Go long ol haf insaed long hem

Go long lis blong ol haf

 CHAPTER 16

Yumi Joen Wanples Blong Mekem Wosip

Yumi Joen Wanples Blong Mekem Wosip

?JAPTA YA I TOKBAOT WANEM?

Olsem wanem ol miting oli jenis long ol yia we oli pas finis, mo from wanem oli impoten

1. Taem ol disaepol oli joen wanples, ?oli kasem wanem? ?From wanem oli nidim samting ya?

SMOLTAEM afta we Jisas i laef bakegen, ol disaepol oli kam wanples insaed long wan haos. Oli stap toktok gud long olgeta blong leftemap tingting blong olgeta. Be oli lokem doa from we oli fraet long ol enemi blong olgeta. !Nao wantaem nomo, Jisas i kamtru long olgeta, i talem se: “Kasem Tabu Spirit”! !Saye, fraet blong olgeta i lus! (Ridim Jon 20:19-22.) Long wan narafala taem, ol disaepol oli joen wanples nao Jehova i mekem tabu spirit i kam fulap long olgeta. !Long taem ya, oli kasem paoa blong mekem bigfala wok blong prij we oli mas mekem!—Ol Wok 2:1-7.

2. (1) ?Jehova i stap givim paoa long yumi olsem wanem? ?From wanem yumi nidim paoa ya? (2) ?Famle Wosip i impoten from wanem? (Yu luk futnot mo pej 175, “ Famle Wosip.”)

2 Yumi tu yumi stap kasem trabol we i klosap sem mak olsem ol brata blong yumi long taem blong Jisas. (1 Pita 5:9) Samtaem yumi fraet long man. Mo tu, yumi nidim paoa we Jehova i givim, blong yumi save gohed blong prij. (Efes. 6:10) Ol miting we Jehova i stanemap oli givim paoa ya long yumi. Yumi gat faef miting evri wik, hemia Pablik Tok, Wajtaoa Stadi, Baebol Stadi Blong Kongregesen, Tiokratik Skul mo Miting Blong Kingdom Wok.[1] Mo yumi gat fo spesel miting evri yia, hemia Asembli Blong Tri Dei, wetem tu Eria Asembli, mo Memoriol blong ded blong Kraes. ?From wanem i impoten blong go long ol miting ya? ?Ol miting oli jenis olsem wanem, stat long taem bifo i kam? Taem yumi glad blong go long ol miting, ?hemia i soemaot wanem?

?Yumi Mekem Miting From Wanem?

3, 4. ?Jehova i wantem se ol man blong hem oli mekem wanem? Yu talem sam eksampol.

3 Longtaem bifo, Jehova i talem long ol man blong hem se oli mas kam wanples blong mekem wosip. Long yia 1513 bifo Kraes, Jehova i givim Loa long neson blong Isrel. Loa ya i talem se oli mas holem Sabat dei evri wik, blong evri famle i mekem wosip mo i kasem tijing long Loa. (Dut. 5:12; 6:4-9) Taem ol man Isrel oli folem tok ya, ol famle oli joen gud, mo neson i strong blong mekem wosip long Jehova, mo wosip ya i klin.  Taem oli no moa folem Loa mo oli no kam wanples blong mekem wosip, Jehova i no moa glad long olgeta.—Lev. 10:11; 26:31-35; 2 Kron. 36:20, 21.

4 Yumi save tingbaot eksampol blong Jisas tu. Oltaem Jisas i stap go long haos prea long Sabat Dei. (Luk 4:16) Afta we Jisas i laef bakegen, ol disaepol blong hem oli gohed blong mekem ol miting, nating se oli no moa stap aninit long loa blong Sabat Dei. (Wok 1:6, 12-14; 2:1-4; Rom 14:5; Kol. 2:13, 14) Ol miting ya oli tijim olgeta, mo oli leftemap tingting blong olgeta. Mo tu, long ol miting ya, oli prea, oli givim ansa, mo oli singsing. Hemia i olsem we oli givim presen i go long God.—Kol. 3:16; Hib. 13:15.

Ol disaepol oli joen wanples blong leftemap tingting blong olgeta mo blong kam strong

5. ?Yumi mekem ol miting evri wik mo ol asembli evri yia from wanem? (Yu luk pej 176 tu, “ Yumi Joen Gud Long Ol Asembli.”)

5 Long sem fasin, yumi go long ol miting evri wik mo yumi go long ol asembli evri yia. Taem yumi mekem olsem, yumi soemaot se yumi obei long Kingdom blong God. Mo tu, yumi kasem paoa we tabu spirit i givim, mo yumi tokbaot bilif blong yumi blong leftemap tingting blong narafala. Samting we i moa impoten se, taem yumi prea mo yumi givim ansa mo yumi singsing, yumi stap mekem wosip long Jehova. Yumi no moa mekem miting long sem fasin olsem ol man Isrel mo ol fas Kristin. Be ol miting blong yumi oli impoten olsem ol miting blong olgeta. ?Ol miting oli jenis olsem wanem, stat longtaem bifo i kam?

“Yumi Lavlavem Yumi Mo Mekem Ol Gudfala Wok”

6, 7. (1) ?Ol miting oli blong wanem? (2) ?Ol grup oli mekem ol miting long sem fasin no olsem wanem?

6 Taem Brata Charles Taze Russell i stap traehad blong faenem trutok long Baebol, hem i kasem save se hem i mas joen  wetem ol narafala we olgeta tu oli stap traehad blong faenem trutok. Long yia 1879, Brata Russell i raetem se: “Mi, wetem sam narafala long Pittsburgh, mifala i stap joen wanples evri Sande, blong stadi gud long Baebol.” Hem i talem se olgeta we oli stap ridim Wajtaoa oli mas kam wanples blong mekem miting. Long yia 1881, oli stap mekem miting evri Sande mo Wenesde long Pittsburgh. Wajtaoa blong Novemba 1895 i talem se ol miting ya oli blong mekem “ol Kristin oli joen gud, oli lavlavem olgeta, mo oli fren gud.” Mo tu, olgeta we oli go long ol miting ya oli toktok gud long olgeta, blong leftemap tingting blong olgeta.—Ridim Hibrus 10:24, 25.

7 Long plante yia, ol grup blong ol Baebol Studen oli mekem ol miting long defdefren fasin. Sam grup oli mekem miting oltaem, be sam narafala oli mekem sam samtaem nomo. Long yia 1911, Wajtaoa i tokbaot wan grup long Amerika we ‘i mekem faef miting evri wik, mo samtaem i mekem moa.’ Grup ya i mekem miting long Mande mo Wenesde mo Fraede, mo i mekem tu miting long Sande. Long yia 1914, Wajtaoa i tokbaot wan grup long Afrika we ‘i mekem miting 2 taem long wan manis. Miting ya i stat long Fraede mo i gohed long Sarede mo Sande tu.’ Afta we sam taem i pas, plan blong ol miting i jenis, mo oli folem plan we yumi stap folem yet tede. I gud yumi tokbaot ol miting wanwan.

8. Taem oli jes stat blong mekem pablik tok, ?oli tokbaot wanem?

8 Pablik Tok. Wan yia afta we Brata Russell i stat blong printim Wajtaoa, hem i mekem wan trip blong prij long plante ples, olsem Jisas i bin mekem. Hemia long yia 1880. (Luk 4:43) Long trip ya, hem i statem fasin ya blong mekem ol Pablik Tok, olsem yumi mekem tede. Wajtaoa we i talemaot trip ya, i talem se Brata Russell “bambae i glad blong mekem ol pablik tok long ‘ol save we i joen wetem kingdom blong God.’” Long yia 1911, i gat ol grup mo kongregesen long plante kantri. Olgeta oli kasem advaes se i gud ol kongregesen oli sanem sam brata oli go long ol kongregesen raonabaot, blong oli givim sikis spesel pablik tok, long ol samting olsem jajmen dei mo sakrefaes blong Jisas Kraes. Long en blong wan tok, bambae oli talemaot nem blong nekis tok, mo nem blong brata we bambae i mekem long wik we i kam.

9. Long ol yia we oli pas, ?Pablik Tok i jenis olsem wanem? ?Yu save mekem wanem blong soemaot se yu tinghevi long miting ya?

9 Long yia 1945, Wajtaoa i talem se bambae i gat eit spesel Pablik Tok long olgeta ples long wol. Bambae oli tokbaot “ol bigfala problem long taem blong yumi.” Blong plante yia, slef we i stret mo waes i talem ol samting we oli mas tokbaot. Be samtaem, oli tokbaot samting we olgeta nomo oli jusum. Long yia 1981, samting ya i jenis. Ol brata oli mas folem nomo ol  plan blong pablik tok we kongregesen i gat.[2][10] Long sam pablik tok, brata i askem kwestin long olgeta we oli lesin, mo hem i save singaot samfala oli kam antap blong aktem wan samting. Be long yia 1990, samting ya tu i jenis, nao brata nomo i toktok. Wan narafala jenis i kamaot long Jenuware 2008. Ol pablik tok oli no moa 45 minit, be oli 30 minit nomo. I tru, fasin blong mekem ol pablik tok i jenis. Nating se i olsem, taem brata i rere gud, ol tok ya oli mekem bilif blong yumi i strong, mo oli tijim yumi long ol samting we i joen wetem Kingdom blong God. (1 Tim. 4:13, 16) ?Olsem wanem? ?Yu yu stap singaot ol visit blong yu mo ol narafala man, blong oli kam lesin long ol pablik tok?

10-12. (1) ?Wajtaoa Stadi i jenis olsem wanem? (2) ?I gud yumi wanwan i askem wanem?

10 Wajtaoa Stadi. Bifo, Wajtaoa Sosaeti i stap sanem ol brata oli go long ol kongregesen, blong oli givim ol tok mo lidim wok blong prij. Oli kolem ol brata ya se ol pilgrim. Long yia 1922, ol pilgrim oli talem se i gud sipos i gat wan miting oltaem blong stadi long Wajtaoa. Ale, ol kongregesen oli stat blong mekem Wajtaoa stadi long Sande no long wan narafala dei.

Wajtaoa Stadi long Gana long yia 1931

11 Wajtaoa blong namba 15 Jun 1932 i givim moa save long fasin blong mekem stadi ya. Hem i talem se wan brata i mas lidim miting ya, olsem oli mekem long Betel. Tri brata oli sidaon long ol jea long fored, blong oli ridim ol haf. Afta, brata we i lidim stadi i talem long evriwan we oli stap, blong oli askem sam kwestin. Long taem ya, i no gat ol kwestin long Wajtaoa. Afta, hem i askem long sam narafala blong oli ansa long ol kwestin ya. Sipos i no klia yet, hem i eksplenem “long tok we i sot mo i klia.”

 12 Fastaem, ol kongregesen wanwan oli jusum Wajtaoa we bighaf blong kongregesen oli wantem stadi long hem. Be Wajtaoa blong namba 15 Eprel 1933 i talem se, i moa gud we olgeta kongregesen oli stadi long sem Wajtaoa, hemia we i jes kamaot. Long yia 1937, ogenaesesen i talem se ol kongregesen oli mas mekem stadi ya long Sande. Wajtaoa blong namba 1 Oktoba 1942 i tokbaot sam moa jenis. Bambae i gat ol kwestin long botom blong pej, blong brata we i lidim stadi ya i askem. Miting ya i blong wan aoa nomo. Mo tu, olgeta we oli givim ansa oli no mas ridimaot plante toktok long Wajtaoa, be oli mas talemaot ansa “long prapa tok blong olgeta.” Yumi folem ol fasin ya yet tede. Mo Wajtaoa Stadi i stap yet olsem bigfala miting we slef we i stret mo waes i yusum, blong givimaot kakae long stret taem blong hem. (Mat. 24:45) I gud yumi wanwan i askem se: ‘?Mi mi rerem stadi blong Wajtaoa evri wik? ?Mi mi traehad blong givim ansa?’

13, 14. ?Baebol Stadi Blong Kongregesen i jenis olsem wanem? ?Yu yu laekem miting ya from wanem?

13 Baebol Stadi Blong Kongregesen. Afta long yia 1890, sam buk blong Millennial Dawn oli kamaot. Nao wan Baebol Studen long Baltimore long Amerika, nem blong hem Brata H.N. Rahn, i talem se i gud oli joen long ol grup blong stadi long buk ya (nem blong ol grup ya se Dawn Circles). Fastaem, oli mekem miting ya long haos blong ol brata, blong traem nomo. Long Septemba 1895, i gat grup olsem long plante taon long Amerika, ale Wajtaoa i talem se olgeta grup ya oli mas mekem stadi ya. Brata we i lidim stadi ya i mas rid gud. Hem i ridim wan ful toktok, nao hem i wet blong narafala i talem tingting blong hem. Oli gohed olsem gogo oli finisim wan haf, nao brata ya i ridim ol vas long haf ya. Taem oli finisim wan japta, olgeta evriwan long miting oli givim wan smol tok long samting we oli lanem.

14 Oli jenisim nem blong miting ya plante taem. Fastaem, oli jenisim i kam Ol Grup Blong Berea We Oli Mekem Baebol Stadi. Hemia from we long taem blong ol fas Kristin, ol man Berea nao oli ridim gud Baebol. (Wok 17:11) Afta, oli jenisim bakegen i kam Buk Stadi. Tede, yumi kolem Baebol Stadi Blong Kongregesen. Yumi no moa joen long ol smosmol grup long haos blong sam brata, be yumi evriwan i joen long Haos Kingdom. Yumi stadi finis long plante buk mo buklet, mo long sam haf blong Wajtaoa tu. Olgeta evriwan we oli stap oli save givim ansa. Miting ya i givhan bigwan long yumi blong yumi kasem ol dip save we i stap long Baebol. ?Olsem wanem? ?Yu yu rerem miting ya, mo yu givim ansa?

15. ?Tiokratik Skul i givhan olsem wanem long ol man blong God?

15 Tiokratik Skul. Brata Carey Barber, we bifo i wok long hedkwota long Brooklyn, i talem se: “Long Mande naet, namba  16 Februari 1942, oli askem long ol brata long Betel blong oli joen long Tiokratik Skul.” Brata Barber we i kam wan memba blong Hed Kampani, i talem se skul ya i “wan long ol niufala samting we oli soemaot se Jehova i stap lukaot gud long ol man blong hem long taem blong yumi.” Skul ya i givhan long ol brata blong oli kam gud moa blong tijim narafala mo long wok blong prij. Long yia 1943, oli stat blong sanem smol buk ya Course in Theocratic Ministry (Kos Blong Mekem Wok Blong God) i go long olgeta kongregesen long wol. Wajtaoa blong namba 1 Jun 1943 i talem se Tiokratik Skul i “trenem ol man blong God, blong oli kam gud moa long wok blong talemaot Kingdom.”—2 Tim. 2:15.

16, 17. ?Tiokratik Skul i tijim yumi blong yumi toktok gud nomo? Yu eksplenem.

16 Fastaem, plante oli luk se i had blong toktok long fored blong ol man. Clayton Woodworth i joen long Tiokratik Skul long yia 1943. Papa blong hem i bin stap long kalabus wetem  Brata Rutherford mo sam narafala long yia 1918. Clayton i talem se: “I had blong mi mi givim wan tok. Mi harem se tang blong mi i longfala tumas, maot blong mi i drae, mo voes blong mi i stap jenis, samtaem i strong olsem laeon, samtaem i smol olsem pijin.” Be sloslo, Clayton i kam gud, mo hem i gat blesing blong mekem plante pablik tok. Skul ya i tijim hem blong i toktok gud, mo i tijim hem tu se hem i mas gat tingting daon mo i mas dipen long Jehova. Clayton i talem se: “Sloslo mi luksave se man we i givim tok i no impoten. Sipos hem i rere gud mo i trastem Jehova, evriwan bambae oli glad blong lesin long hem mo bambae oli lanem samting.”

17 Long yia 1959, oli talemaot se ol sista tu oli save joen long Tiokratik skul. Sista Edna Bauer i harem nius ya long wan asembli. Hem i talem se: “Mi tingbaot we ol sista oli glad mo oli stap tokbaot samting ya. !Oli harem se hemia janis  blong olgeta!” ?Olsem wanem long yu? Nating se yu yu man no yu woman, ?yu tekem janis blong joen long Tiokratik Skul, blong Jehova i tijim yu?—Ridim Aesea 54:13.

18, 19. (1) ?Yumi stap folem wanem fasin yet blong mekem Miting Blong Kingdom Wok? (2) ?From wanem yumi singsing long ol miting? (Yu luk pej ya “ Singsing Blong Talemaot Trutok.”)

18 Miting Blong Kingdom Wok. Long yia 1919, oli stat blong mekem miting blong tokbaot ol plan blong prij. Olgeta long kongregesen we oli stap givimaot ol buk mo magasin, olgeta nomo oli kam long miting ya. Long yia 1923, oli stat blong mekem Seves Miting wan taem long wan manis (naoia yumi kolem Miting Blong Kingdom Wok). Oli talem long evriwan long kongregesen se i gud oli kam long miting ya. Long yia 1928, ol kongregesen oli stat blong mekem miting ya evri wik. Long yia 1935, Wajtaoa i talem long ol kongregesen se miting ya i mas stanap long save we i kamaot long pepa ya Director (we i jenis i kam Informant, mo naoia yumi kolem Kingdom Wok Blong Yumi). Smoltaem afta, evri kongregesen i mekem miting ya.

19 Yumi mekem Miting Blong Kingdom Wok long sem fasin we Kraes i mekem wetem ol man blong hem. Miting ya i givim advaes we yumi save folem taem yumi prij. (Mat. 10:5-13) Yu we yu stap kasem Kingdom Wok Blong Yumi, ?yu stadi long hem mo yu folem ol advaes long wok blong prij?

Miting We i Impoten Moa

Ol man blong God oli joen wan taem evri yia blong mekem Memoriol, olsem ol fas Kristin (Yu luk haf 20)

20-22. (1) ?Yumi mekem Memoriol blong ded blong Jisas from wanem? (2) ?Wanem gudfala samting we Memoriol i mekem long yu evri yia?

20 Jisas i talem long ol man blong hem se oli mas mekem Memoriol blong tingbaot ded blong hem, gogo hem i kamtru. Oli stap mekem Memoriol wan taem long wan yia, olsem Pasova bifo. (1 Kor. 11:23-26) Plante milian man oli kam long miting ya evri yia. Long taem ya, ol tabu man oli tingbaot bigfala blesing we bambae oli kasem blong rul wetem Jisas long Kingdom. (Rom 8:17) Mo miting ya i mekem se ol narafala sipsip oli gat bigfala respek long King blong Kingdom ya, mo oli wantem obei long hem.—Jon 10:16.

21 Brata Russell mo olgeta we oli joen wetem hem oli save se i impoten tumas blong mekem Kakae blong Masta, mo se oli mas mekem wan taem nomo evri yia. Wajtaoa blong Eprel 1880, i talem se: “Plante yia finis, yumi long Pittsburgh, yumi folem fasin ya blong . . . tingbaot Pasova [Memoriol]. Yumi kakae bred mo yumi dring waen, we oli saen blong bodi mo blad blong Masta.” Smoltaem biaen, oli joenem Memoriol wetem asembli. Long yia 1889, oli stat blong kaontem hamas man oli kam long ol asembli ya. Mo long sem yia, 225 man oli kam mo 22 oli baptaes.

22 Tede, yumi no moa joenem Memoriol wetem asembli. Be yumi singaot ol man long ples blong yumi blong oli joen  wetem yumi blong mekem Memoriol long Haos Kingdom, no long wan narafala ples we yumi rentem. Long yia 2013, bitim 19 milian man oli joen blong tingbaot ded blong Jisas. !Hem i wan bigfala blesing blong joen wanples blong mekem Memoriol, mo blong pulum ol narafala tu, blong oli joen wetem yumi long tabu naet ya! ?Olsem wanem? ?Yu yu glad blong joen evri yia long wok ya blong singaot ol man oli kam long Memoriol?

Taem Yu Kam Long Miting, ?Yu Soemaot Wanem?

23. ?Wanem tingting blong yu long ol miting?

23 Ol gudfala man blong Jehova oli no ting se i strong tumas blong obei long tok ya, se oli mas joen wanples oltaem blong mekem miting. (Hib. 10:24, 25; 1 Jon 5:3) King Deved i laekem tumas blong go mekem wosip long haos blong Jehova. (Sam 27:4) Mo hem i laekem tumas blong joen wetem ol narafala we oli lavem God, blong mekem wosip ya. (Sam 35:18) Yu traem tingbaot Jisas tu. Taem hem i pikinini yet, hem i wantem tumas blong go mekem wosip long haos blong Papa blong hem.—Luk 2:41-49.

Taem yumi glad blong go long ol miting, yumi soemaot se yumi tingbaot Kingdom olsem wan prapa gavman we i stap rul

24. ?Ol miting oli givhan long yumi olsem wanem?

24 Taem yumi kam long ol miting, yumi soemaot se yumi lavem Jehova. Mo tu, yumi wantem mekem ol brata mo sista blong yumi oli kam strong moa. Yumi soemaot se yumi wantem folem ol loa blong Kingdom blong God long laef blong yumi. Ol miting mo asembli nao oli tijim yumi blong yumi mekem olsem. Mo tu, ol miting oli tijim yumi blong yumi gat gudhan long impoten wok we Kingdom i stap mekem, hemia wok blong pulum ol man oli kam disaepol blong King Jisas, mo blong tijim olgeta. Ol miting oli givim paoa long yumi, blong yumi save stanap strong long wok ya. (Ridim Matiu 28:19, 20.) Tru ya, taem yumi glad blong go long ol miting, yumi soemaot se yumi tingbaot Kingdom olsem wan prapa gavman we i stap rul. !Oltaem yumi mas tinghevi long ol miting!

[1] Antap long ol miting blong kongregesen, famle i makemaot wan taem evri wik blong mekem famle wosip. Man we i stap hem wan i mekem prapa stadi blong hem.

[2] Long yia 2013, i gat bitim 180 defdefren plan blong ol pablik tok.