Go long ol haf insaed long hem

Go long lis blong ol haf

 JAPTA 19

Yumi Bildim Ol Haos Wosip Blong Givim Ona Long Jehova

Yumi Bildim Ol Haos Wosip Blong Givim Ona Long Jehova

?JAPTA YA I TOKBAOT WANEM?

Wok blong bildim ol haos wosip long fulwol i givhan long wok blong Kingdom

1, 2. (1) Longtaem finis i kam, ?ol man blong Jehova oli glad blong mekem wanem? (2) ?Be Jehova i glad moa long wanem samting?

LONGTAEM finis i kam, ol man blong Jehova oli glad blong bildim ol haos we oli leftemap nem blong God. Ol man Isrel bifo oli wok wetem fulpaoa blong olgeta blong bildim Haos Tapolen, mo oli givim plante samting blong bildim haos ya.—Eks. 35:30-35; 36:1, 4-7.

2 Be i no ol samting blong bildim haos we oli givim ona long Jehova, mo hem i no ting se ol samting ya oli impoten. (Mat. 23:16, 17) Jehova i glad moa long wosip we ol man oli mekem long hem, mo long hadwok we oli glad nomo blong mekem. Presen ya i givim moa ona long hem. (Eks. 35:21; Mak 12:41-44; 1 Tim. 6:17-19) I impoten blong tingbaot samting ya. ?From wanem? From we ol haos oli save kam roten mo oli lus. Tede, Haos Tapolen mo ol narafala haos blong God bifo, oli no moa stap. Be Jehova i no fogetem hadwok blong ol man blong hem. Mo hem i no fogetem se oli givim presen long gladhat blong olgeta, blong givhan long wok ya.—Ridim 1 Korin 15:58; Hibrus 6:10.

3. Long japta ya, ?bambae yumi tokbaot wanem?

3 Tede tu, ol man blong Jehova oli wok had blong bildim ol haos wosip. !Yumi sapraes long bigfala wok ya we King Jisas Kraes i lidim! I klia se Jehova i blesem hadwok blong olgeta. (Sam 127:1) Long japta ya, bambae yumi tokbaot sam nomo long ol haos wosip we ol man blong Jehova oli bildim finis. Mo bambae yumi tokbaot olsem wanem wok ya i givim ona long Jehova. Mo tu, bambae yumi ridim toktok blong samfala we oli mekem wok ya.

Oli Bildim Ol Haos Kingdom

4. (1) ?From wanem yumi nidim plante moa haos wosip? (2) ?From wanem oli klosem sam smol branj ofis mo oli muvum samfala i go long ol bigfala branj ofis? (Yu luk haf ya, “ Oli Bildim Ol Branj Ofis Mo Oli Mekem Sam Jenis.”)

4 Long Japta 16 blong buk ya, yumi luk we Jehova i talem se yumi mas joen wanples blong mekem wosip. (Hib. 10:25) Ol miting oli mekem bilif blong yumi i strong, mo tu, oli mekem se yumi wantem prij moa. Long ol las dei ya, Jehova i stap mekem wok blong prij i spid moa, nao plante handred taosen man  oli stap joen long ogenaesesen blong hem evri yia. (Aes. 60:22) Taswe yumi nidim plante moa faktri blong wokem ol buk, mo yumi nidim plante moa haos wosip.

5. ?From wanem nem ya Haos Kingdom i stret? (Yu luk haf ya tu, “ Jos Ya ‘Laet We i Saenaot.’”)

5 Ol Baebol Studen bifo oli luk se oli nidim ol prapa haos miting blong olgeta. I luk olsem se wan long ol fas haos miting we oli bildim, hem i stap long Wes Virginia long Amerika, long yia 1890. Stat long taem ya kasem yia 1930, oli bildim plante haos wosip, mo oli wokem gud plante moa bakegen. Be oli no putum wan nem long ol haos ya, oli singaot olgeta se ol haos miting nomo. Long yia 1935, samting ya i jenis. Brata Rutherford i go long Hawai blong luk wan niufala branj ofis, mo wan haos wosip we oli stap bildim. Nao ol brata oli askem long hem se: ‘?Bambae yumi singaot haos wosip ya long wanem nem?’ Brata Rutherford i talem se: “Wok blong yumi i blong talemaot gud nius blong Kingdom. Taswe, ?yufala i no ting se i gud blong singaot haos ya se ‘Haos Kingdom’?” (Mat. 24:14) I no  longtaem, oli stat blong singaot evri haos miting blong ol man blong Jehova, se Haos Kingdom.

6, 7. Afta we ol brata oli wokem wan rod blong bildim kwik ol Haos Kingdom, ?wanem i kamaot?

6 Afta long yia 1970, ol Witnes oli nidim plante moa Haos Kingdom. Ale, ol brata long Amerika oli wokem wan rod blong bildim kwik ol naes Haos Kingdom we oli stret long wosip blong yumi. Kam kasem yia 1983, oli bildim 200 Haos Kingdom olsem, long Amerika mo Kanada. Blong lukaot long wok ya, ol brata oli stanemap ol komiti long ol defdefren eria. Hemia i wok gud, ale long yia 1986, Hed Kampani i agri long fasin ya. !Long yia 1987, long Amerika nomo, i gat 60 komiti Blong Bildim Ol Haos Wosip! * Long yia 1992, i gat ol Komiti ya long plante narafala ples tu, olsem Ajentina, Franis, Japan, Jemani, Meksiko, Ostrelia, Saot Afrika, mo Spen. Ol brata we oli bildim ol Haos Kingdom mo Haos Asembli oli wok had. I gud yumi sapotem olgeta, from we oli stap mekem wan tabu wok blong God.

7 Ol Haos Kingdom ya we oli bildim hareap, oli givim bigfala witnes long ol man raonabaot. I gat wan stori long niuspepa long Spen, nem blong hem “Bilif i Save Muvum Ol Bigfala Hil.” Niuspepa ya i stap tokbaot wan Haos Kingdom we oli wokem long taon blong Martos. Hem i talem se: “Ol volontia oli aot long ol defdefren ples [long Spen], oli go long Martos blong bildim wan haos long sam dei nomo. Oli no wok olbaot, oli folem wan gudfala plan, mo wok we oli mekem i nambawan. Hemia i narakaen, long wol ya we ol man oli stap  tingbaot olgeta nomo.” Niuspepa ya i tokbaot from wanem ol Witnes oli olsem. Hem i talem tok blong wan volontia, se: “Samting ya i save hapen nomo, from we Jehova nao i stap tijim mifala.”

Oli Bildim Ol Haos Kingdom Long Ol Pua Kantri

8. Long yia 1999, ?Hed Kampani i agri long wanem niufala plan? ?From wanem oli mekem plan ya?

8 Long ol yia jes bifo long 2000, fulap man long ol pua kantri oli joen long ogenaesesen blong Jehova. Ol kongregesen oli mekem bes blong olgeta blong wokem ol haos miting. Be long sam kantri, ol man oli jikim ol Witnes mo oli tok agens long olgeta, from we oli no gat mane blong bildim ol naes haos wosip olsem ol narafala jos. Be long yia 1999, Hed Kampani i agri long wan niufala plan we i mekem se ol brata oli save bildim plante Haos Kingdom kwiktaem long ol pua kantri. Sam kantri we ‘oli gat plante samting oli givhan long olgeta we oli sot.’ (Ridim 2 Korin 8:13-15.) Mo plante brata mo sista oli go long ol narafala kantri blong givhan long wok blong bildim ol haos ya.

9. ?I luk olsem se wanem wok nao i bigwan tumas? ?Oli winim?

9 Wan ripot long yia 2001 i talem se oli mas wokem bitim 18,300 Haos Kingdom long 88 kantri we oli pua. I luk olsem se wok ya i bigwan tumas. Be taem King Jisas i lidim yumi mo tabu spirit i givim paoa long yumi, i no gat samting we i strong tumas. (Mat. 19:26) Taswe, folem niufala plan ya, long klosap 15 yia we i stat long 1999 kam kasem 2013, oli bildim 26,849 Haos Kingdom. * Jehova i stap gohed nomo blong blesem wok  blong prij. Taswe, long yia 2013 i gat 6,500 Haos Kingdom we oli mas bildim yet long ol pua kantri, mo long fiuja, bambae i nidim plante handred moa evri yia.

I no isi blong bildim ol Haos Kingdom long ol pua kantri

10-12. ?Wok blong bildim ol Haos Kingdom i leftemap nem blong Jehova olsem wanem?

10 ?Wok blong bildim ol Haos Kingdom ya i leftemap nem blong Jehova olsem wanem? Branj ofis long Simbabwe i raetem ripot ya se: “Wan manis afta we mifala i bildim wan niufala Haos Kingdom, namba blong ol man we oli kam long miting i dabol.” I luk olsem se long plante kantri ol man oli no wantem joen wetem yumi taem yumi no gat wan stret ples blong mekem wosip. Be taem yumi bildim wan Haos Kingdom, kwiktaem nomo oli fulumap, nao yumi mas wokem wan moa bakegen. Be i no ol naes haos nomo we oli pulum ol man oli kam long Jehova. Ol man ya oli wantem joen long ogenaesesen blong Jehova, from we oli luk se olgeta we oli bildim ol haos ya oli lavlavem olgeta. Yu traem ridim ripot we i kam long sam kantri.

11 Indonesia. Wan man i stap wajem ol Witnes we oli bildim wan Haos Kingdom. Nao hem i faenemaot se oli no stap kasem pei, oli wok fri nomo. Ale, hem i talem long olgeta se: “!Man, yufala i defren we! !Yufala i wok wetem fulhat blong yufala mo yufala i glad, be yufala i no kasem pei! !Mi mi luk se i no gat wan narafala skul we i olsem yufala!”

12 Yukren. Wan woman i stap pas evri dei long ples we ol man oli stap bildim wan bigfala haos. Hem i luksave se hemia ol Witnes blong Jehova we oli stap bildim wan Haos Kingdom. Hem i talem se: “Sista blong mi i joenem ol Witnes blong Jehova mo mi harem hem i tokbaot olgeta. Taem oli bildim haos ya, mi stap lukluk olgeta mo mi luk se oli lavlavem olgeta. Nao mi tu mi wantem joen long famle ya blong ol man blong God.” Woman ya i stadi Baebol mo long yia 2010 hem i baptaes.

13, 14. (1) ?Tok blong wan man wetem woman blong hem i soemaot wanem long yu? (2) ?Yu save mekem wanem blong haos wosip blong yufala i leftemap nem blong Jehova?

13 Ajentina. Wan man wetem woman blong hem, tufala i kam storian wetem brata we i lukaot long wok blong bildim wan Haos Kingdom. Man ya i talem se: “Mitufala i stap wajem gud yufala we i bildim haos ya, nao . . . mitufala tu i wantem kam long ples ya blong kasem save long God.” Nao hem i askem se: “?Mitufala i mas mekem wanem, blong mitufala i save joen long ol miting long haos ya?” Brata i askem long tufala sipos tufala i glad blong stadi Baebol. Tufala i talem se tufala i glad, wan samting nomo, se ol brata oli mas glad blong mekem stadi long ful famle. !Be hemia nao samting we ol brata oli wantem!

14 Maet yu no bin gat janis blong joen long wok blong bildim Haos Kingdom we yu yu stap go long hem. Be yu save mekem plante samting yet blong haos wosip ya i leftemap nem blong Jehova. Yu save singaot ol Baebol stadi mo visit blong  yu, wetem ol narafala man tu, blong oli kam long ol miting long Haos Kingdom. Yu save joen wetem ol narafala blong klinim mo fiksimap haos wosip ya. Yu save folem wan plan blong givim smol presen mane oltaem, blong givhan long Haos Kingdom blong yufala, no blong bildim ol Haos Kingdom long ol narafala ples long wol. (Ridim 1 Korin 16:2.) Olgeta wok ya oli leftemap nem blong Jehova.

Ol Man We Oli “Glad” Blong Wok

15-17. (1) Taem ol Witnes oli bildim ol haos wosip, ?hu i mekem plante wok? (2) Taem yu ridim ol tok blong ol brata mo sista we oli mekem wok ya, ?yu yu luksave wanem?

15 Taem ol Witnes oli bildim ol Haos Kingdom, ol Haos Asembli, mo ol branj ofis, ol manples nao oli mekem plante wok. Be sam brata mo sista blong narafala kantri we oli savegud wok blong bildim haos, olgeta tu oli kam givhan. Sam long ol volontia ya oli jenisim ol samting long laef blong olgeta, blong oli save kam wok blong sam wik. Sam narafala oli gohed blong mekem wok ya plante yia, long ol defdefren ples.

Timo mo Lina Lappalainen (Yu luk haf 16)

16 I no isi blong go wok long ol defdefren ples long wol, be olgeta we oli mekem oli harem gud tumas. I gat Timo mo Lina we tufala i go long sam kantri long Esia mo Yurop mo Saot Amerika, blong givhan blong bildim ol Haos Kingdom, Haos Asembli, mo branj ofis. Timo i talem se: “Long ol 30 yia we mi mekem wok ya, mi jenisim ples evri tu yia.” Lina we i maredem Timo 25 yia finis, i talem se: “Mi mi wok long ten defren kantri wetem Timo. Mitufala i mas lan long niufala kakae, defren weta, wan narafala lanwis, wan defren ples blong prij, mo ol niufala fren. Hemia i tekem taem, mo mitufala i mas traehad.” * ?Olsem wanem? ?Tufala i glad? Lina i gohed se: “Taem mitufala i traehad blong winim ol hadtaem, mitufala i kasem bigfala  blesing. Ol brata mo sista oli singaot mitufala i go long haos blong olgeta, mo mitufala i haremsave se oli lavem mitufala. Mitufala i haremsave tu se Jehova i lavem mitufala, mo i lukaot gud long mitufala. Mitufala i luk se promes we Jisas i mekem long ol disaepol blong hem long Mak 10:29, 30, i tru we i tru. Mitufala i gat plante handred brata mo sista mo mama, long ol defdefren ples long wol.” Timo i talem se: “Mitufala i harem gud tumas blong yusum save blong mitufala long wok ya. Hemia i givim ona long God, mo i mekem ol samting blong King Jisas i kam plante.”

17 Darren mo Sarah, tufala i givhan blong bildim ol haos wosip long Afrika, Esia, Saot Amerika, Saot Pasifik, Sentrol Amerika, mo Yurop. Tufala i talem se tufala i kasem moa, i bitim samting we tufala i givim. Nating se tufala i fesem sam hadtaem, be Darren i talem se: “Long tingting blong mitufala, i wan bigfala blesing blong wok wetem ol brata long ol defdefren ples long wol. Mi mi luk we taem yumi evriwan i lavem Jehova, hemia i olsem wan rop we i goraon long fulwol mo i joenem yumi.” Sarah i talem se: “!Taem mi wok wetem ol brata mo sista long ol kantri we fasin blong laef blong olgeta i defren, mi mi lanem plante samting! Mi luk we oli lego plante samting blong mekem wok blong Jehova. Hemia i mekem se mi mi wantem gohed nomo blong mekem bes blong mi long wok blong Jehova.”

18. ?Hu i mekem profet tok blong Ol Sam 110:1-3 i kamtru?

18 King Deved i talem profet tok ya se ol man we oli obei long Kingdom bambae oli “glad” blong mekem wok blong Kingdom, nating se oli fesem hadtaem. (Ridim Ol Sam 110:1-3.) Olgeta evriwan we oli stap wok blong sapotem Kingdom, oli stap mekem profet tok ya i kamtru. (1 Kor. 3:9) Naoia i gat plante branj ofis long wol, plante handred Haos Asembli, mo plante taosen Haos Kingdom. Ol haos ya oli soemaot se Kingdom blong God i wan prapa gavman we i stap rul. !Yumi kasem nambawan blesing blong mekem wok blong King Jisas Kraes, mo wok ya i givim bigfala ona long Jehova! !Hemia i stret nomo!

^ par. 6 Long yia 2013, bitim 230,000 volontia oli stap wok wetem 132 Komiti Blong Bildim Ol Haos Wosip long Amerika. Evri yia, ol komiti ya oli lukaot long wok blong bildim 75 niufala Haos Kingdom, mo oli wokem gud bakegen 900 narafala Haos Kingdom.

^ par. 9 Namba ya i soemaot nomo ol niufala Haos Kingdom we oli bildim long ol pua kantri, be i no long ol narafala kantri.

^ par. 16 Ol brata mo sista we oli kam long ol narafala kantri, oli yusum bighaf blong taem blong olgeta blong wokem ol haos wosip. Be long sapa mo long wiken, oli joen wetem ol kongregesen long wok blong prij.