Go long ol haf insaed long hem

Go long lis blong ol haf

 JAPTA 1

‘Plis, Yu Mekem Kingdom Blong Yu i Kam’

‘Plis, Yu Mekem Kingdom Blong Yu i Kam’

?JAPTA YA I TOKBAOT WANEM?

Jisas i tijim ol man long Kingdom blong God

1, 2. ?Jehova i talem wanem long trifala aposol blong Jisas? ?Ale, trifala i mekem wanem?

YU traem tingbaot sipos Jehova God hem wan i askem long yu blong yu mekem wan samting. ?Olsem wanem? ?Bambae yu mekem? !Ating bambae yu mekem kwiktaem nomo! Nomata wanem samting we Jehova i askem, bambae yu hareap blong obei.

2 Samting ya i hapen long Pita, mo Jemes, mo Jon, trifala aposol blong Jisas. (Ridim Matiu 17:1-5.) Hemia long yia 32. Lafet blong Pasova i pas finis. Trifala ya i stap wetem Jisas antap long “wan bigfala hil,” nao trifala i luk wan vison. Long vison ya, bodi blong Jisas i saen we i saen. Vison ya i soemaot taem ya we Jisas bambae i kam King long heven. Pita i no ting se hem i luk wan vison, ale hem i talem se bambae hem i wokem sam haos blong ol man we hem i stap luk olgeta. Taem hem i stap toktok yet, wan klaod i kam kavremap olgeta ya. Nao trifala aposol ya oli gat bigfala blesing blong harem wan samting we smol man nomo oli harem samtaem, hemia prapa voes blong Jehova. Jehova i talem se Jisas i Pikinini blong hem, mo i talem stret long trifala se: “Yufala i mas lesin gud long hem.” Trifala ya i mekem samting we Jehova i talem. Trifala i lesin gud taem Jisas i tijim trifala, mo trifala i pulum ol narafala blong oli mekem sem mak.—Wok 3:19-23; 4:18-20.

Jisas i tokbaot Kingdom blong God moa i winim ol narafala samting

3. ?From wanem Jehova i wantem se yumi lesin long Pikinini blong hem? ?Taswe i gud yumi stadi long wanem?

3 Jehova i pulum wan man blong i raetem tok ya long Baebol se, “yufala i mas lesin gud long hem.” Hem i mekem olsem blong givhan long yumi tede. (Rom 15:4) ?From wanem Jehova i wantem se yumi lesin long Jisas? From we taem Jisas i tijim ol man, hem i stap talemaot ol tok blong Jehova. Ol tok ya i givim save we Papa blong hem i wantem se yumi kasem. (Jon 1:1, 14) Oltaem Jisas i tokbaot Kingdom blong God. Hemia gavman blong God long heven. I gat Jisas mo 144,000 narafala man long gavman ya. Jisas i tokbaot Kingdom ya moa i winim ol narafala samting. Taswe, i gud yumi stadi long Kingdom ya. (Rev. 5:9, 10; 14:1-3; 20:6) Be fastaem, bambae yumi ansa long kwestin ya: ?From wanem Jisas i tokbaot Kingdom blong God oltaem?

 Tok Blong Yumi i Soemaot Samting We i Stap Long Tingting

4. ?Jisas i soemaot olsem wanem se hem i tinghevi long Kingdom?

4 Jisas i tinghevi long Kingdom blong God. ?Yumi save samting ya olsem wanem? Tok blong wan man i soemaot samting we i stap long tingting blong hem mo samting we i impoten long hem. Jisas i talem se: “Taem man i tok, hem i stap talemaot ol samting we tingting blong hem i fulap long hem.” (Mat. 12:34) Jisas i tekem evri janis blong tokbaot Kingdom. Long fofala Gospel, tok ya Kingdom i kamaot bitim 100 taem. Plante taem, Jisas nao i talem ol tok ya. Taem Jisas i prij, bigfala samting we hem i tokbaot, hemia Kingdom. Hem i talem se: “Mi mas go long ol narafala taon tu blong talemaot gud nius blong kingdom blong God, from we God i sanem mi blong mi mekem olsem.” (Luk 4:43, New World Translation) Afta we Jisas i laef bakegen, hem i gohed blong tokbaot Kingdom long ol disaepol blong hem. (Wok 1:3, NW) Yes, Jisas i tinghevi long Kingdom ya. From samting ya, hem i wantem talemaot long ol narafala.

5-7. (1) ?Wanem i soemaot se Jehova i tinghevi long Kingdom? Yu talem wan pijatok. (2) Sipos yumi tinghevi long Kingdom, ?bambae yumi mekem wanem?

5 Jehova tu i tinghevi long Kingdom. Yumi save samting ya from we Jehova nao i stamba blong evri samting we Pikinini blong hem i talem mo i tijim. Hem nao i sanem stret Pikinini blong hem i kam long wol. (Jon 7:16; 12:49, 50) Mo tu, Jehova i stamba blong fofala Gospel ya we oli tokbaot laef mo wok blong Jisas. Yu traem tingbaot wan pijatok.

I gud yumi wanwan i askem se: ‘?Mi mi tinghevi long Kingdom blong God?’

6 Yu stap putum ol foto blong famle blong yu oli go long wan albom. Be yu gat plante foto. Olgeta evriwan oli no save go long albom ya. ?Yu mekem wanem? Yu mas jusum sam nomo we oli impoten long yu. Ol Gospel oli olsem albom ya we i gat ol foto blong Jisas insaed. Long ol Gospel ya, oli no raetem evri tok we Jisas i talem mo evri wok we hem i mekem long wol. (Jon 20:30; 21:25) Spirit blong Jehova i pulum ol man blong oli raetemdaon sam nomo. Ol Gospel ya oli soemaot from wanem Jisas i prij, mo wanem samting i impoten long tingting blong Jehova. (2 Tim. 3:16, 17; 2 Pita 1:21) From we ol Gospel oli talem oltaem se Jisas i tijim ol man long Kingdom blong God, yumi save se Jehova i tinghevi long Kingdom ya. !Yes, Jehova i wantem se yumi kasem save gud long Kingdom!

7 I gud yumi wanwan i askem se: ‘?Mi mi tinghevi long Kingdom blong God?’ Sipos yes, bambae yumi lesin gud long ol tok we Jisas i talem taem hem i tijim ol man long Kingdom. Bambae yumi wantem save se: ?From wanem Kingdom i impoten? ?Wetaem bambae Kingdom i kam? ?Taem Kingdom i kam bambae i mekem wanem?

?Taem Kingdom i Kam Bambae i Mekem Wanem?

8. ?Wanem ol tok blong Lodsprea we i soemaot se Kingdom i impoten?

8 Yu traem tingbaot Lodsprea. Prea ya i soemaot se Kingdom i impoten tumas. Jisas i askem seven samting long prea ya. Tri long olgeta i tokbaot ol bigfala samting we Jehova bambae i mekem  i kamtru, mo trifala evriwan i joen. Faswan, se nem blong God bambae i tabu. Nambatu, se Kingdom blong God bambae i kam. Nambatri, se samting we God i wantem bambae i kamaot long wol olsem we i kamaot long heven. (Ridim Matiu 6:9, 10.) Bambae Jehova i yusum Kingdom ya blong mekem nem blong hem i tabu, mo blong mekem samting we hem i wantem i kamtru.

9, 10. (1) ?Taem Kingdom i kam bambae i mekem wanem? (2) ?Yu yu wantem tumas blong luk wanem promes blong Baebol i kamtru?

9 ?Taem Kingdom i kam bambae i mekem wanem? Taem yumi prea se, ‘Plis, yu mekem Kingdom blong yu i kam,’ yumi stap askem se Kingdom ya bambae i tekem aksen. Bambae Kingdom i soemaot ful paoa blong hem long wol ya. Bambae i spolem ol rabis fasin blong wol ya, wetem ol gavman blong man. Mo bambae i mekem se wol ya i kam niuwan we stret fasin nomo i stap long hem. (Dan. 2:44; 2 Pita 3:13) Biaen, Kingdom bambae i rul antap long wol mo i mekem wol ya i kam paradaes. (Luk 23:43, NW) Ol dedman we God i tingbaot olgeta, bambae oli laef bakegen blong joen bakegen wetem ol fren blong olgeta. (Jon 5:28, 29) Sloslo, ol man we oli obei long God bambae oli kam stret gud olgeta. Mo bambae oli laef gogo i no save finis. (Rev. 21:3-5) !Long taem ya nao, ol tok blong Lodsprea bambae i kamtru! !Samting we Jehova i wantem bambae i kamaot long heven mo long wol! ?Olsem wanem? ?Yu yu wantem tumas we ol promes ya blong Baebol oli kamtru? Yu mas tingbaot se, evri taem we yu prea blong Kingdom blong God i kam, yu stap askem long Jehova blong i mekem ol nambawan promes ya oli kamtru.

10 I klia se Kingdom blong God we yumi askem long Lodsprea, i no “kam” yet. Ol gavman blong man oli stap rul yet. Mo wol ya i no fulap long stret fasin yet. Be i gat wan gud nius, hemia se Kingdom ya i stanap finis. Bambae yumi tokbaot samting ya long nekis japta. Be fastaem yumi tingting gud long ol tok we Jisas i talem blong soemaot wetaem Kingdom bambae i stanap, mo wetaem bambae i kam.

?Wetaem Kingdom Blong God Bambae i Stanap?

11. ?Wanem rong tingting we sam disaepol blong Jisas oli gat?

11 Sam disaepol blong Jisas oli ting se bambae hem i stanemap Kingdom long taem blong olgeta nomo. Be Jisas i soemaot se i no stret taem yet. (Wok 1:6) Bambae yumi tokbaot tu parabol we Jisas i talem, faswan, maet long yia 31 taem ol tri oli stap karem flaoa, mo narawan, long yia 33.

12. ?Wanem ol tok long parabol blong gudfala sid mo rabis gras we i soemaot se Kingdom i no stanap long taem blong Jisas?

12 Parabol blong gudfala sid mo rabis gras. (Ridim Matiu 13:24-30.) Afta we Jisas i talem parabol ya long ol disaepol blong hem, hem i talem mining blong hem. (Mat. 13:36-43) Parabol ya mo mining blong hem i olsem: Taem ol aposol oli ded, Setan i planem rabis gras (hemia ol giaman Kristin), long medel blong ol gudfala sid (hemia ol Kristin we tabu spirit i makemaot olgeta). Ol gudfala sid oli mas gru wanples wetem rabis gras gogo kasem taem blong tekem kakae long garen, hemia klosap long “en blong  wol ya.” Long taem blong tekem kakae long garen, ol man oli katem rabis gras ya mo oli fasem long bandel. Afta, oli hivimap ol gudfala kakae. Parabol ya i soemaot se Kingdom i no stanap long taem blong Jisas. I mas gat taem i pas blong kakae i gru gud. Ale, long yia 1914, taem blong karem kakae i stat.

13. ?Jisas i talem wanem parabol blong soemaot se bambae hem i no kam king stret long taem ya we hem i go long heven?

13 Parabol blong ol man we oli holem mane blong masta. (Ridim Luk 19:11-13.) Jisas i talem parabol ya, long las taem we hem i stap wokbaot i go long Jerusalem, long yia 33. Sam man we oli stap lesin long Jisas, oli ting se bambae hem i stanemap Kingdom taem oli kasem Jerusalem. Jisas i wantem stretem tingting blong olgeta, mo i wantem soemaot se plante yia i mas pas fastaem, nao Kingdom bambae i jes stanap. Ale Jisas i talem se hem i olsem “wan haeman” we i mas wokbaot i go long “narafala kantri, blong oli putumap hem i kam king.” * Be Jisas i save se bambae hem i no kam king stret long taem ya we hem i go long heven. Hem i mas sidaon long raetsaed blong God fastaem, mo hem i mas wet long stret taem blong God i putumap hem. Hem i wet blong plante handred yia.—Sam 110:1, 2; Mat. 22:43, 44; Hib. 10:12, 13.

?Wetaem Kingdom Blong God Bambae i Kam?

14. (1) ?Jisas i ansa olsem wanem long kwestin blong fofala aposol? (2) Taem yumi luk saen ya we Jisas i talemaot, ?yumi save wanem?

14 Sam dei nomo bifo we Jisas i ded, fo aposol oli askem long hem se: “?Wanem saen bambae i soemaot se yu yu stap, mo se en blong rabis fasin blong wol ya i klosap?” (Mat. 24:3, NW; Mak  13:4) Blong ansa long olgeta, Jisas i talem profet tok we i stap long Matiu japta 24 mo 25. Jisas i tokbaot plante samting we bambae oli kamaot long fulwol, olsem wan saen we i soemaot se hem i stap. Kingdom bambae i stanap long stat blong taem ya we Jisas i stap. Mo Kingdom bambae i kam long en blong taem ya. Long yia 1914, ol samting we Jisas i talem long profet tok ya oli stat blong kamtru. * Ale yia 1914 nao i makem stat blong taem ya we Jisas i stap. Mo long sem yia ya, Kingdom i stanap.

15, 16. ?Jisas i stap tokbaot hu, taem hem i talem “ol man we oli stap laef naoia”?

15 ?Be wetaem stret bambae Kingdom ya i kam? Jisas i no talem stret dei. (Mat. 24:36) Be hem i talem samting we i soemaot se taem ya i klosap tumas. Hem i talem se “ol man we oli stap laef naoia” bambae oli luk ol saen ya, nao biaen Kingdom bambae i kam. (Ridim Matiu 24:32-34.) ?Jisas i stap tokbaot hu, taem hem i talem “ol man we oli stap laef naoia” (long Franis mo Inglis hemia generation)? Bambae yumi lukluk gud long tok ya blong Jisas.

16 “Ol man we oli stap laef naoia.” ?Olsem wanem? ?Jisas i stap tokbaot ol man we oli no gat bilif? Nogat. Yu traem tingbaot: ?Jisas i talem profet tok ya long hu? Hem i talem long sam aposol we oli kam luk hem ‘taem hem i stap sidaon hem wan.’ (Mat. 24:3) I no longtaem afta, tabu spirit i makemaot ol aposol. Yumi mas tingbaot tu, ol tok we Jisas i talem jes bifo we hem i tokbaot “ol man we oli stap laef naoia.” Hem i talem se: ‘Long fasin blong figtri, i gat wan samting blong yufala i lanem. Stret long taem ya we han blong hem i stat gru bakegen, mo ol niufala lif oli stat kamkamaot, yufala i save we i taem blong wokem garen blong yufala. Nao long sem fasin, taem yufala i luk saen ya, bambae yufala i save we mi, mi Pikinini blong Man, klosap mi kamtru, olsem we mi stap nomo long doa blong yufala.’ Taem ol man we oli no gat bilif oli luk saen ya, oli no kasem save long mining blong hem. Ol disaepol blong Jisas we tabu spirit i makemaot olgeta, olgeta nomo oli kasem save se Jisas ‘i stap long doa blong olgeta.’ Taswe, taem Jisas i tokbaot “ol man we oli stap laef naoia,” hem i stap tokbaot ol man blong hem we tabu spirit i makemaot olgeta.

17. ?Wanem mining blong tufala tok ya “ol man we oli stap laef naoia” mo “olgeta samting ya”?

17 “Bambae [ol man we oli stap laef naoia] oli no save ded evriwan, gogo olgeta samting ya i kamtru.” ?Wanem mining blong tok ya? Blong faenem ansa, yumi mas save mining blong tufala tok ya, “ol man we oli stap laef naoia,” mo “olgeta samting ya.” Taem yumi talem tok ya “ol man we oli stap laef naoia,” plante taem yumi stap tokbaot ol man we oli gat defdefren yia, be oli laef long semtaem. Taem ya we oli stap laef, i no longfala tumas, mo bambae i finis samtaem. (Eks. 1:6) Tok ya “olgeta samting ya,” i stap tokbaot olgeta samting we bambae i hapen long taem ya we Jisas i stap. Taem ya i stat long yia 1914 mo bambae i finis long taem blong “bigfala trabol.”—Mat. 24:21.

18, 19. ?Hu ya “ol man we oli stap laef naoia”? ?Yumi lanem wanem long japta ya?

18 Ale, ?hu ya “ol man we oli stap laef naoia”? Blong kasem save long tok ya, yumi mas tingbaot tu grup we tabu spirit i makemaot  olgeta. Fas grup i luk saen we i kamtru long yia 1914. Be olgeta long fas grup ya oli no ded evriwan yet, nao tabu spirit i makemaot sam narafala bakegen, hemia seken grup. Sam long seken grup ya nao bambae oli laef gogo bigfala trabol i stat. From we sam long fas grup oli laef yet taem tabu spirit i makemaot seken grup, yumi save talem se tugeta grup ya, oli “ol man we oli stap laef naoia.” *

19 Yumi tokbaot finis se, ol samting we oli olsem saen blong soemaot se Jisas i stap rul long Kingdom, oli stap kamaot long fulwol. Mo yumi luk se ol tabu man long seken grup ya oli olfala finis. Be sam long olgeta bambae oli laef yet taem bigfala trabol i stat. Ale ?yumi lanem wanem long japta ya? !Yumi lanem se i no longtaem nating, Kingdom blong God bambae i kam, mo bambae i rulum wol ya! !Yu traem tingbaot olsem wanem bambae yumi glad, taem yumi luk we tok blong Lodsprea i kamtru, se: “Plis, yu mekem Kingdom blong yu i kam”!

20. ?Long buk ya bambae yumi stadi long wanem? ?Long nekis japta, bambae yumi tokbaot wanem?

20 Yumi no mas fogetem tok ya we Jehova hem wan i talem, se: “Yufala i mas lesin gud long hem [Jisas].” Yumi, we yumi tru Kristin, yumi wantem tumas blong folem ol tok ya. Yumi intres bigwan long evri samting we Jisas i talem mo i tijim, blong eksplenem Kingdom blong God. Long buk ya, bambae yumi stadi long ol samting we Kingdom ya i mekem finis, mo ol samting we bambae i mekem yet. Long nekis japta, bambae yumi tokbaot ol samting we i hapen long heven taem Kingdom i stanap.

^ par. 13 Maet ol man we oli harem parabol ya, oli tingbaot wan pikinini blong King Herod, nem blong hem Archelaus. Bifo we King Herod i ded, hem i talem se Archelaus bambae i rul long Judia mo sam narafala ples. Be fastaem hem i mas mekem wan longfala trip i go long Rom, blong Sisa Ogastas i givim raet long hem blong rul.

^ par. 14 Blong faenem moa save, yu luk japta 9 blong buk ya ?Wanem Samting We Baebol i Rili Tijim?

^ par. 18 Fas grup i luk ol samting we oli kamtru long yia 1914, “olsem we woman i stat harem we bak blong hem i soa blong i bonem pikinini.” Eni man we tabu spirit i makemaot afta we evriwan long fas grup ya oli ded, hem i no wan long “ol man we oli stap laef naoia.”—Mat. 24:8.