Go long ol haf insaed long hem

Go long lis blong ol haf

 DIKSONARI

?Jisas i Bon Long Disemba?

?Jisas i Bon Long Disemba?

BAEBOL i no talem wetaem Jisas i bon. Be hem i givim klia pruf se Jisas i no bon long Disemba.

Tingbaot se weta i olsem wanem long manis Disemba long Betlehem, taon ya we Jisas i bon long hem. Long kalenda blong ol man Jiu, manis ya Kislef (we i laenap wetem Novemba/Disemba long kalenda blong yumi) hem i wan manis we i kolkol mo i ren plante. Manis we i kam afta, hemia Tebet (Disemba/Jenuware). Long manis ya, ples i kolkol moa, mekem se wanwan taem i save gat sno i foldaon antap long ol bigfala hil. I gud yumi luk wanem we Baebol i talem long saed blong weta long kantri ya.

Esra, wan man we i raetem Baebol, i soem se manis ya Kislef hem i wan manis we i kolkol mo i taem blong ren. Hem i tokbaot wan taem we ol man oli kam tugeta long wan miting long Jerusalem, hemia long “namba naen manis [Kislef], long namba twanti dei blong hem.” Nao hem i talem se olgeta man we oli kam long miting ya oli kolkol mo ‘oli stap seksek from we i gat bigfala ren.’ Yes, ol man ya we oli kam long miting ya oli stap harem nogud long weta blong manis ya oli se: “Mifala i no save gohed blong stanap long open ples  ya long bigfala ren olsem.” (Esra 10:​9, 13; Jeremaea 36:22) !Taswe, long manis Disemba, ol man blong lukaot long sipsip long kantri ya oli no stap afsaed long naet wetem ol sipsip blong olgeta!

Be, Baebol i soemaot se ol man blong lukaot long sipsip oli stap afsaed wetem ol sipsip blong olgeta long naet we Jisas i bon. Luk i raetem long buk blong hem long Baebol se long taem ya ol man blong lukaot long sipsip “oli stap [“oli laef,” NW ] afsaed long vilej, oli stap lukaot long ol sipsip blong olgeta, long naet” klosap long Betlehem. (Luk 2:​8-12) ?Yu makem tok ya “oli laef afsaed”? Hemia i soem se ol man blong lukaot long sipsip oli stap slip afsaed, oli no jes wokbaot olbaot long dei wetem ol sipsip blong olgeta. Oli stap wetem ol sipsip blong olgeta afsaed, long naet. ?Yu ting se oli save laef afsaed long Betlehem wetem ol sipsip blong olgeta sipos weta i kolkol mo i gat ren olsem long manis Disemba? Nogat. Ol samting ya oli soem se Jisas i no bon long Disemba. *

Tok blong God i talem stret taem we Jisas i ded, be i no givim plante save long saed blong taem we hem i bon. Hemia i mekem yumi tingbaot ol tok ya blong King Solomon se: “Sipos yu yu gat gud nem long fes blong ol man, hemia i gud moa long yu, i winim we yu putum gudfala senta ya we praes blong hem i antap tumas. Nao dei ya we bambae yu yu ded long hem, bambae hem i bigfala dei moa blong yu i winim dei ya we yu yu bon hem.” (Prija 7:1) Taswe, yumi no sapraes we Baebol i givim fulap save long saed blong wok blong Jisas long wol mo ded blong hem, be i no givim fulap save long saed blong taem we hem i bon.

Taem Jisas i bon, ol man blong lukaot long sipsip oli stap afsaed wetem ol sipsip blong olgeta long naet

^ par. 1 Blong save moa, ridim buk ya Reasoning From the Scriptures, pej 176-179 (long Franis, Comment Raisonner à partir des Ecritures, pej 161-165), we ol Witnes blong Jehova oli wokem.