Go long ol haf insaed long hem

Go long lis blong ol haf

 LESEN 9

Jeremaea i No Stop Blong Tokbaot Jehova

Jeremaea i No Stop Blong Tokbaot Jehova

?From wanem ol man oli kros long Jeremaea?

Jehova i mekem rod blong sevem Jeremaea

Samtaem ol man oli jikim yumi mo oli kros long yumi taem yumi tokbaot Jehova. Samting ya i save mekem se yumi wantem stop blong tokbaot God. ?Yu yu harem olsem finis?— Baebol i tokbaot wan yangfala man we nem blong hem Jeremaea. Jeremaea i lavem Jehova, be klosap hem i stop blong tokbaot Jehova long ol man. I gud yumi save moa long stori blong hem.

Taem Jeremaea i yangfala, Jehova i talem long hem blong i go talem long ol man se oli mas stop blong mekem ol rabis fasin. Jeremaea i harem se i had blong mekem samting ya, mo hem i fraet. Hem i talem long Jehova se: ‘Mi no save se bambae mi talem wanem. Mi mi wan boe nomo.’ Be Jehova i talem long hem se: ‘Yu no fraet. Bambae mi givhan long yu.’

 Ale, Jeremaea i go talem long ol man se sipos oli no jenisim fasin blong olgeta, bambae oli kasem panis. ?Yu ting se ol man oli mekem samting we Jeremaea i talem?— Nogat. Olgeta oli jikim hem mo oli kros long hem. !Mo tu, samfala oli wantem kilim hem i ded! ?Yu ting se Jeremaea i harem olsem wanem?— Hem i fraet. Ale, hem i talem se: ‘Naoia, bambae mi no moa tokbaot Jehova.’ ?Be i tru se hem stop blong tokbaot Jehova?— Nogat. Hem i lavem Jehova tumas, mo samting ya i mekem se hem i no save stop blong tokbaot hem. Mo from we hem i no stop, Jehova i lukaot gud long hem.

Wan taem, sam rabis man oli sakem Jeremaea i godaon long wan wel we i fulap long sofmad. Hem i no gat kakae mo wota. Ol man ya oli wantem se Jeremaea i ded insaed long wel ya. !Be Jehova i givhan long Jeremaea, ale hem i kamaot long wel!

?Yu yu lanem wanem long stori blong Jeremaea?— Nating se samtaem hem i fraet, be hem i no stop blong tokbaot Jehova. Taem yu tokbaot Jehova, ol man oli save jikim yu mo oli save kros long yu. Maet yu harem se yu sem mo maet yu fraet tu. Be yu no mas stop blong tokbaot Jehova. Bambae hem i givhan long yu oltaem, olsem we hem i bin givhan long Jeremaea.

YU RIDIM LONG BAEBOL

  • Jeremaea 1:4-8; 20:7-9; 26:8-19, 24; 38:6-13