Go long ol haf insaed long hem

Go long lis blong ol haf

 JAPTA SEVENTIN

Kam Klosap Long God Tru Long Prea

Kam Klosap Long God Tru Long Prea
  • ?From wanem yumi mas prea long God?

  • ?Yumi mas mekem wanem sipos yumi wantem we God i harem prea blong yumi?

  • ?God i yusum wanem rod blong ansa long prea blong yumi?

[Tok blong pija long pej 171]People praying in a variety of situations

God i save harem prea blong yu long enitaem

1, 2. ?From wanem yumi mas tingbaot prea olsem wan nambawan presen? ?Mo from wanem yumi mas save samting we Baebol i tijim long saed blong prea?

WOL ya i smol nomo taem yu skelem wetem ol milian milian sta long yunives. Tru ya, long lukluk blong Jehova we “hem i mekem heven mo wol,” olgeta man long wol ya oli olsem wan drop blong wota. (Ol Sam 115:15; Aesea 40:15) Nating se i olsem, Baebol i talem se: “Oltaem hem i stap klosap long olgeta we oli stap krae i go long hem, we hemia olgeta ya we oli wantem tru blong hem i givhan long olgeta. Olgeta we oli stap ona long hem, oltaem hem i stap givim ol samting long olgeta we oli sot long hem, oltaem hem i stap harem krae blong olgeta.” (Ol Sam 145:​18, 19) !Traem tingbaot samting ya! God ya we i gat olgeta paoa mo we i wokem evri samting, i stap klosap long yumi mo i rere blong lesin long yumi sipos yumi ‘wantem tru, blong hem i givhan long yumi.’ !Wan nambawan presen we yumi gat hemia se yumi save toktok wetem God long prea!

2 Be, sipos yumi wantem we Jehova i lesin long ol prea blong yumi, yumi mas prea long fasin we i stret long tingting blong hem. Blong mekem olsem, yumi mas lukluk fastaem se Baebol i tijim wanem long saed blong prea. I impoten we yumi save wanem  we Baebol i talem long saed blong prea from we prea i wan rod blong kam klosap long Jehova.

?FROM WANEM YUMI PREA LONG JEHOVA?

3. ?Wanem wan impoten risen from wanem yumi mas prea long Jehova?

3 Wan impoten risen from wanem yumi mas prea long Jehova, hemia se Jehova hem wan i askem yumi blong mekem olsem. Baebol, Tok blong God i talem long yumi se: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.” (Filipae 4:​6, 7) !Yumi no save ting nating long rod ya we Haefala Rula blong heven mo wol i wokem from yumi wetem kaen fasin!

4. ?Olsem wanem fasin blong prea oltaem long Jehova i mekem we yu yu fren gud moa wetem hem?

4 Wan narafala risen from wanem yumi mas prea, hemia from we taem yumi prea oltaem long Jehova, yumi fren gud moa wetem hem. Sipos yu yu gat wan fren blong yu, bambae yu toktok wetem hem oltaem, i no long taem ya nomo we yu wantem hem i givim samting long yu. Yu soem se yu intres long fren blong yu, mo  taem yutufala i tokbaot ol tingting blong yutufala mo ol samting we yutufala i ting se oli impoten, mo taem yutufala i serem filing blong yutufala, hemia i mekem we fasin fren blong yutufala i kam gud moa. Sam long ol samting ya yumi save mekem tu blong fren moa wetem Jehova God. Long buk ya we yu yu stap stadi long hem, ating yu lanem finis plante samting we Baebol i tijim long saed blong Jehova, ol fasin blong hem, mo ol samting we hem i wantem mekem. Ale sloslo God i no moa olsem wan strenja long yu. Prea i givim janis long yu blong talemaot ol tingting mo dip filing blong yu long Jehova, we i Papa blong yu long heven. Taem yu mekem olsem, yu kam klosap moa long hem.​—Jemes 4:8.

?WANEM FASIN WE YUMI MAS GAT?

5. ?Wanem i soem se Jehova i no stap lesin long olgeta prea?

5 ?Jehova i lesin long olgeta prea? Tingbaot tok ya we hem i talem long ol man Isrel we oli mekem stronghed long taem blong profet Aesea: “Nating we yufala i stap mekem plante prea, be bambae mi no save lesin, from we han blong yufala i fulap long blad blong man.” (Aesea 1:15) Yes, sam fasin blong yumi oli save mekem we God i no lesin long prea blong yumi. Taswe, sipos yumi wantem we God i harem ol prea blong yumi, yumi mas mekem fasin we hem i wantem.

6. ?Wanem impoten samting we yumi nidim sipos yumi wantem we God i lesin long ol prea blong yumi? ?Mo olsem wanem yumi kasem samting ya?

6 Wan impoten samting we yumi nidim, hemia bilif. (Mak 11:24) Aposol Pol i raetem se: “Sipos man i no bilif strong long God, hem i no save mekem God i glad long hem, from we sipos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.” (Hibrus 11:6) Taem yumi bilif, yumi save se God i stap mo yumi save se hem i harem mo i ansa long ol prea. Be bilif i no minim hemia nomo. Ol fasin blong yumi oli soemaot se yumi gat bilif. Yumi mas soemaot klia long fasin blong laef blong yumi evri dei se yumi bilif.​—Jemes 2:26.

7. (a) ?From wanem yumi mas gat respek taem yumi toktok long Jehova long prea? (b) ?Taem yumi prea long God, olsem wanem yumi save soem se yumi gat tingting daon mo tok blong yumi i kamaot long hat?

7 Jehova i wantem we ol man we oli prea long hem oli gat tingting  daon, mo we toktok blong olgeta i kamaot long hat blong olgeta. I klia nomo se yumi mas gat tingting daon taem yumi toktok long Jehova. Taem ol man oli go stanap fored long wan king no wan praeminista, oli soem respek from we oli luksave se lida ya i holem wan posisen we i hae moa long olgeta. ?Taswe olsem wanem long Jehova? !Yumi mas gat bigfala respek moa long hem taem yumi kam fored long hem! (Ol Sam 138:​6, NW ) Tru ya, Jehova i ‘God ya we i gat olgeta paoa.’ (Jenesis 17:1) Taem yumi prea long God, fasin blong yumi i mas soemaot we yumi luksave se yumi daon moa long hem. Tingting daon bambae i mekem se taem yumi prea, ol toktok blong yumi oli tru, oli kamaot long hat blong yumi. Yumi no talem bakegen mo bakegen ol semfala prea.​—Matiu 6:​7, 8.

8. ?Olsem wanem blong wok folem samting we yumi askem long prea?

8 Wan narafala samting we yumi mas mekem sipos yumi wantem we God i harem yumi, se yumi mas wok folem samting we yumi prea from. Jehova i wantem we yumi traem bes blong yumi, blong wok folem samting we yumi askem long prea. Olsem, sipos yumi prea se, “Plis yu givim kakae long mifala, i naf blong tede,” yumi mas rere blong wok had long wanem wok we yumi save faenem mo we yumi naf blong mekem. (Matiu 6:11; 2 Tesalonaeka 3:10) Sipos yumi prea long God blong i halpem yumi blong winim wan slak fasin, yumi mas lukaotgud blong no go long ol ples, no mekem sam samting, we oli save pulum yumi blong foldaon long ol trap. (Kolosi 3:5) Hemia nao ol stamba samting we yumi mas mekem blong God i harem prea blong yumi. Be i gat sam moa kwestin bakegen we yumi mas faenem ansa blong olgeta.

ANSA BLONG SAM KWESTIN LONG SAED BLONG PREA

9. ?Yumi mas prea i go long hu, mo prea blong yumi i mas pastru long hu?

9 ?Prea blong yumi i mas go long hu? Jisas i tijim ol man blong hem blong prea long ‘Papa blong yumi we i stap long heven.’ (Matiu 6:9) Taswe, ol prea blong yumi oli mas go nomo long Jehova God. Be, Jehova i wantem we yumi luksave wok blong stret Pikinini blong hem tu, Jisas Kraes. Yumi lanem finis long Japta 5 se God i sanem Jisas i kamdaon long wol blong givim laef blong hem olsem wan ransom we i save pemaot yumi long sin mo ded. (Jon 3:16; Rom 5:12) God i putumap Jisas blong mekem wok olsem Hae Pris mo Jaj. (Jon 5:22; Hibrus 6:20) Taswe Baebol i soem long yumi  se ol prea blong yumi oli mas pastru long Jisas. Jisas hem wan i bin talem se: “Rod ya, mi ya. Trutok ya, mi ya. Laef ya, mi ya. I no gat man i save kam long Papa blong mi, sipos mi mi no tekem hem.” (Jon 14:​6NTB) Sipos yumi wantem we God i harem ol prea blong yumi, yumi mas prea i go long Jehova nomo tru long Pikinini blong hem.

10. ?From wanem i no nidim wan spesel fasin taem yumi prea?

10 ?I gat wan spesel fasin blong prea? Nogat. Jehova i no talem se hem i wantem we yu sidaon no stanap olsem wanem no sipos yu mas joenem tufala han blong yu no olsem wanem. Nogat. Baebol i soemaot se taem ol man oli prea long God oli save sidaon, bodaon no nildaon, no oli save stanap nomo. I no rili gat wan spesel fasin blong mekem. (1 Kronikel 17:16; Nehemaea 8:6; Daniel 6:10; Mak 11:25) Be i gat wan samting we i moa impoten i bitim olkaen spesel fasin ya blong prea we ol narafala man oli save luk. Impoten samting ya hemia se tingting blong yumi i mas stret. Tru ya, evri dei taem yumi stap bisi long ol samting blong laef, no taem wan trabol i kamaot we yumi no bin tingbaot nating, yumi save mekem wan prea long tingting blong yumi nomo. Jehova i save harem ol prea ya nating se ol man raon long yumi oli no luksave se yumi stap prea.​—Nehemaea 2:​1-6.

11. ?Wanem sam samting we yumi nidim mo we yumi save askem long prea?

11 ?Yumi save prea from wanem samting? Baebol i talem olsem se: “Sipos yumi askem samting long [God] we i stret long tingting blong hem, hem bambae i harem prea blong yumi.” (1 Jon 5:14) Taswe yumi save prea from eni samting we i laenap wetem tingting blong God. ?God i wantem we yumi prea from samting we yumi wan i nidim? !Yes! Taem yumi prea long Jehova i olsem we yumi stap toktok long wan gudfala fren. Yumi save talemaot evri samting we i stap long hat blong yumi, mo ‘yumi save talemaot ol trabol blong yumi long hem’ tu. (Ol Sam 62:8) I stret nomo we yumi askem long hem blong i givim tabu spirit blong halpem yumi blong mekem samting we i stret. (Luk 11:13) Mo tu, yumi save askem hem blong lidim yumi blong mekem ol desisen we oli waes mo blong gat paoa blong stanap strong taem yumi fesem hadtaem. (Jemes 1:5) Taem yumi mekem wan sin, yumi save askem hem blong i fogivim yumi tru long sakrefaes blong Kraes.  (Efesas 1:​3, 7) Be hemia i no min se yumi prea nomo blong tokbaot samting we yumi nidim. I gud tu blong prea from ol narafala man, maet ol famle blong yumi mo ol Kristin brata sista blong yumi.​—Ol Wok 12:5; Kolosi 4:12.

12. ?Olsem wanem yumi soem long ol prea blong yumi se Papa blong yumi long heven i moa impoten bitim ol narafala samting?

12 Ol faswan samting we yumi mas tokbaot long ol prea blong yumi, hemia ol samting long saed blong Jehova God. Yumi mas presem hem mo talem tangkiu long hem wetem fulhat blong yumi from gudfala fasin we hem i soem long yumi. (1 Kronikel 29:​10-13) Prea blong Jisas we i stap long Matiu 6:​9-13, i tijim yumi blong prea se nem blong God i tabu. Hemia i min se yumi tinghae long nem ya. Nekis samting we hem i askem long prea ya hemia se Kingdom blong God i mas kam blong mekem wanem we God i wantem i kamaot long wol ya, olsem we i kamaot finis long heven. Afta we Jisas i talem ol impoten samting ya long saed blong Jehova, hem i jes tokbaot nid blong yumi long saed blong bodi. I gud yumi mekem sem mak. I gud sipos God nao i faswan man we yumi tingbaot long ol prea blong yumi. Long rod ya yumi soem se yumi no stap tingbaot yumi nomo.

13. ?Baebol i soem se ol prea we God i glad blong harem oli mas longfala olsem wanem?

13 ?Ol prea blong yumi oli mas longfala olsem wanem? Baebol i no talem stret se ol prea blong yumi oli mas longfala olsem wanem, nating se yumi prea fored long plante man no yumi wan nomo. Longfala blong olgeta i dipen long wanem we yumi wantem talem. Bifo we yumi kakae, maet yumi mekem wan sotfala prea nomo, be taem yumi talemaot ol wari mo trabol blong yumi long Jehova, maet yumi mekem wan longfala prea. (1 Samuel 1:​12, 15) Wan samting nomo we Jisas i tok agensem, hemia fasin we man i ting se hem i gud moa i winim narafala nao i stap mekem ol longlongfala prea long fored blong ol man blong mekem flas blong hem nomo. (Luk 20:​46, 47) Jehova i no intres long olkaen prea olsem. Samting we i moa impoten hemia se, taem yumi prea, toktok blong yumi i mas kamaot long hat. Taswe, longfala blong wan prea bambae i dipen nomo long nid we yumi wantem tokbaot mo ples we yumi stap long hem.

 

14. ?Baebol i minim wanem taem hem i talem se yumi mas “prea oltaem”? ?Mo from wanem i gud blong mekem olsem?

 14 ?I stret blong prea hamas taem evri dei? Baebol i talem se “yufala i mas prea,” mo “yufala i mas prea oltaem,” mo bakegen se “oltaem yufala i mas prea.” (Matiu 26:41; Rom 12:12; 1 Tesalonaeka 5:17) I tru, hemia i no min se yumi mas stap prea long Jehova evri minit long wan dei. Nogat. Baebol i wantem pulum yumi nomo blong prea oltaem. I gud yumi talem tangkiu oltaem long Jehova from we hem i mekem i gud tumas long yumi. I gud yumi lukluk i go long hem blong i lidim yumi, i leftemap tingting blong yumi, mo i givim paoa long yumi. Yumi mas glad we Jehova i no putum mak se prea blong yumi i mas longwan olsem wanem mo i no talem stret se hamas taem yumi save toktok wetem hem evri dei. Sipos yumi rili gat tangkiu from nambawan rod ya prea, bambae yumi tektaem oltaem blong prea long Papa blong yumi long heven.

15. ?From wanem yumi mas talem “Amen” long en blong prea blong yumi wan no prea we yumi mekem wetem plante man?

15 ?From wanem yumi talem “Amen” long en blong wan prea? Tok ya “Amen” i minim “i tru,” no “bambae i mas olsem.” I gat plante eksampol long Baebol blong soem se i stret blong talem “Amen” long en blong ol prea blong yumi wan no prea we yumi mekem wetem plante man. (1 Kronikel 16:36; Ol Sam 41:13) Taem yumi talem “Amen” long en blong prea blong yumi wanwan, yumi wantem makem se olgeta tok ya we yumi talem long prea blong yumi oli kamaot long hat blong yumi. Taem yumi talem “Amen”​—maet long kwaet fasin no wetem bigfala voes—​long en blong prea we narafala i mekem, yumi soemaot se yumi agri wetem ol tingting we man ya i talemaot.​—1 Korin 14:16.

?OLSEM WANEM GOD I ANSA LONG OL PREA BLONG YUMI?

16. ?Long saed blong prea, yumi save bilif fulwan long wanem samting?

16 ?I tru se Jehova i stap ansa long ol prea? !Yes! Yumi save bilif fulwan se Jehova i “stap ansa long ol prea” blong plante milian man we oli prea long hem wetem fulhat blong olgeta. (Ol Sam 65:2) Jehova i yusum plante defren rod blong ansa long ol prea blong yumi.

17. ?From wanem yumi save talem se God i save yusum ol enjel blong hem mo ol man blong hem long wol ya blong ansarem ol prea blong yumi?

 17 Jehova i yusum ol enjel blong hem mo ol man blong hem long wol ya tu blong ansa long ol prea. (Hibrus 1:​13, 14) I gat plante stori blong ol man we oli prea long God blong i halpem olgeta blong kasem save long Baebol, nao smoltaem biaen i gat wan man blong Jehova we i kam storian wetem olgeta long Baebol. Ol stori olsem oli pruvum se ol enjel oli stap lidim wok ya blong talemaot Kingdom. (Revelesen 14:6) Taem yumi nidim help blong Jehova mo yumi prea from, Jehova i save pulum tingting blong wan Kristin brata sista blong i kam halpem yumi.​—Ol Proveb 12:25; Jemes 2:16.

Blong ansa long ol prea blong yumi, Jehova i save yusum wan Kristin brata no sista

18. ?Olsem wanem Jehova i yusum tabu spirit blong hem mo Baebol blong ansarem ol prea blong ol man blong hem?

 18 Narafala samting tu we Jehova God i yusum blong ansa long ol prea blong ol man blong hem, hemia tabu spirit mo Tok blong hem Baebol. Taem wan traem i kasem yumi nao yumi prea long hem blong i halpem yumi blong stanap strong, hem i save yusum tabu spirit blong lidim yumi mo givim paoa long yumi. (2 Korin 4:7) Taem yumi prea blong askem God blong soem rod long yumi, plante taem yumi kasem ansa long Baebol. Ol tok blong Jehova long Baebol i save halpem yumi blong mekem ol desisen we oli waes. Taem yumi wanwan i stadi long Baebol no taem yumi ridim ol Kristin buk blong yumi, olsem hemia we yumi stap ridim naoia, yumi save faenem sam vas blong Baebol we oli save givhan long yumi. Long wan Kristin miting maet yumi harem wan tok long sam poen blong Baebol we yumi no bin tingbaot. No maet wan elda blong kongregesen we i wari long yumi i soem sam poen long Baebol we oli stret long yumi.​—Galesia 6:1.

19. ?Yumi mas tingbaot wanem sipos samtaem i luk olsem we God i no ansa long ol prea blong yumi?

19 Sipos Jehova i no hareap blong ansa long ol prea blong yumi, hemia i no min se hem i no naf blong givim samting we yumi askem. Yumi mas tingbaot se Jehova i ansa long ol prea blong yumi we oli laenap wetem wanem we hem i wantem mo long taem we hem i luk se i stret blong mekem olsem. Hem i savegud wanem we yumi nidim mo i savegud bitim yumi olsem wanem blong lukaotgud long yumi. Plante taem hem i letem yumi ‘gohed blong askem, gohed blong lukaot, mo gohed blong kilkilim doa.’  (Luk 11:​5-10) Fasin ya we yumi stap gohed blong askem wan samting long God i soem se tingting blong yumi i strong long samting ya mo se yumi rili bilif we God i naf blong givim samting ya. Wan narafala samting blong tingbaot se samtaem Jehova i save ansa long prea blong yumi long wan rod we maet fastaem yumi no luksave. Olsem, samtaem yumi prea long hem from wan hadtaem we i kasem yumi, nao maet Jehova i no karemaot hadtaem ya be bambae i givim paoa we yumi nidim blong stanap strong.​—Filipae 4:​13NW.

20. ?From wanem yumi mas yusum nambawan presen ya hemia prea?

20 !Yumi tangkiu bigwan long God we i Wokem heven mo wol se hem i stap klosap long olgeta we oli prea long hem wetem fulhat blong olgeta! (Ol Sam 145:18) Yumi mas yusum nambawan presen ya we yumi gat, hemia prea. Sipos yumi mekem olsem, bambae yumi glad tumas from we bambae yumi kam klosap moa long Jehova, we hem i Man blong harem ol prea.

[Kwestin]