Go long ol haf insaed long hem

Go long lis blong ol haf

Leta Blong Hed Kampani

Leta Blong Hed Kampani

Ol Gudfala Man Blong Talemaot Kingdom:

YU TRAEM tingbaot se yu yu stap long Betel long Brooklyn long yia 1914. Long Fraede moning, namba 2 Oktoba, yu kam sidaon long ples blong yu long tebol, blong dring ti. Nao wantaem nomo, doa i open mo Brata Russell i kam insaed. Hem i stanap smoltaem, nao i talem “gud moning” long evriwan. Be hem i no go sidaon long en blong tebol, olsem hem i mekem evri moning. Hem i klapem han blong hem, mo i talemaot nambawan mesej ya: “!Taem Blong Ol Man We Oli No Laen Blong Isrel, i finis! !Rul blong ol king blong olgeta i pas finis!” !Yu yu glad bitim mak! !Longtaem finis i kam, yu stap wet long samting ya! Yu wetem ol narafala long Betel, yufala i glad tumas, yufala i klapem han longtaem.

Brata Russell i talemaot nambawan tok ya plante yia finis. Stat long taem ya kasem naoia, Kingdom i mekem plante wok. Jehova i yusum  Kingdom blong trenem ol man blong hem sloslo, mo blong mekem olgeta oli kam klin. Long yia 1914, oli no plante, be namba i kam antap gogo naoia i gat klosap eit milian. ?Olsem wanem long yu? ?Yu kasem wanem gudfala samting from trening we Kingdom i givim?

Plante taem yumi harem ol brata oli tokbaot ogenaesesen blong Jehova se: “!Kat blong Jehova long heven i stap spid we!” Be samting we i tru se, stat long yia 1914 finis, kat ya i stap spid. Bambae yu luksave samting ya taem yu ridim buk ya. Ol man blong talemaot Kingdom oli yusum plante defren rod blong mekem gud nius i go long olgeta ples blong wol. Oli yusum niuspepa, oli wokbaot long rod wetem ol saen, oli soemaot ol sinema, oli yusum kad blong prij, mo gramafon, mo radio, mo Intenet.

Jehova i blesem wok ya, mekem se naoia yumi printim ol buk long bitim 670 lanwis. Mo yumi givimaot ol buk ya fri nomo. Mo tu, plante brata mo sista oli glad blong yusum taem mo paoa blong olgeta blong bildim ol Haos Kingdom, mo ol Haos Asembli, mo ol branj ofis. Oli mekem wok ya long ol rij kantri mo ol pua kantri tu, mo oli no kasem pei from. Mo taem i gat wan disasta, ol brata mo sista oli hareap blong go givhan long olgeta we oli stap long ples blong disasta. Oli soemaot se oli ol tru ‘brata we oli givhan long taem blong trabol.’—Prov. 17:17.

Samtaem ol lida blong skul mo sam narafala we oli agensem yumi, oli “mekem ol loa blong stanemap ol fasin nogud.” Be plante taem trabol we oli mekem long yumi i “givhan long wok blong gud nius blong Kraes.” Taem yumi luk samting ya, bilif blong yumi i kam strong moa.—Sam 94:20; Fil. 1:12.

I wan nambawan blesing blong wok wanples wetem yufala, we yumi evriwan i ‘man blong Masta.’ Yufala i mas save se mifala i lavem yufala evriwan. Jehova i mekem plante samting blong yufala i save kasem trutok mo joen wetem ogenaesesen blong hem. Mifala i prea se buk ya bambae i givhan long yufala moa, blong yufala i tinghevi long ol samting we hem i mekem.—Mat. 24:45.

Yufala i gohed gud,

Ol brata blong yufala,

Hed Kampani Blong Ol Witnes Blong Jehova