Go long ol haf insaed long hem

Go long lis blong ol haf

 LESEN 3

Rehab i Bilif Long Jehova

Rehab i Bilif Long Jehova

Yu traem mekem olsem se yu stap long taon blong Jeriko. Taon ya i stap long kantri blong Kenan, mo ol man long ples ya oli no bilif long Jehova. I gat wan woman we nem blong hem Rehab, i stap long taon ya.

Taem Rehab i wan smol gel, hem i harem stori blong Moses we i mekem Red Si i seraot long tu haf, mo i lidim ol man Isrel oli aot long Ijip. Mo tu, hem i harem ol stori we oli soemaot se Jehova i givhan long ol man Isrel blong oli winim ol enemi we oli faet agensem olgeta. !Mo naoia, hem i harem se ol man Isrel oli putum haos tapolen blong olgeta klosap nomo long Jeriko!

Rehab i haedem tufala man ya from we hem i bilif long Jehova

Long wan sapa, tu man Isrel tufala i go long Jeriko, blong spae long taon ya. Tufala i kamtru long haos blong Rehab. Rehab i singaot tufala i go insaed long haos blong hem mo tufala i stap long ples ya. Long naet ya, king blong Jeriko i faenemaot se tu man Isrel tufala i kam spae long taon, mo se oli go long haos blong Rehab. Ale king i sanem ol man blong hem oli go blong holem tufala. Be Rehab i haedem tufala man ya antap long haos blong hem, mo hem i talem long ol man blong king se: ‘Yes i gat tu man i kam long haos blong mi, be tufala i aot finis. Sipos yufala i hareap naoia, bambae yufala i save kasem tufala.’ ?Yu yu save from wanem Rehab i haedem tufala man ya?— From we hem i bilif long Jehova, mo hem i save se Jehova bambae i givim kantri blong Kenan long ol man Isrel.

Bifo we tufala man ya i aot long haos blong Rehab, tufala i promes se Rehab mo famle blong hem bambae oli laef, taem ol man Isrel oli kam spolem Jeriko. Be tufala i talem se hem i mas mekem wan samting. ?Yu yu save wanem samting ya?— Tufala i talem long hem se: ‘Yu tekem red rop ya mo yu hangem long windo blong yu. Sipos yu mekem samting ya, evri man we oli stap long haos blong yu bambae oli laef.’ Rehab i mekem samting we tufala man ya i talem long hem. ?Yu yu save wanem i hapen afta?—

Jehova i sevem Rehab mo famle blong hem

Sam dei biaen, ol man Isrel oli wokbaot kwaet nomo i goraon long taon ya. Oli mekem olsem wan taem nomo long wan dei, mo oli gohed olsem gogo kasem sikis dei. Be long namba seven dei, oli wokbaot seven taem i goraon long taon ya. Biaen, olgeta evriwan oli singaot bigwan. Ale Jehova i mekem bigfala stonwol blong taon ya i brokbrok mo i foldaon.  !Be haos ya we i gat wan red rop i hang long windo blong hem i stap gud nomo! ?Yu yu luk haos ya long pija?— !Rehab mo famle blong hem oli no ded!

?Yu yu lanem wanem long stori blong Rehab?— Rehab i lanem plante gudgudfala samting long saed blong Jehova, from samting ya hem i bilif long Jehova. Yu tu yu stap lanem plante gudgudfala samting long saed blong Jehova. ?Yu tu yu bilif long Jehova olsem Rehab?— !Mifala i save se yu bilif!