli glad blong mekem wok blong prij mo givhan long ol narafala, nating se ol man raonabaot long olgeta oli tingbaot olgeta nomo. Taem yumi stap tokbaot samting ya, i gud yu tingbaot se, ‘?From wanem mi mi stap prij?’

‘Yufala i Mas Obei Long Kingdom Fastaem’

19. ?From wanem yumi folem advaes blong Jisas blong ‘obei long Kingdom fastaem’?

19 Jisas i talem long ol man blong hem se oli mas ‘lukaot gud blong obei long Kingdom fastaem.’ (Mat. 6:33) ?From wanem yumi folem advaes ya? From we yumi luksave se Kingdom i impoten. Hem i joen bigwan wetem stamba tingting blong God. Yumi luk finis long las japta, se sloslo tabu spirit i givim klia save long Kingdom. Taem save ya i kasem hat blong yumi nao yumi tinghevi long hem, bambae yumi lukaot gud blong obei long Kingdom fastaem.

Ol Kristin oli glad tumas blong kasem stret save blong Kingdom, olsem man we i faenem bokis mane (Yu luk haf 20)

20. ?Yumi lanem wanem long parabol blong bokis mane we man i faenem?

20 Jisas i save samting we ol man blong hem bambae oli mekem, taem oli kasem advaes ya blong obei long Kingdom fastaem. Hem i talem parabol blong wan bigfala bokis mane we man i haedem long wan pis graon. (Ridim Matiu 13:44.) Long parabol ya, wan wokman i faenem bigfala bokis mane ya, nao wantaem nomo hem i luksave se i sas we i sas. ?Hem i mekem wanem? Jisas i talem se, “hem i go salemaot olgeta samting we hem i gat, mo i kam pemaot pis graon ya i blong hem.” ?Yumi lanem wanem? Taem yumi kasem save long Kingdom mo yumi tinghevi long hem, yumi glad blong lego sam samting blong obei long Kingdom ya fastaem. *

21, 22. ?Olgeta we oli obei long Kingdom fastaem, oli mekem wanem? Yu tokbaot wan eksampol.

21 Olgeta we oli obei long Kingdom fastaem, oli no talem nomo se oli obei, be oli soemaot long ol aksen blong olgeta tu. Oli yusum laef blong olgeta, mo ol save blong olgeta, mo ol samting we oli gat, blong mekem wok ya blong talemaot Kingdom. Plante oli lego ol bigbigfala samting long laef blong olgeta, blong oli save mekem wok blong prij fultaem. Taem oli mekem olsem, oli luksave klia nomo, se Jehova i blesem man we i obei long Kingdom fastaem. Yu traem tingbaot brata ya Avery Bristow, mo woman blong hem Lovenia.

 22 Tufala i mekem wok blong colporteur long Amerika, stat long yia 1930. Plante yia afta, Lovenia i talem se: “Plante yia, mitufala i mekem wok blong paenia tugeta, mo mitufala i glad tumas. Samtaem mitufala i no gat mane blong pem kakae mo bensin. Be oltaem Jehova i mekem wan rod. Mitufala i jes gohed nomo long wok blong prij, ale mitufala i kasem ol samting we mitufala i nidim.” Lovenia i tingbaot wan taem we tufala i stap mekem wok blong paenia long taon ya Pensacola long Florida. Wan dei, tufala i no gat mane mo kakae. Be taem tufala i kamhom, tufala i sek long tu bigfala basket blong kakae, wetem wan smol leta we i talem se: “Kongregesen blong Pensacola i lavem yutufala.” Sista i tingting bak long olgeta yia we hem i prij fultaem, i se: “Jehova i no save lego man we i trastem hem. Hem i no save giaman long yumi.”

23. ?Wanem tingting blong yu long trutok blong Kingdom we yu faenem finis? ?Yu wantem tumas blong mekem wanem?

23 Laef blong yumi wanwan i defdefren. Taswe, yumi evriwan i no save mekem sem mak long wok blong prij. Nating se i olsem, yumi evriwan i save gat tingting ya se i wan bigfala blesing blong talemaot gud nius wetem olgeta paoa blong yumi. (Kol. 3:23) Yumi tinghevi long nambawan trutok blong Kingdom we yumi faenem finis. Yumi glad tumas, mo yumi wantem lego sam samting blong yumi save mekem bes blong yumi long wok blong prij. ?Olsem wanem? ?Yu yu gat tingting olsem?

24. ?Wanem wan long ol bigbigfala wok we Kingdom i stap mekem long ol las dei ya?

24 I mekem 100 yia nao we King Jisas i stap mekem profet tok blong Matiu 24:14 i kamtru. Be hem i no fosem ol man blong oli prij. Taem man i lego fasin blong wol ya we ol man blong hem oli tingbaot olgeta nomo, nao hem i kam wan man blong Jisas, hem i glad nomo blong prij. Wok blong prij long olgeta ples blong wol, hem i wan long ol bigbigfala wok we Kingdom i stap mekem long ol las dei ya.

^ par. 5 Baebol i yusum pijatok ya “wota blong naet,” taem i wantem soemaot se samting we hem i tokbaot i plante we i plante.—Jen. 27:28; Maeka 5:7.

^ par. 10 Traket ya To Whom the Work Is Entrusted (?Wok Ya i Stap Long Han Blong Hu?) i talem se: “Bambae yumi lego wan Golden Age long evri haos we yumi prij long hem. . . . Maet samfala oli wantem we yumi sanem ol niuwan long olgeta long postofis.” Long ol yia we oli kam biaen, ol brata oli askem long ol man sipos oli wantem kasem Golden Age mo Wajtaoa long postofis. Stat long namba 1 Februari, 1940, ol man blong Jehova oli givimaot ol magasin wanwan, mo oli raetem hamas magasin oli givimaot long ripot blong olgeta.

^ par. 16 Long taem ya, ol memba blong kongregesen oli vot blong putumap ol elda. Ale kongregesen i save mekem desisen se bambae oli no vot blong ol brata we oli no wantem prij. Long Japta 12, bambae yumi tokbaot we fasin ya i jenis, nao oli putumap ol elda folem rod we Baebol i talem.

^ par. 20 Jisas i soemaot samting ya bakegen long parabol blong bisnesman we i lukaot ol gudgudfala ston ya perel. Taem man ya i faenem wan perel we i nambawan, hem i salemaot evri samting we hem i gat blong pem perel ya. (Mat. 13:45, 46) Tufala parabol ya i tijim yumi long wan narafala samting tu. Samfala oli lukaot trutok, nao oli faenem. Sam narafala oli no lukaot, be oli harem samples mo oli kasem save se hemia nao trutok. Nomata se yumi kasem trutok olsem wanem, be yumi rere blong lego sam samting blong obei long Kingdom fastaem.