Go long ol haf insaed long hem

Go long lis blong ol haf

 JAPTA FIFTIN

Wosip We God i Agri Long Hem

Wosip We God i Agri Long Hem
  • ?God i glad long evri skul?

  • ?Olsem wanem yumi save luksave trufala skul?

  • ?Hu ya ol trufala man blong God long wol tede?

1. ?Wanem gudfala samting we yumi save kasem sipos yumi wosipim God long fasin we i stret?

JEHOVA GOD i kea bigwan long yumi, mo hem i wantem lidim yumi long stret rod. Sipos yumi wosipim hem long wei we i stret, bambae yumi hapi mo bambae yumi blokem plante trabol blong laef. Mo tu, God bambae i blesem yumi mo i halpem yumi. (Aesea 48:17) I gat plante handred skul we oli talem se oli tijim trutok long saed blong God. Be evriwan oli tijim samting we i defren, long saed blong God mo wanem we hem i wantem yumi blong mekem.

2. ?Olsem wanem yu save lanem stret rod blong wosipim Jehova? ?Mo wanem pijatok i save halpem yu blong kasem save long samting ya?

2 ?Olsem wanem yu yu save faenemaot stret rod blong wosipim Jehova? I no nid blong yu stadi mo skelem ol tijing mo bilif blong olgeta skul wanwan. Nogat. Yu mas lanem nomo wanem we Baebol i rili tijim long saed blong trufala wosip. I olsem pijatok ya. Long plante kantri, sam rabis man oli wokem giaman mane. ?Sipos oli givim wok long yu se yu mas faenemaot weswan mane i giaman mo weswan mane i tru wan, bambae yu mekem wok ya olsem wanem? ?Bambae yu traem lanem se evri giaman mane wanwan i luk olsem wanem? Nogat. Hemia i westem taem nomo. I moagud yu traem lanem se trufala mane i luk olsem wanem. Nao bambae yu save luksave kwiktaem nomo weswan i giaman. Long sem fasin, sipos yu lanem olsem wanem blong luksave trufala skul, ale bambae yu save luksave tu olgeta skul we oli giaman.

3. ?Jisas i talem se yumi mas mekem wanem sipos yumi wantem we God i glad long yumi?

3 I impoten tumas blong wosipim Jehova long wan wei we hem  i agri long hem. Plante man oli bilif se evri skul i stret long ae blong God, be Baebol i no tijim samting ya. Baebol i soemaot tu se i no naf blong talem nomo se yumi Kristin. Jisas i talem se: “I no olgeta man evriwan we oli stap singaot mi se ‘Masta, Masta’ we bambae oli save go insaed long niufala wol ya we God i king long hem. Man we i stap mekem ol samting we Papa blong mi long heven i wantem, hem nomo bambae i save go insaed.” Taswe, sipos yumi wantem we God i glad long wosip blong yumi, yumi mas faenemaot wanem samting nao we God i wantem yumi blong mekem, mo yumi mas mekem ol samting ya. Jisas i talem se olgeta we oli no wantem mekem ol samting we God i talem, oli “man blong mekem ol rabis fasin.” (Matiu 7:​21-23) Yumi no save pem wan samting wetem giaman mane, sem mak olsem we giaman skul tu i no save givim wan gudfala samting long yumi. Samting we i mowas yet se, giaman skul i save mekem we yumi lusum laef blong yumi.

4. ?Wanem mining blong tok blong Jisas long saed blong tufala rod? ?Mo wanwan long tufala rod ya i lidim man i go wea?

4 Jehova i givim janis long olgeta man long wol blong oli save kasem laef we i no save finis. Be, blong kasem laef ya long Paradaes, yumi mas wosipim God long rod we i stret mo yumi mas mekem laef blong yumi i laenap wetem ol samting we hem i wantem. Sore tumas, plante man oli no wantem mekem olsem. Taswe Jisas i talem se: “Yufala i mas pas long get ya we i smol nomo blong go insaed. From we get ya we i bigwan, mo rod ya we i isi nomo, hemia i blong go lus. Mo plante man oli stap folem rod ya. Be get ya we i smol nomo, mo rod we i strong, hemia i blong go kasem laef. Mo smol man nomo oli faenem.” (Matiu 7:​13, 14) Trufala skul i lidim man i go kasem laef we i no save finis. Giaman skul i lidim man i go blong lus nomo. Jehova i no wantem we wan man i lus, mo from samting ya hem i givim janis long ol man blong evri ples blong oli save hem. (2 Pita 3:9) Taswe, wei we yumi wosipim God i save givim laef no i save givim ded.

?OLSEM WANEM BLONG LUKSAVE TRUFALA SKUL?

5. ?Olsem wanem yu yu save luksave man we i folem trufala skul?

5 ?Olsem wanem blong faenem ‘rod we i go kasem laef’? Jisas i talem se bambae yumi luksave trufala skul from fasin blong laef  blong ol man we oli stap folem skul ya. Hem i se: “Bambae yufala i save makem olgeta long frut blong laef blong olgeta. . . . Gudfala tri, hem i save karem gudfala frut nomo.” (Matiu 7:​16, 17) Hemia i min se, yumi save luksave klia nomo hu ol man we i stap folem trufala skul from ol bilif blong olgeta mo from fasin blong olgeta. I no min se ol man long trufala skul ya oli stret gud olgeta. Oli stap mekem mastik tu, be olgeta evriwan oli mekemap wan grup blong man we oli wok strong blong mekem ol samting we God i wantem. I gud we naoia yumi luk sikis samting we i makemaot ol man blong trufala skul.

6, 7. ?Wanem tingting blong ol man blong God long saed blong Baebol? ?Olsem wanem Jisas i soem gudfala eksampol long saed ya?

6 Ol man blong God oli tijim samting we i stap long Baebol. Baebol hem wan i talem se: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin. Ol tok ya, God i givim blong bambae yumi ol man blong hem yumi save kam waes long olgeta samting, nao bambae yumi savegud ol rod blong mekem ol gudfala wok.” (2 Timoti 3:​16, 17) Aposol Pol i raet i go long ol Kristin brata blong hem i se: “Taem mifala i tekem tok blong God i kam long yufala, yufala i kasemgud. Yufala i no tekem olsem we i tok blong man nomo, yufala i kasemgud from we hem i tok blong God stret.” (1 Tesalonaeka 2:13) Taswe, ol bilif mo fasin blong trufala skul oli no stanap long tingting no kastom blong man nomo. Oli kamaot stret long Tok blong God, Baebol.

7 Jisas Kraes i soem stret eksampol. Ol tijing blong hem oli stanap long Baebol. Taem hem i prea long Papa blong hem long heven, hem i talem se: “Tok blong yu i tru olgeta.” (Jon 17:17) Jisas i bilivim Tok blong God, mo evri samting we hem i tijim i laenap wetem Baebol. Plante taem Jisas i talem se: “Baebol i talem se.” (Matiu 4:​4, 7, 10) Nao hem i talemaot wan vas blong Baebol. Long sem fasin, ol man blong God tede oli no tijim samting we i kamaot long tingting blong olgeta. Oli bilif se Baebol hem i Tok  blong God, mo olgeta tijing blong olgeta oli stanap strong long Baebol.

8. ?Man we i wosip long Jehova i mas mekem wanem?

8 Ol man long trufala skul oli wosip long Jehova nomo mo oli talemaot nem blong hem long narafala. Jisas i talem se: “Yu mas mekem wosip long Hae God [Jehova] we i God blong yu, mo bambae yu mas mekem wok blong hem nomo.” (Matiu 4:10) Taswe, ol man blong God oli no save wosipim wan narafala God be Jehova nomo. Wosip blong olgeta ya i minim tu se oli mas givim save long ol man se wanem nem blong trufala God mo wanem ol fasin blong hem. Ol Sam 83:18 (NW ) i talem olsem se: “Yu, we nem blong yu Jehova, yu nomo yu Hae God long olgeta ples long wol.” Jisas i soem rod blong halpem ol narafala blong save God, olsem hem i talem long prea ya blong hem se: “Mi mi stap talemaot nem blong yu long olgeta [man long wol ya] blong mekem olgeta oli save yu.” (Jon 17:6) Long sem fasin, ol trufala man blong God tede, oli tijim nem blong God long narafala, mo oli tijim olgeta long ol stamba tingting blong God, mo long ol fasin blong hem tu.

9, 10. ?Long wanem rod ol trufala Kristin oli lavlavem olgeta?

9 Ol man blong God oli gat trufala lav we i mekem se oli no tingbaot olgeta nomo. Jisas i talem se: “From we yufala i stap lavlavem yufala, bambae olgeta man oli luksave se yufala i man blong mi.” (Jon 13:35) Ol faswan Kristin oli lavlavem olgeta. Lav ya we i kamaot long God i halpem ol man blong oli no tingbaot kala blong skin, haenem, mo kantri blong man. Lav ya i joenem olkaen man oli kam olsem wan brata nomo we i no gat samting i save seraotem olgeta. (Kolosi 3:14) Ol man long ol giaman skul oli no gat fasin joen gud olsem wan brata nomo. ?Olsem wanem yumi save samting ya? Yumi save from we yumi luk se oli stap kilkilim olgeta i ded from defren kantri no defren laen. Ol trufala Kristin oli no karem ol tul blong faet blong kilim ol Kristin brata blong olgeta no eni narafala man. Baebol i talem se: “Fasin blong man i stap soemaot i klia, se hu i pikinini blong God, mo hu i pikinini blong Setan. Man we i no stap mekem ol fasin we i stret, no we i no lavem Kristin brata no sista blong hem, hem i no pikinini blong God, hem i pikinini blong Setan. . . . Yumi mas lavlavem  yumi. I nogud yumi kam olsem man ya Ken bifo. Hem i wan man blong Setan, nao hem i kilim brata blong hem i ded.”​—1 Jon 3:​10-12; 4:​20, 21.

10 Be, trufala lav i no minim nomo se yumi no kilim narafala man i ded. Lav ya i pulum ol trufala Kristin blong no tingbaot olgeta nomo, taswe oli yusum taem blong olgeta, paoa blong olgeta, mo mane no olting blong olgeta, blong givgivhan long olgeta mo lefleftemap tingting blong olgeta. (Hibrus 10:​24, 25) Oli givgivhan long olgeta long taem blong trabol, mo oli no save stil mo giaman long narafala. Tru ya, oli traehad blong mekem we laef blong olgeta i laenap wetem advaes ya blong Baebol we i talem se oli mas “mekem i gud long olgeta man.”​—Galesia 6:10.

11. ?From wanem i impoten blong bilif long Jisas Kraes olsem rod ya we God i yusum blong sevem ol man?

11 Ol trufala Kristin oli mas bilif se Jisas Kraes nao hem i rod ya we God i yusum blong sevem ol man. Baebol i talem se: “I no gat wan narafala man nating we i save sevem yumi, from we olbaot long wol ya, God i no givim nem blong wan narafala man nating long yumi, we hem i stap yusum blong sevem yumi.” (Ol Wok 4:12) Long Japta 5 yumi bin luk se Jisas i givim laef blong hem olsem wan ransom blong olgeta man we oli obei long God. (Matiu 20:28) Antap long hemia, Jisas i King ya we God i putumap long Kingdom blong heven. Hem nao we bambae i rulum wol ya. Sipos yumi wantem kasem laef we i no save finis, God i wantem we yumi obei long Jisas mo we yumi folem ol tijing blong hem long laef blong yumi. Taswe Baebol i talem se: “Man we i bilif long Pikinini ya blong God, hem i gat laef ya we i no save finis. Be man we i no save obei long Pikinini ya, hem bambae i no save luk laef ya samtaem.”​—Jon 3:36.

12. ?Fasin blong no joen long wol i minim wanem?

12 Ol trufala man blong God oli no joen long wol ya. Taem Jisas i stanap fored long Paelat we hem i wan haeman blong Rom, hem i talem se: “Kingdom blong mi i no blong wol ya.” (Jon 18:​36, NW ) Ol man blong Jisas oli stap aninit long Kingdom ya blong heven, nomata wanem kantri we oli stap long hem. From samting ya, oli no joen nating long bisnes blong politik long wol ya. Oli no tekpat long ol faet no raorao bitwin ol man. Be tu, ol man  blong Jehova oli no pusum nus blong olgeta long bisnes blong narafala man we i wantem joen long wan pati blong politik, no sipos i wantem kam kandidet long eleksen, no sipos i wantem go vot. Be nating se ol man blong God oli no joen long politik, oli respektem loa blong kantri. ?From wanem? From we Baebol i talem se oli mas “ona long gavman” mo long ol “bigman blong gavman.” (Rom 13:1) Be taem ol gavman blong man oli askem samting we i agensem wanem we God i wantem, ale long taem ya nomo, ol trufala man blong God oli folem eksampol blong ol aposol we oli  talem se: “Mifala i mas obei long God, mifala i no save obei long man.”​—Ol Wok 5:29; Mak 12:17.

13. ?Ol trufala man blong Jisas oli tingbaot Kingdom blong God olsem wanem? ?Ale from samting ya oli mekem wanem?

13 Ol trufala disaepol blong Jisas oli talemaot Kingdom blong God we hem nomo i save givim gudfala fiuja long man. Jisas i talem se: “Gud nius ya blong Kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.” (Matiu 24:​14, NW ) Ol trufala man blong Jisas Kraes oli talemaot Kingdom blong God we i stap long heven se hem nomo i save givim gudfala fiuja long ol man. Oli no pulum ol man blong lukluk i go long ol lida blong wol ya blong oli save stretem ol trabol blong wol. (Ol Sam 146:3) Jisas i tijim yumi blong prea from gavman ya we i stret gud olgeta, taem hem i se: “Letem kingdom blong yu i kam. Mekem ol samting we yu yu wantem oli kamaot long wol, olsem we oli kamaot finis long heven.” (Matiu 6:​10, NW ) Baebol i bin talem finis se Kingdom ya we i stap long heven, bambae i “flatemgud paoa blong ol narafala king [we oli rul naoia], nao bambae hem i rul oltaem gogo i no save finis.”​—Daniel 2:44.

14. ?Wanem skul we yu yu luksave klia se hem i kasem olgeta mak ya long saed blong trufala wosip?

14 Ale, folem olgeta samting ya we yumi jes tokbaot, i gud yu askem long yu wan se: ‘?Wanem skul we olgeta tijing blong hem i stanap long Baebol mo we i stap talemaot nem blong Jehova? ?Wanem skul i lanem fasin lav ya we i kamaot long God? ?Wanem skul we i bilif long Jisas, i no joen long wol, mo i talemaot Kingdom blong God olsem wan rod nomo blong kasem wan gudfala fiuja? ?Long olgeta skul long wol, weswan i gat olgeta mak ya?’ I gat plante pruf blong soem klia se hemia ol Witnes blong Jehova.​—Aesea 43:​10-12.

?BAMBAE YU YU MEKEM WANEM?

15. ?God i wantem we yumi mekem wanem moa, i bitim we yumi bilif nomo se hem i stap?

15 I no naf blong bilif nomo long God. Yes, Baebol i talem se ol devel tu oli bilif se God i stap. (Jemes 2:19) Be i klia se oli no stap mekem ol samting we God i wantem mo se God i no glad long  olgeta. Taswe sipos yumi wantem we God i glad long yumi, yumi mas bilif se hem i stap, mo tu, yumi mas mekem ol samting we hem i wantem. Antap long hemia, yumi mas kamaot long olgeta giaman skul mo joen long wosip ya we i tru.

16. ?Yumi mas mekem wanem long saed blong ol giaman skul?

16 Aposol Pol i soem se yumi no mas joen nating long giaman wosip. Hem i raetem se: “[God] i talem se, . . . ‘yufala i mas gowe long olgeta, yufala i mas stap yufala nomo, mo olgeta oli mas stap olgeta nomo. Yufala i no save tajem ol samting ya we oli no klin long fes blong mi, nao bambae mi mi glad blong tekem yufala.’ ” (2 Korin 6:17; Aesea 52:11) Taswe, ol trufala Kristin oli mas stap longwe long eni samting we i joen wetem giaman wosip.

17, 18. ?‘Bigfala Babilon’ i minim wanem? ?From wanem i impoten tumas blong “kamaot long hem” kwiktaem nomo?

17 Baebol i soem klia se olgeta giaman skul evriwan oli mekemap ‘Bigfala Babilon.’ * (Revelesen 17:5) Nem ya i mekem yumi tingbaot taon blong Babilon bifo, ples ya we giaman skul i stat afta long Bigfala Wota long taem blong Noa. Plante tijing mo fasin we oli stap naoia long ol giaman skul oli kamaot fastaem long Babilon. Ol man long Babilon bifo oli wosip long ol god we oli gat tri hed no we oli tri man long wan bodi nomo. Tede, plante skul oli stanap strong long tijing blong Triniti. Be tijing blong Baebol i klia nomo se i gat wan trufala God, hemia Jehova, mo se Jisas Kraes i Pikinini blong trufala God ya. (Jon 17:3) Ol man Babilon oli bilif se taem man i ded, i gat wan spirit we i kamaot long bodi blong hem, mo se maet spirit ya i go safa long wan ples blong faea. Tede tu, plante skul oli tijim se taem man i ded hem i gat wan spirit we i go samples mo oli bilif tu se spirit ya i save go long wan ples we oli kolem helfaea.

18 Wosip blong Babilon bifo i go kasem olgeta ples long wol. Taswe yumi save talem stret se Bigfala Babilon tede hem i pija blong olgeta giaman skul long wol. Mo God i talem finis se i no longtaem bambae ol giaman skul ya oli lus wantaem nomo. (Revelesen 18:8) ?Yu yu luksave from wanem i impoten we yu seraot  long Bigfala Babilon ya? Jehova God i wantem we yu “kamaot long hem” kwiktaem, bifo we i let tumas.​—Revelesen 18:4.

Sipos yu joen wetem ol man blong Jehova blong mekem wosip, bambae yu kasem plante moa samting i winim samting we yu lusum

19. ?Bambae yu kasem wanem sipos yu wosipim Jehova?

19 Taem yu tekem desisen blong no moa joen long ol giaman skul, maet i gat sam man we oli no moa wantem fren wetem yu. Be taem yu wosipim Jehova wetem ol man blong hem, bambae yu kasem samting we i gud moa i bitim wanem we yu lusum. Bambae yu gat plante Kristin brata mo sista, olsem ol faswan disaepol blong Jisas we olgeta tu oli lego plante samting blong folem Jisas. Bambae yu kam pat blong wan bigfala famle blong milian trufala Kristin raon long wol we oli lavem yu tru. Mo bambae yu gat nambawan hop ya blong laef olwe long “niufala wol ya we bambae i kam.” (Mak 10:​28-30) Maet biaen, olgeta ya we oli lego yu from we yu yu jenisim bilif blong yu, oli save kasem save ol tijing blong Baebol mo maet olgeta tu oli save kam man blong wosipim Jehova.

20. ?Wanem fiuja blong olgeta we oli stap long trufala skul?

20 Baebol i tijim se i no longtaem bambae God i finisim rabis wol ya blong Setan mo bambae i putum wan niufala wol long ples blong hem, we stret fasin nomo bambae i stap long hem. Kingdom blong hem nao bambae i rulum niufala wol ya. (2 Pita 3:​9, 13) !Wol ya bambae i nambawan tumas! Mo long niufala wol ya we stret fasin nomo i stap long hem, bambae i gat wan skul nomo, yes bambae i gat wan fasin blong wosip nomo. Yu yu waes sipos yu tekem desisen naoia blong joen wetem ol trufala man blong God.

^ par. 17 Blong save olsem wanem Bigfala Babilon i pija blong olgeta giaman skul long wol, plis lukluk Diksonari long pej 219-220.