Go long ol haf insaed long hem

Go long lis blong ol haf

 JAPTA 22

Kingdom i Mekem Samting We God i Wantem Long Wol

Kingdom i Mekem Samting We God i Wantem Long Wol

?JAPTA YA I TOKBAOT WANEM?

Kingdom i mekem olgeta promes blong God oli kamtru long ol man mo long wol

1, 2. (1) ?From wanem i no isi blong tingbaot se wan dei wol ya bambae i kam Paradaes? (2) ?Wanem i save mekem se yumi bilif strong long ol promes blong God?

WAN brata i kam insaed long haos miting. Yu luk se hem i taed, ating hem i fesem plante trabol long dei ya. Bos blong hem i strong tumas, mo i stap mekem i no stret long hem. Antap long hemia, brata ya i traehad blong lukaot gud long famle blong hem, mo i wari long woman blong hem we i sik. Be yu luk se hem i glad blong stap long Haos Kingdom wetem ol brata mo sista. Taem fas singsing i stat, fes blong hem i jenis. Singsing i tokbaot laef long Paradaes, mo i talem se yumi traem tingbaot we yumi stap finis long Paradaes. Brata ya i laekem tumas singsing ya. Ale, taem hem wetem famle blong hem oli singsing, hem i harem gud mo tingting blong hem i no moa trabol.

2 ?Samtaem yu yu harem olsem brata ya? Ating yumi evriwan i harem olsem. Laef long rabis wol ya i save mekem se, samtaem i no isi blong tingbaot se wan dei bambae wol i kam Paradaes. Naoia, ‘laef long wol ya i strong tumas,’ i no olsem paradaes nating. (2 Tim. 3:1) ?Wanem i save mekem se yumi tingbaot Paradaes ya olsem wan samting we i tru? ?From wanem yumi bilif se i no longtaem, Kingdom blong God bambae i rul long olgeta man? Bambae yumi tokbaot sam profet tok we oli kamtru long ol man blong Jehova bifo. Biaen, bambae yumi tokbaot olsem wanem ol profet tok ya mo plante narawan oli stap kamtru tede. Hemia bambae i mekem bilif blong yumi i strong. Afta, yumi save tokbaot olsem wanem ol profet tok ya bambae oli kamtru long fiuja.

Bifo, Jehova i Mekem Ol Promes Blong Hem Oli Kamtru

3. ?Wanem promes i mekem se tingting blong ol man Jiu we oli kalabus long Babilon, i no moa trabol?

3 Long ol yia 600 kasem 500 bifo Kraes, ol man Jiu oli stap kalabus 70 yia long Babilon. Plante long olgeta oli bon long ples ya, sem mak olsem papa mo mama blong olgeta. Laef blong olgeta i had. Ol man Babilon oli jikim olgeta from we oli bilif long Jehova. (Sam 137:1-3) Taem ol yia oli stap pas, ol man Jiu we oli holemstrong long Jehova oli stap putum tingting blong olgeta long wan samting nomo: Hemia promes blong Jehova se bambae hem i tekem olgeta oli gobak long ples blong olgeta. Mo Jehova i talem se laef blong olgeta bambae i gud we i gud. !Hem i talem tu se kantri  blong Juda bambae i kam paradaes, olsem garen blong Iden! (Ridim Aesea 51:3.) Ol promes ya oli mekem bilif blong ol man blong Jehova i strong, mo i mekem se tingting blong olgeta i no trabol. ?Samting ya i hapen olsem wanem? Bambae yumi tokbaot.

4. ?Jehova i talem wanem, blong mekem tingting blong ol man Jiu i strong se bambae oli stap sef long kantri blong olgeta?

4 Oli stap sef. Taem ol man Jiu oli gobak long ples blong olgeta, oli no luk wan paradaes. Kantri blong olgeta we i longwe long Babilon, i stap nating nomo blong 70 yia. Bighaf blong olgeta oli neva luk kantri ya. Mo tu, i gat ol laeon mo wael dog, mo leped, mo ol narafala wael anamol long ol kantri we Baebol i tokbaot. Taswe, maet wan papa i tingbaot se: ‘?Bambae mi mekem wanem, blong woman blong mi mo ol pikinini blong mi oli stap sef? ?Mo olsem wanem long ol sipsip mo buluk blong mi? ?Bambae mi blokem ol wael anamol olsem wanem?’ I stret nomo we ol man Jiu oli wari long ol samting olsem. Taswe, yumi save se promes blong God long Aesea 11:6-9 i mas mekem olgeta oli harem gud. (Ridim.) Ol gudfala toktok ya i mekem tingting blong ol man blong God i strong, se olgeta mo ol anamol blong olgeta bambae oli stap sef. Profet tok i talem se ol laeon bambae oli kakae gras, hemia i min se bambae oli no save kakae ol buluk blong olgeta. Bambae ol man oli no fraet long ol wael anamol ya. Jehova i promes se ol man blong hem bambae oli stap sef taem oli gobak long kantri blong Juda, nating se oli stap long open ples no long bus.—Esik. 34:25.

5. ?Wanem ol profet tok we oli mekem tingting blong ol man Jiu i strong, se Jehova bambae i givim plante samting long olgeta?

5 Oli gat plante samting. Ating oli stap wari from sam narafala samting tu: ‘?Mi wetem ol pikinini blong mi, bambae mifala i kakae wanem long Juda? ?Bambae mifala i gat wan haos? ?Bambae mifala i gat wok? ?Bambae i gud moa i winim we mifala i stap wok aninit long strong han blong ol man Babilon?’ Jehova i talem ol profet tok blong ansa long ol kwestin ya. Hem i promes se sipos ol man blong hem oli obei long hem, bambae hem i sanem ren i kam blong ‘mekem garen blong olgeta i karem plante kakae.’ (Aes. 30:23) Jehova i tokbaot haos mo wok blong olgeta tu, i se: “Man we i wokem haos blong hem, hem bambae i save stap gud long hem. Bambae i no moa gat narafala man i save kam tekemaot haos ya. Man we i planem plantesen blong grep, hem bambae i dring waen blong ol grep ya. Bambae i no moa gat narafala man i save kam stilim ol waen blong hem.” (Aes. 65:21, 22) Yes, laef blong olgeta bambae i gud we i gud. Bambae i defren long laef blong olgeta long hiten kantri ya Babilon. ?Be olsem wanem long slak fasin blong olgeta, we i mekem se oli go kalabus long Babilon?

6. ?Ol man blong God oli kasem wanem sik? ?Jehova i mekem wanem promes long olgeta?

6 Oli strong blong mekem wosip. Longtaem bifo we ol man blong God oli go kalabus long Babilon, oli kam slak long wosip blong olgeta. Jehova i yusum profet Aesea blong tokbaot sik ya, se: “!Olbaot long hed blong yumi, yumi evriwan i karekil finis! !Tingting blong yumi evriwan i foldaon finis!” (Aes. 1:5) I olsem we oli blaen mo sora blong olgeta i fas, from we oli no wantem harem ol advaes blong Jehova, mo oli no wantem luksave ol samting we hem i mekem blong givhan long olgeta. (Aes. 6:10; Jer. 5:21; Esik. 12:2)  Sipos ol man Jiu we oli gobak long ples blong olgeta oli gat sem sik, ?bambae oli stap gud? Nogat. Bambae Jehova i no glad long olgeta. Taswe, oli harem gud long promes ya blong Jehova se: “Long dei ya we bambae i kam, ol man we sora blong olgeta i fas, bambae oli save harem man i ridim buk, mo ol blaen man we oli bin stap long tudak, bambae oli openem ae blong olgeta, oli lukluk.” (Aes. 29:18) Yes, afta we ol man blong Jehova oli kasem panis mo oli tanem tingting blong olgeta, hem i mekem olgeta oli kam strong bakegen long wosip blong olgeta. Sipos oli gohed blong lesin mo obei long hem, bambae hem i lukaot gud long olgeta mo i givim ol save blong lidim olgeta.

7. ?Ol promes we God i mekem long ol man blong hem bifo, oli kamtru olsem wanem? ?From wanem samting ya i mas mekem bilif blong yumi i strong?

7 ?Olsem wanem? ?Jehova i holem ol promes blong hem? !Ol samting we i hapen i soemaot se Yes! Ol man Jiu oli gobak long ples blong olgeta, mo oli stap sef, oli kasem plante samting, mo oli kam strong bakegen blong mekem wosip. Jehova i blokem ol narafala neson we oli gat moa paoa, blong oli no kam spolem olgeta. Ol wael anamol oli no kakae ol buluk mo sipsip blong olgeta. I tru, paradaes we Aesea, mo Jeremaea, mo Esikel i tokbaot, i kamtru long olgeta long smol fasin nomo. Nating se i olsem, hemia stret samting we oli nidim long taem ya, mo i mekem olgeta oli glad tumas. Sipos yumi tingting gud long samting we Jehova i mekem long ol man blong hem bifo, bilif blong yumi bambae i kam strong moa. Sipos ol profet tok ya we oli kamtru long smol fasin oli gud tumas, ?bambae i olsem wanem taem oli kamtru long bigfala fasin? Naoia, yumi save tokbaot samting we Jehova i mekem long yumi tede.

Tede Jehova i Mekem Ol Promes Blong Hem Oli Kamtru

8. ?“Kantri” we ol man blong God tede oli stap long hem, i olsem wanem?

8 Tede ol man blong Jehova oli no wan prapa neson, mo oli no stap long wan kantri nomo. Be God i luk ol tabu Kristin olsem neson blong hem, hemia “Isrel blong God.” (Gal. 6:16, NTB) Olgeta wetem “ol narafala sipsip” oli joen gud long wan ogenaesesen blong mekem wosip long Jehova, olsem we oli stap long wan “kantri” nomo. Wosip ya i fasin blong laef blong olgeta. (Jon 10:16; Aes. 66:8) ?“Kantri” ya we Jehova i putum yumi long hem, i olsem wanem? Hem i olsem wan paradaes, from we yumi joen gud mo yumi gat pis. Long fasin ya, ol promes blong God se “kantri” ya bambae i olsem Iden, oli kamtru. Bambae yumi luk olsem wanem oli kamtru.

9, 10. (1) ?Tede, profet tok blong Aesea 11:6-9 i stap kamtru olsem wanem? (2) ?Wanem i soemaot se ol man blong God oli stap long pis?

9 Oli stap sef. Profet tok blong Aesea 11:6-9 i mekem wan naesfala pija long tingting blong yumi. Ol man wetem ol anamol blong vilej oli no fraet long ol wael anamol, mo ol wael anamol oli no fraet long man. ?Olsem wanem? ?Pijatok ya i kamtru long ol man blong Jehova tede? !Yes! Vas 9 i talem from wanem i no moa gat wan samting i save spolem yumi, i se: “Kantri ya bambae i fulap gud long ol man we oli savegud Hae God, olsem we solwota i fulap gud long ples blong hem.” ?Olsem wanem? ?Ol anamol oli naf blong ‘savegud Jehova’ mo jenisim fasin blong olgeta? Nogat. Ol  man nao oli stap jenisim fasin blong olgeta taem oli savegud Hae God Jehova, mo taem oli folem fasin blong hem blong mekem pis. Taswe, yumi luk se profet tok ya i kamtru long paradaes we God i putum yumi long hem tede. Ol man blong Kraes we Kingdom i rul long olgeta, oli stap lanem blong sakemaot ol fasin blong wael anamol. Oli stap long pis mo oli joen gud wetem ol Kristin brata mo sista blong olgeta.

10 Long buk ya, yumi tokbaot finis se yumi stap long pis from we yumi no joen nating long ol faet blong wol. Yumi tokbaot ol vas blong Baebol we desisen ya i stanap long hem, mo ol trabol we yumi kasem taem yumi folem desisen ya. Wol ya i raf we i raf, be bigfala grup blong ol man blong God oli no joen nating long ol faet blong wol, nating se oli save kasem panis blong ded. ?Yu no ting se hemia i wan samting blong sapraes? !Si! Mo i soemaot tu se olgeta we oli obei long King blong olgeta Jisas, oli gat pis ya we Aesea i tokbaot. Jisas i talem finis se bambae ol narafala oli luksave ol man blong hem from we oli lavlavem olgeta. (Jon 13:34, 35) Long kaen fasin, Kraes i stap yusum “slef ya we i stret mo waes” blong tijim ol tru Kristin, blong oli gat pis long ol kongregesen, oli lavlavem olgeta, mo oli kaen gud long olgeta.—Mat. 24:45-47, NW.

11, 12. ?Ol man blong wol oli hanggri olsem wanem? ?Jehova i stap mekem wanem, blong givim plante samting long ol man blong hem?

11 Oli gat plante samting. Ol man blong wol oli hanggri from stret save blong Baebol. Jehova i givim woning finis se: “I gat taem  i stap kam we bambae mi mekem we yufala i gat hadtaem blong kasem kakae. Bambae yufala i hanggri tumas, mo yufala i tosta tumas, be i no from wota. Long taem ya, bambae yufala i wantem tumas blong harem tok blong mi, olsem we man we i hanggri tumas i wantem kakae, mo man we i tosta tumas i wantem dring.” (Amos 8:11) ?Olsem wanem? ?Ol sitisen blong Kingdom blong God tu oli hanggri? Nogat. Jehova i talem long ol enemi blong hem se: “Bambae yufala i stap hanggri tumas, mo yufala i stap tosta, mo . . . bambae yufala i sem bigwan. Be ol man blong wok blong mi we oli stap mekem wosip long mi, mo oli stap obei long mi, bambae oli save kakae gud, oli save dring gud, mo bambae oli harem gud, oli glad.” (Aes. 65:13) ?Yu luk se ol tok ya i stap kamtru?

12 Yumi stap kasem ol save blong God, olsem wan bigfala reva we i stap kam dip moa. Ol buk, ol CD mo video, ol miting mo asembli, mo ol save long Websaet blong yumi, hemia ol save blong God we yumi kasem oltaem, olsem bigfala wota we i ron. Be ol man blong wol oli no gat save ya, oli stap tosta nomo. (Esik. 47:1-12; Joel 3:18) ?Yu yu glad tumas, taem yu kasem save ya we Jehova i givim, olsem we hem i promes? ?Yu yu stap kakae oltaem long tebol blong Jehova?

Long kongregesen, yumi kasem plante save blong Baebol we i olsem kakae, yumi stap sef, mo yumi strong blong mekem wosip

13. ?Yu yu luk promes blong Jehova i kamtru, se bambae hem i openem ae blong blaenman mo sora we i fas? Yu eksplenem.

13 Oli strong blong mekem wosip. Tede, ol man blong wol oli no luksave ol gudfala samting we Jehova i stap mekem, mo oli no haremsave tok blong hem. I olsem we oli blaen mo sora blong olgeta i fas. (2 Kor. 4:4) Be long olgeta ples long wol, Kraes i stap tekemaot sik ya long plante man. ?Olsem wanem? ?Yu yu luk sam blaenman we ae blong olgeta i open, mo sam man we sora blong olgeta i no moa fas? Sipos yu save wan man we i kasem save long trutok blong Baebol nao i sakemaot ol bilif blong giaman skul, yu yu luk promes ya blong God i kamtru, se: “Long dei ya we bambae i kam, ol man we sora blong olgeta i fas, bambae oli save harem man i ridim buk, mo ol blaen man we oli bin stap long tudak, bambae oli openem ae blong olgeta, oli lukluk.” (Aes. 29:18) Evri yia, plante handred taosen man we oli gat sik ya, oli stap kamgud. !Evri taem we wan man i kamaot long Bigfala Babilon mo i kam long paradaes we yumi stap long hem blong mekem wosip long Jehova, samting ya i soemaot se Jehova i stap mekem ol promes blong hem oli kamtru!

14. ?Bambae bilif blong yu i strong sipos yu tingting dip long wanem samting?

14 Olgeta japta blong buk ya oli soemaot gud se Kraes i putum ol man blong hem oli stap long wan paradaes long taem blong en. I gud yu tingting dip oltaem long ol blesing we yumi stap kasem long paradaes ya. Olsem nao, yu yu save bilif strong se ol promes blong Jehova bambae oli kamtru long fiuja.

“Plis, Yu Mekem Kingdom Blong Yu i Kam”

15. ?From wanem yumi save bilif strong se fulwol bambae i kam paradaes?

15 Stamba tingting blong Jehova i blong mekem fulwol i kam paradaes. Hem i putum Adam mo Iv long paradaes, mo i talem se  tufala i mas fulumap wol mo tufala i mas lukaot gud long ol anamol. (Jen. 1:28) Be tufala i joenem Setan blong agensem Jehova. From samting ya, olgeta pikinini blong tufala oli kasem sin mo ded. Be Jehova i no jenisim tingting blong hem. Taem hem i talem wan samting, ol tok blong hem oli mas kamtru fulwan. (Ridim Aesea 55:10, 11.) Yumi save bilif strong se ol pikinini blong Adam mo Iv bambae oli fulumap wol, mo bambae oli lukaot gud long evri samting we Jehova i mekem. Paradaes bambae i kavremap fulwol. !Long taem ya, ol profet tok blong paradaes we oli kamtru long ol man Jiu, bambae oli kamtru long fulwol! I gud yumi tokbaot olsem wanem bambae oli kamtru.

16. ?Bambae yumi stap sef long Paradaes? Yu eksplenem.

16 Oli stap sef. Gudfala pijatok ya long Aesea 11:6-9 bambae i kamtru long fulwol. Nomata se ol man, mo woman, mo pikinini, oli wokbaot i go wea, be bambae oli stap sef. Bambae i no gat wan man no wan anamol we i save spolem olgeta. Fulwol bambae i ples blong yu. Bambae yu save swim long olgeta reva, mo lek, mo solwota. Yu save krosem ol bigbigfala hil mo wokbaot long open ples we gras i grin gud, be bambae yu stap sef. Taem tudak i kam, bambae yu no fraet. Ol tok blong Esikel 34:25 bambae oli kamtru, se ol man blong God oli save ‘stap gud nomo long ol open ples, mo oli save slip gud olbaot long bus.’

17. ?Olsem wanem yumi save se Jehova bambae i givim plante samting long yumi, taem Kingdom i rul long fulwol?

17 Oli gat plante samting. Yu traem tingbaot taem ya we bambae olgeta man oli kasem gudfala kakae, i no moa gat puaman mo olgeta we oli hanggri, mo i no moa gat ol grup blong halpem ol man we oli sot long samting. King Jisas bambae i givim prapa kakae long ol man. Yumi save samting ya, from we hem i stap givim fulap save blong Baebol, we i olsem kakae, i go long yumi tede. Taem Jisas i stap long wol, hem i fidim plante taosen man wetem smol bred mo fis nomo. Hemia i soemaot se bambae hem i naf blong mekem ol promes blong Baebol oli kamtru. (Mat. 14:17, 18; 15:34-36; Mak 8:19, 20) Taem Kingdom i rul long fulwol, profet tok ya bambae i kamtru se: “Sipos yufala i go planem ol samting long garen, Hae God bambae i sanem ren i kam blong mekem oli gru gud, oli karem plante kakae bakegen, mo blong mekem ol gras i gru gud, blong ol anamol blong yufala oli gat fulap kakae blong olgeta.”—Aes. 30:23.

18, 19. (1) ?Wanem samting long profet tok blong Aesea 65:20-22, we yu yu wantem se i kamtru long yu? (2) ?Tok ya se “oli save stap longtaem, olsem tri we i save stap longtaem,” i minim wanem?

18 Plante man tede oli no gat wan naes haos mo gudfala wok we oli laekem. Long rabis wol ya, oli wok had be oli harem se oli no stap mekem laef blong olgeta mo famle blong olgeta i kam gud. Be ol rijman mo ol man we oli griri oli stap win. Yu traem tingbaot taem we bambae profet tok ya i kamtru: “Man we i wokem haos blong hem, hem bambae i save stap gud long hem. Bambae i no moa gat narafala man i save kam tekemaot haos ya. Man we i planem plantesen blong grep, hem bambae i dring waen blong ol grep ya. Bambae i no moa gat narafala man i save kam stilim ol waen blong hem. Ol man we bambae oli stap long ples ya, oli man blong mi we mi mi jusumaot olgeta finis, mo bambae oli save stap  longtaem, olsem tri we i save stap longtaem. Ol samting we olgeta oli hadwok long hem, bambae oli save harem gud long hem longtaem.”—Aes. 65:20-22.

19 ?Tok ya “oli save stap longtaem, olsem tri we i save stap longtaem,” i minim wanem? ?Yu yu stanap finis long stamba blong wan bigfala tri? Ating yu harem se yu yu smol tumas. Maet yu tingbaot se tri ya i stap finis taem ol olfala bubu blong yu oli bon, mo bambae i stap yet taem yu yu ded finis. !Be Jehova i promes se long Paradaes, bambae yumi laef longtaem olsem tri ya, mo bambae yumi stap long pis! !Tru ya, Jehova i kaen tumas! (Sam 37:11, 29) I gat taem i stap kam we bambae yumi luk ol tri we oli laef longtaem, olsem se laef blong olgeta i sot nomo. !Hemia from we laef blong ol tri ya bambae i finis, be yumi, bambae yumi laef gogo i no save finis!

20. ?Bodi blong olgeta we oli obei long Kingdom bambae i kam strong gud olsem wanem?

20 Bodi i strong gud. Tede sik mo ded i mekem se yumi stap laef aninit long wan blak klaod. Yumi evriwan i gat wan sik we yumi mas ded from, hemia sin. I gat wan samting nomo we i save winim sik ya, hemia sakrefaes blong Jisas we i pemaot yumi long sin mo ded. (Rom 3:23; 6:23) Taem Jisas wetem ol 144,000 oli rul blong 1,000 yia, bambae oli mekem ol blesing blong sakrefaes blong hem oli kasem olgeta man. Ale, sloslo ol man we oli obei long God bambae oli kam gud gogo oli no moa gat sin. Profet tok blong Aesea bambae i kamtru fulwan se: “Bambae i no moa gat man olbaot long kantri ya we i save talem se hem i sik, from we Hae God bambae i fogivim ol man blong ples ya, i tekemaot ol sin blong olgeta.” (Aes. 33:24) Yu traem tingbaot se bambae i no moa gat man we i blaen, man we sora blong hem i fas, mo man we leg blong hem i nogud. (Ridim Aesea 35:5, 6.) I no gat wan sik we bambae i had tumas blong Jisas i tekemaot, nomata se long bodi no long tingting. !Ol man blong obei long Kingdom bambae oli gat bodi we i strong gud!

21. ?Wanem bambae i hapen long ded? ?From wanem promes ya i mekem yu yu harem gud?

21 ?Be olsem wanem long ded, we i frut blong sin? Ded i “laswan blong ol enemi” blong yumi, mo i no gat wan man we i save blokem. (1 Kor. 15:26) ?Be enemi ya ded i save winim Jehova? Nogat. Yu luk ol tok ya blong Aesea se: “Hae God i Masta blong yumi, mo long taem ya, hem bambae i mekem we ded bambae i go lus olgeta. Bambae hem i ravemaot wota blong ae blong yufala.” (Aes. 25:8) Yu traem mekem wan pija long tingting blong yu: !Bambae i no moa gat dedman, i no moa gat beregraon, mo ol man bambae oli no moa krae from we man i ded! !Be bambae oli krae from glad, taem Jehova i mekem ol dedman oli girap bakegen, olsem we hem i promes finis! (Ridim Aesea 26:19.) !Olgeta trabol we ded i mekem long ol man, bambae i finis!

22. ?Olsem wanem Kingdom blong Mesaea bambae i finisim wok ya blong mekem samting we God i wantem long wol?

22 Long en blong 1,000 yia, Kingdom bambae i mekem finis ol samting we God i wantem long wol, nao Kraes bambae i lego paoa blong rul i gobak long Papa blong hem. (1 Kor. 15:25-28) Olgeta man bambae oli stret gud olgeta. Nao Setan bambae i kamaot long  bigfala hol we i stap kalabus long hem, mo bambae i traem ol man laswan. Afta long samting ya, Kraes bambae i smasem rabis snek ya blong bifo wetem ol man we oli folem hem. (Jen. 3:15; Rev. 20:3, 7-10) Be olgeta we oli lavem Jehova mo oli fas gud long hem, bambae oli gat wan gudfala fiuja. I no gat tok we i moa gud i winim ol tok ya blong Baebol blong eksplenem taem ya, se: “God bambae i mekem ol pikinini blong hem oli fri olgeta.”—Rom 8:21.

Kingdom bambae i mekem olgeta promes blong Jehova oli kamtru long ol man mo long wol

23, 24. (1) ?From wanem yumi save bilif strong se ol promes blong God bambae oli kamtru? (2) ?Yu yu gat strong tingting blong mekem wanem?

23 Ol promes blong Jehova oli no ol drim nomo. !Bambae oli kamtru, i no gat wan i save lus! ?From wanem yumi talem olsem? Yumi gobak long ol tok blong Jisas long fas japta blong buk ya, we hem i tijim ol man blong hem blong oli prea se: “Plis, yu mekem Kingdom blong yu i kam. Plis yu mekem samting we yu yu wantem i kamaot long wol, olsem we i kamaot long heven.” (Mat. 6:9, 10, NW) Kingdom blong God i no wan samting we i stap long tingting blong man nomo. !Hem i wan prapa gavman! Hem i stap rul naoia long heven. Wan handred yia finis, Kingdom ya i stap mekem ol promes blong Jehova oli kamtru long Kristin kongregesen. Yumi luk samting ya klia nomo. !Taswe, yumi save bilif strong se olgeta promes blong Jehova bambae oli kamtru long wol, taem Kingdom blong God i kam wetem olgeta paoa blong hem!

24 Yumi save se Kingdom blong God bambae i kam. Yumi save se evri promes blong Jehova bambae i kamtru. ?From wanem? !From we KINGDOM BLONG GOD I STAP RUL NAOIA! Kwestin we yumi wanwan i mas ansa long hem, se: ‘?Kingdom i stap rul long mi?’ I gud yumi mekem evri samting we yumi naf blong mekem naoia, blong obei long rul blong Kingdom. !Olsem nao, bambae yumi kasem ol blesing blong nambawan rul blong hem, gogo i no save finis!