Go long ol haf insaed long hem

Go long lis blong ol haf

 JAPTA 11

?From Wanem Ol Man Oli Safa?

?From Wanem Ol Man Oli Safa?

1, 2. ?Wanem kwestin we plante man oli askem?

EVRI dei, yumi harem nius blong ol nogud samting we i hapen long wol, olsem: Bigfala taetel wef i spolem wan vilej. Wan man i sutum plante man long jos haos, nao samfala oli kasem kil mo samfala oli ded. Wan mama i ded from sik blong kansa, mo i lego faef pikinini blong hem i stap.

2 Taem ol disasta mo ol nogud samting olsem oli hapen, plante man oli askem se, “?From wanem?” Oli wantem save se: ?From wanem ol man oli agensem ol narafala man? ?From wanem ol man oli safa? Maet yu tu yu tingbaot ol kwestin ya.

3, 4. (1) ?Wanem ol kwestin we Habakuk i askem? (2) ?Jehova i ansa olsem wanem?

3 Ol man blong bilif we Baebol i tokbaot, olgeta tu oli askem ol kwestin olsem. Traem tingbaot profet Habakuk we i askem long Jehova se: “?From wanem yu letem mi mi stap luk ol trabol ya olsem? ?Bambae yu yu stap lukluk ol trabol ya gogo kasem wetaem? Naoia raonabaot long mi, ol man oli stap faet oli stap kilkilim olgeta, mo oli stap spolem olgeta samting. Olbaot long evri ples, ol man oli stap rao, mo oli stap faet.”—Habakuk 1:3.

4 Long Habakuk 2:2, 3, yumi save ridim ansa we God i givim long Habakuk, mo promes we hem i mekem blong stretem ol trabol ya. Jehova i lavem ol man. Baebol i talem se: “Hem i stap tingbaot yufala.” (1 Pita 5:7) Taswe, taem hem i luk wan man i safa, hem i harem nogud moa i bitim  yumi. (Aesea 55:8, 9) Naoia, bambae yumi tokbaot kwestin ya: ?From wanem ol man oli safa?

?FROM WANEM OL MAN OLI SAFA?

5. ?Plante lida blong skul oli talem wanem? ?Baebol i tijim wanem?

5 Plante pasta, mo pris, mo ol lida blong skul oli talem se taem man i safa, hemia wil blong God. Sam oli talem se God i makemaot finis evri samting we i hapen long laef blong wan man, wetem ol bigfala trabol tu, mo yumi no naf blong kasem save long ol wei blong hem. Oli talem tu se, God i stap mekem man mo pikinini i ded, blong oli save go stap wetem hem long heven. Be ol tok ya oli no tru. Jehova i no save mekem ol rabis samting olsem. Baebol i talem se: “!God ya, hem i no save mekem wan samting we i no stret! Olgeta samting we hem i stap mekem oli stret nomo.”—Job 34:12.

6. ?From wanem plante man oli talem se God nao i stamba blong ol trabol?

6 Plante man oli talem se God nao i stamba blong ol trabol we i mekem man i safa, from we oli ting se God i rulum wol ya. Be long Japta 3 blong buk ya, yumi lanem finis se Setan i rula blong wol ya.

7, 8. ?From wanem ol man long fulwol oli safa?

7 Baebol i talem se: “Fulwol i stap long paoa blong Man ya we i rabis.” (1 Jon 5:19) Setan, we i rulum wol ya, i nogud we i nogud, mo i wantem tumas blong spolem ol man. Hem i stap “lidim olgeta man long wol oli go krangke.” (Revelesen 12:9) Plante man oli folem fasin blong hem. Hemia nao wan risen from wanem ol man long wol oli giaman, oli no laeklaekem olgeta, mo oli raf.

8 I gat sam narafala risen tu. Afta we Adam mo Iv i mekem stronghed, tufala i pasem sin i go long ol pikinini blong tufala. Nao, from we ol man oli sinman, oli save mekem narafala man i safa. Plante taem, oli wantem kam  hae moa long ol narafala. Oli faet, mo oli mekem i strong tumas long ol narafala, blong oli save bos long olgeta. (Prija 4:1; 8:9) Samtaem, ol man oli safa from we “samting we oli no tingbaot i save kasem olgeta enitaem nomo.” (Prija 9:11, NW) Sipos wan man i stap stret long ples we trabol i kamaot no aksiden i hapen, hem i save kasem trabol.

9. ?From wanem yumi save se Jehova i gat gudfala risen blong letem man i safa?

9 Jehova i no stamba blong ol trabol we i mekem man i safa. Jehova i no mekem ol bigfala faet oli kamaot. Hem i no pulum ol man blong oli kilim, stilim, mo mekem i nogud long narafala. God i no mekem ol disasta oli kamaot, olsem ol etkwek, ol hariken, mo bigfala wota we i ron. Be maet yu stap tingbaot se: ‘Jehova i gat olgeta paoa. ?From wanem hem i no finisim ol nogud samting we i stap hapen?’ Yumi save se Jehova i lavem yumi, taswe hem i mas gat wan gudfala risen blong letem man i safa.—1 Jon 4:8.

?FROM WANEM GOD I LETEM MAN I SAFA?

10. ?Olsem wanem Setan i agensem Jehova?

10 Setan i giaman long Adam mo Iv long garen blong Iden. Hem i mekem tufala i ting se God i no wan gudfala Rula, mo se God i stap blokem tufala blong tufala i no kasem wan gudfala samting. Setan i wantem we tufala i bilif se, rul blong hem i gud moa i bitim rul blong God, mo tufala i no nidim God.—Jenesis 3:2-5; yu luk Ol Not 27.

11. ?Bambae yumi ansa long wanem kwestin?

11 Adam mo Iv i no obei long Jehova, mo tufala i agensem hem. Tufala i ting se tufala i gat raet blong jusumaot wanem i stret mo wanem i no stret. ?Olsem wanem Jehova i save pruvum se tufala stronghed ya i rong, mo hem i save samting we i gud moa long ol man?

12, 13. (1) ?From wanem Jehova i no kilim Adam mo Iv i ded wantaem? (2) ?From wanem Jehova i letem taem blong Setan mo ol man oli rul?

 12 Jehova i no kilim Adam mo Iv i ded wantaem, from we hem i letem taem blong tufala i gat pikinini. Taem God i mekem tufala, hem i wantem se wol i fulap long ol man we oli stret gud. Nomata wanem samting we Setan i mekem, stamba tingting ya blong God bambae i kamtru. (Jenesis 1:28; Aesea 55:10, 11) Ol pikinini ya blong Adam mo Iv oli save jusum se oli wantem Jehova olsem Rula blong olgeta, no nogat.

13 Long fes blong plante milian enjel, Setan i talem se Jehova i no wan gudfala Rula. (Job 38:7; Revelesen 5:11) Ale, Jehova i givim taem blong Setan i traem pruvum tok ya. Mo tu, Jehova i letem taem blong ol man oli putumap ol gavman we Setan i lidim. Oli gat janis blong soemaot sipos oli naf blong rul gud, olgeta nomo.

14. ?Ol samting we oli stap hapen long wol, oli soemaot wanem?

14 Ol man oli rul plante taosen yia finis, be i klia se oli no naf. Ol samting we oli stap hapen long wol, oli soemaot se Setan i man blong giaman. Ol man oli nidim God blong i givhan long olgeta. Tok blong profet Jeremaea i soemaot samting ya, i se: “Hae God. Mi mi save we i no gat man i save wanem samting bambae i kamtru long laef blong hem, mo we i no gat man i save kam bos long laef blong hem.”—Jeremaea 10:23.

?FROM WANEM JEHOVA I WET LONGTAEM?

15, 16. (1) ?From wanem Jehova i letem ol man oli safa longtaem? (2) ?From wanem Jehova i no stretem ol trabol we Setan i mekem?

15 ?From wanem Jehova i letem ol man oli safa longtaem? ?From wanem hem i no finisim ol nogud samting we i stap hapen? I nidim taem blong pruvum se Setan i no save rul gud. Ol man oli stap traem ol defdefren kaen  gavman, be i klia se oli no naf. Mo tu, ol saentis oli gat plante moa save, mo oli wokem plante niufala masin. Nating se i olsem, plante moa man oli stap mekem i no stret, oli kilim ol narafala man mo stilim olting blong olgeta. Mo tu, i gat plante moa bigfala faet long wol. Tru ya, ol man oli no naf blong rul, olgeta nomo, be oli nidim God.

16 Ol trabol we Setan i mekem i stap yet. ?From wanem Jehova i no stretem? From we, sipos Jehova i stretem, hemia i min se hem i stap sapotem rul blong Setan. Be neva Jehova i save sapotem Setan. Mo tu, sipos Jehova i stretem ol trabol, ol man bambae oli ting se rul blong olgeta i gud nomo. Be hemia i no tru, mo Jehova i no save agri long tingting ya, from we Jehova i no save giaman.—Hibrus 6:18.

17, 18. ?Jehova bambae i mekem wanem blong stretem ol trabol we Setan i mekem?

17 ?Olsem wanem? ?Jehova i naf blong stretem ol trabol we Setan mo ol man oli mekem? Yes. I no gat wan samting we i had tumas blong Jehova i mekem. Hem i save wetaem i stret blong finisim ol trabol. Fastaem, hem i mas pruvum fulwan se ol tok blong Setan i giaman. Afta, bambae hem i mekem wol i kam paradaes, olsem bifo. Ol man “we oli stap long beregraon” bambae oli laef bakegen. (Jon 5: 28, 29) Bambae i no moa gat sik mo ded. Jehova bambae i yusum Jisas blong tekemaot ol trabol mo “brekemdaon ol wok we Setan i mekem.” (1 Jon 3:8) Yumi glad tumas se Jehova i gat longfala tingting. Hem i letem taem i pas blong yumi kasem save long hem, nao yumi save mekem desisen se yumi wantem stap aninit long rul blong hem, no nogat. (Ridim 2 Pita 3:9, 10.) Mo tu, taem yumi safa, hem i givhan long yumi, blong yumi save stanap strong.—Jon 4:23; ridim 1 Korin 10:13.

18 Jehova i no save fosem yumi, blong yumi jusum  hem olsem Rula blong yumi. Hem i mekem yumi wetem fasin ya we yumi fri blong jus. Bambae yumi tokbaot olsem wanem nambawan presen ya i save givhan long yumi.

YU YU FRI BLONG JUS—YUSUMGUD PRESEN YA

19. ?Jehova i givim wanem nambawan presen long yumi? ?From wanem yumi glad tumas long presen ya?

19 Jehova i mekem yumi we yumi defren long ol anamol. Ol anamol oli folem program we i stap finis long olgeta, be yumi save jusum rod we yumi wantem folem long laef blong yumi. Yumi save jusum se yumi wantem mekem Jehova i glad, no nogat. (Ol Proveb 30:24) Yumi no olsem wan robot we narafala i kontrolem. Yumi fri blong jusum ol fasin we yumi wantem mekem, ol fren we yumi wantem joen wetem olgeta, mo ol samting we yumi wantem mekem long laef blong yumi. Jehova i wantem se yumi harem gud long laef.

20, 21. ?I gud yu jus blong mekem wanem?

20 Jehova i wantem se yumi lavem hem. (Matiu 22:37, 38) Hem i olsem wan papa we i glad tumas taem pikinini blong hem i talem wetem fulhat se “mi mi lavem yu,” be i no gat narafala i fosem hem. Jehova i letem yumi jus, se yumi wantem obei long hem, no nogat. Setan wetem Adam mo Iv, trifala i jus blong agensem Jehova. ?Olsem wanem? ?Bambae yu yusum gud presen ya we yu fri blong jus?

21 I gud yu jus blong obei long Jehova. I gat plante milian man we oli jus finis blong agensem Setan, mo blong mekem God i glad. (Ol Proveb 27:11) ?Yu mas mekem wanem blong kasem laef long niufala wol, afta we God i tekemaot ol trabol? Bambae yumi faenemaot ansa blong kwestin ya long nekis japta.