Go long ol haf insaed long hem

Go long lis blong ol haf

 DIKSONARI

Profet Tok Blong Daniel i Talemaot Taem We Mesaea i Mas Kam

Profet Tok Blong Daniel i Talemaot Taem We Mesaea i Mas Kam

PROFET Daniel i laef bitim 500 yia bifo we Jisas i bon long wol ya. Be Jeova i givim sam save long Daniel we bambae i halpem ol man blong faenem stret taem we Jisas bambae i kam Mesaea no Kraes. Jeova i talem long Daniel se: “I gat wan samting we yu mas save mo luksave. I stat long taem ya we toktok i goaot blong oli stanemap mo wokem  Jerusalem i gud bakegen, i go kasem Lida ya, Mesaea, i mas gat seven wik, mo sikisti tu wik.”​—Daniel 9:​25NW.

Bifo we yumi faenem stret taem we Mesaea i kam, yumi mas save se bambae yumi kaontem ol yia ya i stat wetaem. Folem profet tok ya blong Daniel, yumi mas stat long “taem ya we we toktok i goaot blong oli stanemap mo wokem Jerusalem i gud bakegen.” ?Wetaem “toktok i goaot” blong oli bildim Jerusalem bakegen? Nehemaea we i raetem wan buk long Baebol, i talem se toktok ya we i talem se oli mas bildim bakegen stonwol raon long Jerusalem, i goaot long “taem ya we King Ataksekses i rul long Pesia, long namba twanti yia blong hem.” (Nehemaea 1:1; 2:​1, 5-8) Ol man we oli stadi long saed blong  histri, oli talem stret se yia 474 B.K.T. hem i olsem faswan ful yia we Ataksekses i rul. Taswe, namba 20 yia we hem i rul, hemia 455 B.K.T. Naoia yumi save se yumi mas kaontem ol yia blong profet tok blong Daniel stat long 455 B.K.T., blong faenem taem ya we Mesaea i kam.

Daniel i talem stret se hamas taem i mas pas go kasem we “Lida ya, Mesaea” i kam. Profet tok ya i tokbaot “seven wik, mo sikisti tu wik”​—hemia i mekem 69 wik evriwan. ?Sikisti naen wik ya i longfala taem olsem wanem? Sam defdefren Baebol oli soemaot se hemia i no ol prapa wik we i gat seven dei long wan, be hem i olsem ol yia. I minim se, wan wik i olsem seven yia. Ol Jiu long taem bifo oli savegud fasin ya blong kaontem ol yia long ol grup blong seven yia, nao oli kolem ol wanwan grup ya se wik. Eksampol, oli holem wan Sabat yia evri namba seven yia. (Eksodas 23:​10, 11) Taswe, profet tok ya long saed blong ol 69 wik i olsem 69 grup blong ol yia, we insaed long wanwan grup ya i gat 7 yia. Ale taem yu ademap olgeta yia ya tugeta, yu kasem 483 yia evriwan.

Naoia we mining blong ol wik ya i klia, i gud yumi ademap ol namba ya. Sipos yumi kaontem ol yia stat long 455 B.K.T., gogo kasem 483 yia i pas, bambae yumi foldaon stret long yia 29 K.T. !Long yia ya nao, Jisas i baptaes mo God i makemaot hem olsem Mesaea! * (Luk 3:​1, 2, 21, 22) Ating bilif blong yumi i strong moa taem yumi luk olsem wanem profet tok ya blong Baebol i kamtru stret.

^ par. 2 Stat long yia 455 B.K.T. go kasem yia 1 B.K.T. hemia 454 yia. Ale, stat long yia 1 B.K.T. kasem yia 1 K.T. hem i wan yia (from we i no gat yia namba siro). Mo stat long yia 1 K.T. go kasem yia 29 K.T. hem i 28 yia. Taem yumi ademap trifala namba ya tugeta, hemia 454 mo 1 mo 28, yumi kasem fulnamba blong 483 yia. Ol man “oli kilim [Jisas] i ded” long 33 K.T., hemia long medel blong namba 70 wik. (Daniel 9:​24, 26) Yu save luk buk ya Pay Attention to Daniel’s Prophecy! japta 11 (Franis mo Inglis), mo Insight on the Scriptures, Buk 2, pej 899-901 (Long Franis, Etude Perspicace, Buk 2, pej 995-997). Tufala buk ya tugeta, ol Witnes blong Jeova nao oli wokem.