Go long ol haf insaed long hem

Go long lis blong ol haf

 JAPTA 17

Ol Man Blong Talemaot Kingdom Oli Kasem Trening

Ol Man Blong Talemaot Kingdom Oli Kasem Trening

?JAPTA YA I TOKBAOT WANEM?

Ol defdefren Baebol skul we oli trenem ol man blong talemaot Kingdom, blong oli mekem ol defdefren wok

1-3. ?Jisas i mekem wanem blong wok blong prij i kam bigwan moa? ?Wanem ol kwestin we bambae yumi tokbaot?

JISAS i prij 2 yia long Galili. (Ridim Matiu 9:35-38.) Hem i pas long plante taon mo vilej blong talemaot gud nius blong Kingdom, mo blong tijim ol man long ol haos prea. Long evri ples we Jisas i go long hem, fulap man oli kam long hem. Taswe hem i talem se: “I gat plante kakae tumas i stap long garen we i rere finis.” Yes, i nidim plante moa man blong prij.

2 ?Jisas i mekem wanem blong wok blong prij i kam bigwan moa? Hem i sanemaot 12 aposol, blong ‘oli go talemaot gud nius blong Kingdom blong God.’ (Luk 9:1, 2) Bifo we Jisas i sanemaot olgeta, oli wantem save olsem wanem bambae oli mekem wok ya. Ale, Jisas i mekem i sem mak olsem Papa blong hem long heven. Hem i trenem olgeta.

3 ?Jehova i trenem Jisas olsem wanem? ?Mo Jisas i trenem ol aposol olsem wanem? Tede, ?King Jisas i trenem ol man blong hem blong oli prij? Sipos yes, ?hem i mekem olsem wanem?

“Papa Blong Mi i Tijim Mi Finis”

4. ?Wetaem Jehova i tijim Jisas, mo long weples?

4 Jisas i talem klia se Papa blong hem i tijim hem, i se: “Mi mi stap talemaot ol samting ya nomo we Papa blong mi i tijim mi finis long hem.” (Jon 8:28) ?Wetaem Jehova i tijim Jisas, mo long weples? Jes afta we God i mekem fas Pikinini ya blong hem, hem i stat blong tijim hem. (Kol. 1:15) Pikinini ya i stap longlongtaem wetem Bigfala Tija Jehova long heven, i stap lesin long hem, mo i stap lukluk evri samting we hem i mekem. (Aes. 30:20) Papa blong hem i tijim hem long fasin we i nambawan. Ale Pikinini i kasem save long ol wok, mo ol fasin, mo ol plan blong Papa blong hem.

5. ?Jehova i tijim Pikinini blong hem long wanem samting?

5 Long stret taem, Jehova i tijim Pikinini blong hem long wok we bambae hem i mekem long wol. Yu traem tingbaot samting we profet Aesea i talem. (Ridim Aesea 50:4, 5.) Profet ya i talem se “evri moning” Jehova i mekem rere Pikinini blong hem blong tijim hem. Maet yumi tingbaot wan tija we i wekemap  studen blong hem evri moning blong tijim hem. Wan buk we i eksplenem Baebol i talem se: “Jehova i tijim Pikinini blong hem olsem wan tija i tijim ol pikinini long skul. Hem i tijim hem long ol tok we hem i mas talemaot, mo long fasin we hem i mas folem blong talemaot.” Yes, long “skul” long heven, Jehova i tijim Pikinini blong hem long ‘ol tok we bambae hem i talem.’ (Jon 12:49) Mo tu, Jehova i tijim Pikinini blong hem long fasin we hem i mas folem blong tijim ol narafala. * Taem Jisas i stap prij long wol, hem i folem trening we Papa blong hem i givim. Mo hem i trenem ol man blong hem tu, blong oli save tijim ol narafala.

6, 7. (1) ?Jisas i trenem ol aposol olsem wanem? ?From samting ya, oli naf blong mekem wanem? (2) ?Jisas i meksua se ol man blong hem tede oli kasem wanem trening?

6 Long stat blong japta ya, yumi talem se Jisas i trenem ol aposol blong hem. ?Hem i trenem olgeta olsem wanem? Long Matiu japta 10, hem i talem klia ol samting we oli mas mekem mo talem, taem oli go prij. Hem i talem weples oli mas prij (vas 5 mo 6), mo wanem tok we oli mas talemaot (vas 7). Hem i talem se oli mas trastem Jehova (vas 9 mo 10), mo i tokbaot samting we oli mas mekem taem oli mitim ol man (vas 11 kasem 13). Hem i talem tu, wanem we oli mas mekem taem man i no wantem lesin (vas 14 mo 15), mo taem man i mekem i nogud long olgeta (vas 16 kasem 23). * Gudfala trening ya i mekem se ol aposol oli naf blong lidim ol narafala, blong oli mekem bigfala wok blong talemaot gud nius.

7 ?Olsem wanem long taem blong yumi? Jisas we i King blong Kingdom blong God, i givim wan wok long ol disaepol blong hem we i impoten moa i bitim ol narafala wok. Oli mas talemaot ‘gud nius blong kingdom long olgeta ples long wol, blong oli witnes long hem long fes blong olgeta man.’ (Mat. 24:14) ?Olsem wanem? ?King ya i trenem yumi blong mekem impoten wok ya? !Yes! Nating se hem i stap long heven, be hem i meksua se ol man blong hem oli kasem trening blong oli save prij, mo blong oli mekem spesel wok insaed long kongregesen.

Oli Kasem Trening Blong Prij

8, 9. (1) ?Tiokratik Skul i blong wanem? (2) ?Tiokratik Skul i givhan long yu olsem wanem blong yu kam gud moa long wok blong prij?

8 Longtaem finis i kam, ogenaesesen blong Jehova i mekem ol asembli mo miting, blong trenem ol man blong God blong oli save prij. Wan long ol miting ya, hemia Miting Blong Kingdom Wok. Mo afta long yia 1940, ol brata long hedkwota oli mekemrere sam skul blong trenem yumi.

9 Tiokratik Skul. Long Japta 16, yumi luk finis se oli stat blong mekem Tiokratik Skul long yia 1943. ?Olsem wanem? ?Skul ya i trenem ol man blong God nomo blong oli givim ol gudfala tok long miting? Nogat. Long stat blong skul ya kam kasem naoia, hem i trenem olgeta blong oli yusum presen we  God i givim, blong presem hem long wok blong prij. Presen ya, hemia fasin blong toktok. (Sam 150:6) Skul ya i mekem ol brata mo sista oli naf blong talemaot Kingdom.

10, 11. ?Hu i save joen long Skul Blong Gilead? ?Skul ya i blong wanem?

10 Baebol Skul Blong Gilead. Oli stanemap skul ya long Mande namba 1 Februari 1943. Fastaem, skul ya i blong trenem ol paenia mo ol narafala we oli wok fultaem long wok blong God, blong oli mekem wok blong misinari long ol defdefren ples long wol. Be stat long Oktoba 2011, olgeta we oli tren long skul ya, hemia olgeta nomo we oli stap mekem wan spesel wok finis, olsem ol spesel paenia, ol eria elda mo woman blong olgeta, olgeta we oli wok long Betel, mo ol misinari we oli no tren yet long skul ya.

11 ?Skul Blong Gilead i blong wanem? Wan brata we i tij longtaem finis long skul ya, i talem se: “Ol brata mo sista we oli joen long skul ya oli stadi dip long Tok blong God blong mekem bilif blong olgeta i strong. Skul ya i tijim olgeta tu long ol gudfala fasin we bambae oli nidim, blong winim ol trabol long ples we oli go long hem. Mo tu, skul ya i mekem se oli wantem tumas blong talemaot gud nius.”—Efes. 4:11.

12, 13. ?Skul Blong Gilead i givhan olsem wanem long wok blong prij? Yu tokbaot samting we i hapen long Japan.

12 ?Skul Blong Gilead i givhan olsem wanem long wok blong prij? Stat long yia 1943 kam kasem naoia, 8,500 brata mo sista oli tren long skul ya. * Mo oli go mekem wok blong misinari long bitim 170 kantri. Oli yusum gud trening we oli kasem. Oli wok strong long wok blong prij, mo oli trenem ol narafala bakegen blong oli mekem sem mak. Long plante ples we i gat smol pablisa nomo, ol misinari oli lidim wok blong prij mo oli mekem i kam bigwan.

13 Yu traem tingbaot kantri blong Japan. Long Wol Wo Tu, klosap wok blong prij i stop. Long Ogis 1949, namba blong ol pablisa long Japan i no kasem 10. Be long en blong yia 1949, i gat 13 misinari we oli tren finis long Skul Blong Gilead, oli stap prij long Japan. Mo biaen, plante narafala misinari oli joenem olgeta. Fastaem oli prij long ol bigfala taon, mo afta, oli go long ol narafala taon. Ol misinari oli pulum ol man we oli stadi wetem olgeta, mo ol narafala tu, blong oli kam paenia. Hadwok blong olgeta i karem plante frut. !Naoia i gat bitim 216,000 man blong talemaot Kingdom long Japan! !Mo klosap stret haf blong olgeta oli mekem wok blong paenia! *

14. ?Ol skul we ogenaesesen blong Jehova i stanemap, oli soemaot wanem? (Yu luk pej 188 tu, “Ol Skul Blong Trenem Ol Man Blong Talemaot Kingdom.”)

14 Sam narafala skul. I gat Skul Blong Ol Paenia tu, wetem Skul Blong Ol Man Mo Woman Blong Olgeta, mo Skul Blong Ol Brata We Oli No Mared. Ol skul ya oli givhan finis long plante brata mo sista, blong oli fren moa wetem God, mo blong oli wok strong mo lidim ol narafala long wok blong talemaot gud nius. * Olgeta skul ya we ogenaesesen blong Jehova i stanemap,  oli soemaot se King blong yumi i stap trenem gud ol man blong hem blong oli naf blong finisim wok blong prij.—2 Tim. 4:5.

Trening Blong Mekem Spesel Wok

15. ?Ol brata we oli gat wok long ogenaesesen oli mas folem wanem fasin blong Jisas?

15 Yu traem tingting bak long tok blong profet Aesea. Hem i talem se God i tijim Jisas. Long “skul” ya long heven, Pikinini blong God i lanem wanem we ‘hem i mas talem, blong i save mekem olgeta we oli slak oli strong bakegen.’ (Aes. 50:4) Taem Jisas i stap long wol, hem i mekem samting ya we hem i lanem. Hem i givim spel long olgeta we oli “hadwok tumas,” mo hem i tekemaot ‘ol hevi samting we oli stap karem.’ (Mat. 11:28-30) Ol brata we oli mekem wok long ogenaesesen blong Jehova, oli mas folem fasin ya blong Jisas. Oli mas givhan long ol brata mo sista, mo mekem tingting blong olgeta i spel gud. Taswe, i gat ol defdefren skul blong givhan long ol brata ya, blong oli kam gud moa long wok blong lukaot long ol brata mo sista blong olgeta.

16, 17. ?Kingdom Ministri Skul i blong wanem? (Yu luk futnot tu.)

 16 Kingdom Ministri Skul. Oli mekem skul ya fastaem long namba 9 Maj 1959, long Saot Lansing long New York. Oli singaot ol elda we oli goraon blong visitim ol kongregesen wetem ol brata we oli lukaot long ol kongregesen, blong oli kam long skul ya blong wan manis. Afta, oli tanem kos ya i go long plante narafala lanwis, mo sloslo oli trenem ol brata long ol narafala ples long wol. *

Long yia 1970, Brata Lloyd Barry i tijim ol brata long Kingdom Ministri Skul long Japan

17 Long yia 1962, Yearbook of Jehovah’s Witnesses i tokbaot risen from wanem Kingdom Ministri Skul i stanap, i se: “Yumi evriwan i bisi. Taswe, man we i lukaot long kongregesen blong ol Witnes blong Jehova, i mas wan man we i folem wan gudfala plan. Olsem nao, bambae hem i gat taem blong lukaot long evriwan long kongregesen, nao bambae oli luk hem olsem wan blesing we Jehova i givim. Be hem i no mas fogetem prapa famle blong hem tu. Hem i mas gat stret tingting. Ol brata we oli lukaot long ol kongregesen long fulwol oli gat nambawan janis blong joen long Kingdom Ministri Skul. Skul ya i trenem olgeta, blong oli naf blong mekem wok we Baebol i talem  se man blong lukaot long kongregesen i mas mekem.”—1 Tim. 3:1-7; Taet. 1:5-9.

18. ?Kingdom Ministri Skul i givhan olsem wanem long olgeta man blong God?

18 Kingdom Ministri Skul i givhan long olgeta man blong God evriwan. ?Hem i givhan olsem wanem? Taem ol elda mo ol man blong givhan oli folem samting we oli lanem long skul ya, oli mekem tingting blong ol brata mo sista i spel, olsem Jisas i mekem. Yumi evriwan i glad taem wan elda no wan man blong givhan i toktok gud long yumi, i lesin long ol trabol blong yumi, no i kam luk yumi blong leftemap tingting blong yumi. (1 Tes. 5:11) !Ol brata ya oli olsem bigfala blesing long kongregesen!

19. ?Komiti We i Lukaot Long Wok Blong Tij i lukaot long wanem bakegen? ?Ol skul ya oli blong wanem?

19 Sam narafala skul. Komiti We i Lukaot Long Wok Blong Tij long Hed Kampani i lukaot long sam narafala skul tu, blong trenem ol brata we oli gat wok long ogenaesesen. Ol skul ya oli blong trenem ol elda long kongregesen mo ol elda we oli goraon blong visitim ol kongregesen, mo ol memba blong ol Branj Komiti, blong oli kam gud moa long wok blong olgeta. Ol kos ya we oli stanap long Baebol, oli pulum ol brata blong oli lukaot gud se bilif blong olgeta i stap strong oltaem, mo blong oli folem ol tok blong Baebol, taem oli givhan long ol sipsip we Jehova i putum long han blong olgeta.—1 Pita 5:1-3.

Hemia fas Ministeriol Trening Skul long Malawi, yia 2007

20. ?From wanem Jisas i talem se ‘Jehova i stap tijim’ yumi? ?Naoia, yu yu wantem mekem wanem?

20 Tru ya, Mesaea we i King i meksua se ol man blong hem oli kasem gudfala trening. Jehova i trenem Pikinini blong hem fastaem, nao Pikinini blong hem i trenem ol man blong hem. Taswe, Jisas i save talem se ‘Jehova i stap tijim’ yumi. (Jon 6:45; Aes. 54:13) I gud yumi yusum gud ol trening we King i givim long yumi. Hemia ol trening we yumi kasem long Tiokratik Skul, mo long ol narafala miting blong kongregesen, mo long ol narafala skul we yumi tokbaot long japta ya. Yumi no mas fogetem from wanem King i trenem yumi. Hem i wantem se yumi stap strong oltaem, nao bambae yumi naf blong finisim wok we hem i givim long yumi.

^ par. 5 ?Wanem i soemaot se Jehova i tijim Jisas, long fasin we hem i mas folem blong tijim narafala? Yu traem tingbaot: Wan profet tok we oli raetem plante handred yia bifo we Jisas i bon, i talemaot se bambae Jisas i yusum plante parabol blong tijim ol man. (Sam 78:2; Mat. 13:34, 35) I klia se, Jehova we i Stamba blong profet tok ya, i mekem plan longtaem finis, se Pikinini blong hem bambae i yusum ol parabol blong tijim ol man.—2 Tim. 3:16, 17.

^ par. 6 Plante manis afta, Jisas i trenem 70 narafala man mo i sanem olgeta oli go prij tutu.—Luk 10:1-16, futnot.

^ par. 12 Samfala oli gobak bakegen namba tu taem long Skul Blong Gilead.

^ par. 13 Sipos yu wantem save moa long ol frut we i kamaot long wok blong ol misinari we oli tren long Skul Blong Gilead, yu luk japta 23 blong buk ya Jehovah’s Witnesses—Proclaimers of God’s Kingdom (Franis mo Inglis).

^ par. 14 Naoia, i no moa gat Skul Blong Ol Man Mo Woman Blong Olgeta, mo Skul Blong Ol Brata We Oli No Mared. I gat wan narafala skul i tekem ples blong tufala, hemia Skul Blong Ol Man Blong Talemaot Kingdom.

^ par. 16 Samtaem Kingdom Ministri Skul i sot mo samtaem i longfala moa. Oli no mekem evri yia, be wanwan taem nomo. Stat long yia 1984, ol man blong givhan tu oli kasem trening long skul ya.