Go long ol haf insaed long hem

Go long lis blong ol haf

 Japta 7

?Yu Yu Tinghae Long Laef Olsem We God i Tinghae Long Hem?

?Yu Yu Tinghae Long Laef Olsem We God i Tinghae Long Hem?

“Yu yu stamba blong laef blong olgeta samting.”—OL SAM 36:9.

1, 2. ?Wanem presen we God i givim we i givhan bigwan long yumi tede, mo from wanem presen ya i givhan?

PAPA blong yumi long heven i givim laef long yumi mo i mekem we yumi naf blong tingting mo yumi naf blong kopi ol gudfala fasin blong hem. Hemia wan presen we i gud tumas. (Jenesis 1:27) From presen ya, yumi naf blong kasem save long ol stamba trutok blong Baebol mo yumi naf blong luksave olsem wanem ol trutok ya oli save halpem yumi. Ale taem yumi mekem ol save ya oli wok long laef blong yumi, yumi kam olsem olgeta we oli bigman long saed blong spirit, yumi lavem Jeova mo yumi ‘trenem tingting blong yumi gogo yumi kam naf blong luksave mo jusumaot wanem i stret mo wanem i no stret.’—Hibrus 5:14, NW.

2 Long taem blong yumi, i gat plante plante samting we oli stap hapen long laef blong ol man evri dei. Ating yumi nidim plante niufala loa blong talem long yumi wanem i stret mo wanem i no stret long ol samting ya. Be yumi no nidim plante olsem. I moa gud yumi lanem blong yusum prapa tingting blong yumi blong folem ol stamba trutok blong Baebol. Eksampol, yumi mas tingting gud bifo we yumi yusum sam meresin mo tritmen, mo antap moa sipos i gat blad insaed long olgeta. Ol man we oli wantem obei long Jeova oli mas tinghevi long saed ya. Sipos yumi kasem save long ol stamba trutok blong Baebol we oli givhan long yumi long saed ya, bambae yumi naf blong mekem ol desisen we oli waes, we oli no go agensem voes blong hat blong yumi, mo we oli no karemaot yumi long lav blong God. (Ol Proveb 2:6-11) I gud yumi tokbaot sam long ol stamba trutok ya.

LAEF MO BLAD I TABU

3, 4. ?Wetaem Baebol i stat tokbaot se blad i tabu, mo hemia i stanap long wanem stamba trutok?

3 Smoltaem afta we Ken i kilim Ebel i ded, Jeova i soemaot olsem wanem we laef i joen wetem blad, mo olsem wanem tufala samting ya i tabu. Hemia fastaem we Jeova i givim save ya. God i talem long Ken se:  “!Yu lesin! Brata blong yu i ded finis. Blad blong hem i ron i go long graon, mo blad ya i stap krae long mi yet blong mi stretem samting ya.” (Jenesis 4:10) Long lukluk blong Jeova, blad blong Ebel i minim laef blong hem we i lus taem Ken i kilim hem i ded. Taswe Jeova i talem se i olsem we blad blong Ebel i stap krae i go long Hem blong i mas stretem trabol ya we i bin hapen.—Hibrus 12:24.

4 Afta we Bigfala Wota i ron long taem blong Noa, God i givim raet long ol man blong oli kakae mit blong anamol. Be hem i putum tabu long blad. Hem i se: “Bambae yufala i no save kakae mit we blad blong hem i stap long hem yet. Yufala i mas letem blad blong hem i ronaot fastaem, finis bambae yufala i save kakae. Mi mi blokem samting ya, from we laef i stap long blad. Nao sipos wan man i kilim narafala man i ded, bambae mi mi panisim hem.” (Jenesis 9:4, 5) Oda ya i go long olgeta pikinini blong Noa i kam kasem taem blong yumi. Hem i sapotem samting we God i bin talem long Ken bifo, se laef blong olgeta man mo anamol i stap long blad. Mo tu, oda ya i pruvum gud se Jeova, Stamba blong laef, bambae i panisim olgeta man we oli no gat respek long laef mo blad.—Ol Sam 36:9.

5, 6. ?Olsem wanem sam loa we God i givim long neson blong Isrel i soemaot se blad i tabu mo i sas tumas? (Lukluk  bokis long pej 78.)

5 Tufala stamba trutok ya oli olsem fandesen blong sam loa tu we God i givim long neson blong Isrel. Levitikas 17:10, 11 i talem se: “Sipos wan long yufala . . . i kakae mit we blad blong hem i stap long hem yet, bambae mi mi tanem baksaed long hem, nao bambae mi mi no moa save kaontem hem, se i man blong mi. Olgeta samting we i gat laef, be laef blong olgeta i stap long blad blong olgeta. Taswe mi mi mekem rod blong yufala se yufala i save kilim anamol, mo pris i save kafsaedem blad blong hem i go long Olta ya blong mi, blong tekemaot ol sin blong yufala. Blad blong anamol, we i olsem laef blong hem, hem nao i save tekemaot ol sin blong yufala.” *—Lukluk bokis long  pej 76, “Blad i Gat Paoa Blong Tekemaot Sin.”

6 Sipos oli kilim wan anamol i ded mo oli no yusum blad blong hem long olta, ale oli mas kafsaedem blad ya i go long graon. Hemia i blong soemaot se laef blong anamol ya i gobak long God we hem nao i givim laef ya. (Dutronome 12:16; Esikel 18:4) I gud blong makem se tok blong God i no talem se ol man Isrel oli mas skwisim evri laswan drop blong  blad i kamaot long mit blong anamol. Nogat. Oli mas meksua nomo se oli katem nek blong anamol ya mo letem blad blong hem i ronaot fastaem, nao biaen wan man Isrel i save kakae mit ya we tingting blong hem i no stikim hem, from we hem i soem respek long God we i Givim Laef.

7. ?Olsem wanem Deved i gat respek long blad we i tabu?

7 Deved i wan man we ‘i mekem i stret olsem we God i wantem.’ Hem i kasem save gud wanem stamba trutok we i stap biaen long loa ya blong blad we God i stanemap. (Ol Wok 13:22) Wan taem, Deved i tosta tumas.  Ale, tri man blong hem trifala i go insaed long kamp blong ol enemi, trifala i kasem wota long wan wel, mo trifala i karem wota ya i kam long hem. ?Deved i mekem wanem? Hem i talem se: “Sipos mi dring, bambae i olsem we mi mi stap dring blad blong trifala ya we i letem laef blong trifala blong go from.” Long lukluk blong Deved, wota ya i olsem blad blong ol man ya blong hem we oli rere blong ded blong go kasem wota ya. Taswe, nating se Deved i tosta tumas, hem i ‘kafsaedem wota ya i go long graon, blong mekem wosip long Hae God,’ i olsem we i givim long Jeova.—2 Samuel 23:15-17.

8, 9. ?Afta we Kristin kongregesen i stanap, tingting blong God long saed blong laef mo blad i jenis? Eksplenem.

8 Samwe long 2,400 yia afta we God i toktok long Noa, mo 1,500 yia afta we kontrak blong Loa i stanap, Jeova i pulum hed kampani blong faswan Kristin kongregesen blong raetem se: ‘Mifala i glad blong folem tingting we tabu spirit i soem long mifala, se bambae mifala i no putum sam narafala loa long yufala, we bambae i olsem wan hevi samting long yufala, antap long ol rul ya we i stret blong yufala i folem. Ol rul ya i olsem. Bambae yufala i no kakae ol kakae ya we man i yusum finis blong mekem wosip long ol narafala god. Mo bambae yufala i no kakae blad [“yufala i no yusum blad,” NW]. Mo bambae yufala i no kakae anamol we man i jokem nek blong hem nomo, we blad i stap yet long mit blong hem. Mo bambae yufala i no mekem nogud wetem woman.’—Ol Wok 15:28, 29.

9 Long toktok ya i klia nomo se hed kampani i luksave we blad i tabu. Long tingting blong olgeta, sipos man i yusum blad long fasin we i no stret, hem i mekem sin we i sem mak nomo long man we i wosipim aedol mo man we i mekem nogud fasin long saed blong seks. Ol trufala Kristin tede oli agri long desisen ya we ol faswan Kristin oli stanap long hem. Oli folem tingting we i stap long ol stamba trutok blong Baebol, taswe oli naf blong mekem ol desisen long saed blong blad we i mekem Jeova i glad long olgeta.

FASIN BLONG YUSUM BLAD OLSEM WAN MERESIN

?Sipos wan dokta i wantem yusum ol smosmol haf insaed long blad blong fiksim sik blong mi, bambae mi eksplenem desisen blong mi olsem wanem?

10, 11. (a) ?Wanem lukluk blong ol Witnes blong Jeova long saed blong blad transfiusen mo fofala stamba haf blong blad? (b) ?Wanem tritmen we wanwan Kristin i save mekem defdefren desisen long hem?

10 Ol Witnes blong Jeova oli kasem save se tok ya “no yusum blad” i min se oli no save agri blong tekem blad transfiusen, mo oli no save givim blad blong olgeta tu mo oli no save karemaot blad blong olgeta blong dokta i kipim long wan aesbokis blong yusum long olgeta bakegen. Mo tu, from we oli gat respek long loa blong God, oli no save agri  blong tekem eniwan long ol fofala stamba haf blong blad, hemia ol red sel, ol waet sel, ol pletlet mo plasma.

11 Tede, ol man oli faenem plante moa smosmol samting insaed long blad, mo oli naf blong karemaot wanwan smosmol samting ya blong oli yusum long plante defdefren rod. ?Olsem wanem? ?Wan Kristin i save agri blong tekem wan tritmen we dokta i mekem wetem wan smosmol haf ya we oli tekemaot long blad? ?Long tingting blong Kristin ya, ol smosmol haf ya oli olsem “blad” yet? I stap long wanwan Kristin nomo blong tingbaot mo tekem prapa desisen blong olgeta long saed ya. I stap long wanwan Kristin tu blong mekem prapa desisen blong olgeta long ol defdefren rod ya we dokta i save yusum blong tritim sik blong olgeta. Long rod ya, i gat hemia we oli kolem hemodialysis (mesin we i mekem wok blong kidni), mo hemodilution (wan mesin we i miksim blad blong man wetem wan kaen wota), mo cell salvage (yusum wan mesin blong sevem blad blong man we i ron taem oli katem man), wanwan man i fri blong jusum eniwan long ol rod ya sipos hem i wantem, from we ol rod ya oli no yusum blad blong narafala man. Wan samting nomo, se taem oli yusum blad blong yu, we yu mas kasem tritmen, i gud blong meksua  se oli no yusum blad blong yu we oli karemaot sam wik bifo finis, mo we oli bin holem i stap.—Lukluk Sam Moa Save, long pej 215-218.

12. ?Wanem tingting yumi mas gat long saed blong ol desisen we oli stanap long voes blong hat nomo?

12 ?Taem wan man i fri blong mekem prapa desisen blong hem wan, hemia i min se Jeova i no kea wanem desisen we man ya i tekem? Si, hem i kea yet from we hem i intres bigwan long ol tingting blong yumi mo wanem we i pusum yumi blong mekem samting. (Ol Proveb 17:3; 21:2; 24:12) Taswe, afta we yumi prea long Jeova mo yumi traem faenem plante moa save long saed blong wan tritmen no rod we ol dokta oli stap yusum long sikman, i gud yumi folem voes blong hat blong yumi we Baebol i trenem. (Rom 14:2, 22, 23) Ol narafala oli no mas talem long yumi wanem we voes blong hat blong olgeta i talem long olgeta blong mekem, mo yumi no mas askem narafala tu se “?Olsem wanem long yu? ?Bambae yu mekem wanem?” Ol desisen olsemia oli stap long wanwan Kristin blong mekem, “from we evri man i gat basket blong hem blong karem.” *Galesia 6:5, NTB; Rom 14:12; lukluk bokis long  pej 81, “?Mi Mi Tingbaot Blad Se Hem i Tabu?”

OL LOA BLONG JEOVA OLI SOEMAOT SE HEM I WAN PAPA WE I GAT LAV

13. ?Ol loa mo stamba trutok blong Jeova oli soemaot wanem long saed blong hem? Givim wan eksampol.

13 Ol loa mo stamba trutok we oli stap long Baebol oli soemaot we Jeova i waes long fasin blong stanemap loa mo hem i wan Papa we i gat lav, we i rili wantem we ol pikinini blong hem oli stap gud. (Ol Sam 19:7-11) Loa ya se ‘yumi no mas kakae blad’ i no wan loa blong mekem se yumi gat strong bodi. Nating se i olsem, man we i folem loa ya i luksave se loa ya i protektem hem long plante trabol we oli stap kamaot taem man i tekem blad transfiusen. (Ol Wok 15:20) Ol dokta mo narafala man we oli wok long saed blong ol meresin mo tritmen, oli luk se fasin blong katem man we oli no yusum blad, hemia “beswan” long olgeta tritmen we ol dokta tede oli yusum. Ol save ya we ol man oli faenemaot oli pruvum long ol Kristin se Jeova i waes olgeta mo i gat lav olsem wan papa i gat lav long ol pikinini blong hem.—Aesea 55:9; Jon 14:21, 23.

14, 15. (a) ?Wanem ol loa we oli soemaot se God i lavem ol man blong hem? (b) ?Olsem wanem yu yu save folem ol stamba trutok we ol loa ya oli stanap long olgeta?

14 Plante long ol loa blong God long Isrel bifo oli soemaot we hem i  wantem tumas se ol man blong hem oli stap gud. Tingbaot loa ya we i talem se taem wan man Isrel i wokem haos blong hem we ruf blong hem i flat, hem i mas mekem rel i goraon long ruf ya antap. Ruf blong ol haos ya i olsem ples we ol famle oli hivap wanples long hem blong kakae, storian, no blong mekem narafala samting bakegen. Taswe rel ya i wan impoten samting we i save blokem ol man blong oli no foldaon taem oli stap antap long ruf ya. (Dutronome 22:8; 1 Samuel 9:25, 26; Nehemaea 8:16; Ol Wok 10:9) Wan narafala loa blong God i talem tu se sipos wan bul i nogud from we i stap ronem ol man, ale man we bul ya i blong hem i mas putum bul ya long fenis. (Eksodas 21:28, 29) Sipos wan man i no folem ol loa ya, hem i soem we hem i ting nating long laef blong narafala mo hem i save gat fol tu sipos wan man i ded from we hem we i no kea.

15 Ol loa ya oli stanap long sam stamba trutok. ?Olsem wanem yu save folem ol stamba trutok ya? Ale i gud yu tingbaot se, ?Yu yu lukaotgud long trak blong yu? ?Fasin blong yu blong draevem trak i olsem wanem? ?Yu lukaotgud long ol anamol blong yu, hom blong yu, ples blong wok blong yu? ?Wanem muvi, pleplei, no spot we yu laekem wajem mo mekem? Long sam kantri, plante yangfala oli ded long ol aksiden we oli kamaot from we oli no lukaotgud. Be ol yangfala we oli wantem se God i lavem olgeta oltaem, oli tinghae long laef mo oli no mekem ol krangke pleplei mo spot we oli save putum laef blong olgeta long denja. Oli no gat tingting ya se from we oli yangfala, i no gat samting nogud i save kasem olgeta. Defren olgeta, oli harem gud long yangtaem blong olgeta from we oli blokem samting we i save karem trabol i kam long olgeta.—Prija 11:9, 10.

16. ?Wanem stamba trutok long Baebol we i stret long fasin blong kilim bebi long bel? (Lukluk futnot tu.)

16 Wan bebi we i no bon yet, hem tu i gud tumas long lukluk blong God. Long Isrel bifo, sipos wan man i givim kil long wan woman we i gat bel mo maet woman ya no bebi ya i ded from kil ya, God i talem se man we i givim kil ya hem i ‘mas ded.’ * (Eksodas 21:22, 23, NW) Ale tingbaot filing blong Jeova taem hem i luk we evri yia i gat plante plante bebi we ol mama blong olgeta oli kilim olgeta i ded long bel. Sam long ol mama ya oli kilim pikinini long bel from we oli harem se pikinini ya i wan baden long olgeta, mo sam long olgeta oli mekem olsem from we oli gat fasin blong slip olbaot.

17. ?Yu save talem wanem blong leftemap tingting blong wan mama we i kilim bebi long bel blong hem bifo we hem i gat save long trutok?

 17 ?Be olsem wanem sipos wan woman i bin kilim bebi long bel blong hem bifo we hem i gat save long ol trutok blong Baebol? ?God bambae i no save fogivim hem? !Si, God i save fogivim hem! Wan woman we i  rili tanem tingting from sin blong hem, hem i save bilif strong se from blad blong Jisas we i ron, bambae Jeova i save fogivim hem. (Ol Sam 103:8-14; Efesas 1:7) Tru ya, Kraes hem wan i talem se: “Mi mi no kam blong singaot olgeta we oli stret man finis, blong oli tanem tingting blong olgeta from ol sin blong olgeta. Be mi mi kam blong singaot ol man nogud, blong oli tanem tingting blong olgeta.”—Luk 5:32.

!SAKEMAOT OL TINGTING BLONG NO LAEKEM NATING NARAFALA!

18. ?Baebol i soemaot se wanem samting i olsem stamba blong fasin blong kilim man i ded?

18 I nogud blong kilim narafala mo blong spolem hem. Be Jeova i wantem tu we yumi rutumaot ol nogud filing long hat blong yumi we ol filing ya nao oli pulum man blong kilim narafala man i ded. Aposol Jon i raetem se: “Man we i no laekem Kristin brata no sista blong hem, i stap agensem hem, hem i man blong kilim man i ded.” (1 Jon 3:15) Man olsem i no laekem nating brata blong hem, be antap long hemia, i olsem we hem i wantem tu se brata ya i ded. Hem i soemaot filing ya taem hem i talem ol giaman stori blong spolem nem blong narafala no taem i giaman se narafala ya i mekem wan samting we i nogud, nao narafala ya i mas kasem panis blong God from. (Levitikas 19:16; Dutronome 19:18-21; Matiu 5:22) Taswe, sipos yumi gat filing ya se yumi no laekem nating wan man, i impoten tumas we yumi wokhad blong rutumaot filing ya long hat blong yumi.—Jemes 1:14, 15; 4:1-3.

19. ?Wan man we i folem ol tingting blong God bambae hem i tingting olsem wanem long ol vas olsem Ol Sam 11:5 mo Filipae 4:8, 9?

19 Ol man we oli tinghae long laef olsem we Jeova i tinghae long laef, mo we oli wantem se Jeova i lavem olgeta olwe, bambae oli no save agri long raf fasin. Ol Sam 11:5 i talem se: “God i stap skelem laef blong olgeta man, ol gudfala man wetem ol man nogud. Mo hem i no laekem nating olgeta we oli laekem tumas blong mekem faet.” Ol tok blong vas ya oli no blong tokbaot fasin blong God nomo, be oli blong soemaot tingting blong God we i mas lidim yumi long laef blong yumi. Tok ya i mas pulum ol man we oli lavem God blong oli stap longwe long olkaen pleplei we oli save mekem olgeta oli stat laekem raf fasin. Narafala tok ya long Baebol we i talem se Jeova i “stamba blong pis” i pulum ol man blong God tu blong oli mas wantem fulumap tingting mo hat blong olgeta wetem ol samting we oli save pulum olgeta blong lavem narafala man, blong gat ol gudfala fasin, mo blong mekem samting we ol man oli save ona long hem. Olgeta samting ya nao oli karem pis.—Filipae 4:8, 9.

 STAP LONGWE LONG OL OGENAESESEN WE OLI GAT FOL FROM DED BLONG NARAFALA

20-22. ?Ol Kristin oli mas tekem wanem desisen long saed blong wol ya, mo from wanem?

20 Long lukluk blong God, fulwol blong Setan i gat fol from ded blong plante man. Ol politik paoa blong wol, we Baebol i yusum pijatok se oli olsem ol wael anamol, oli kilim i ded plante milian man, we plante long olgeta oli ol man blong Jeova. (Daniel 8:3, 4, 20-22; Revelesen 13:1, 2, 7, 8) Ol wael anamol ya, hemia ol politik paoa. Ol politik paoa ya oli wokgud wetem ol bisnesman mo ol man blong hae save, nao olgeta ya tugeta oli wokem sam tul blong faet we oli nogud bitim mak, mo oli stap winim bigbigfala mane from ol tul ya. Tru ya i klia nomo se “olgeta man blong wol ya oli stap long paoa blong Setan.”—1 Jon 5:19.

21 Ol man blong Jisas oli “no man blong wol ya” taswe oli no joen nating long ol politik mo faet blong wol ya, mo oli no joen wetem ol komuniti mo grup we oli kilim plante man i ded. Olsem nao, oli no gat fol from ded blong narafala. * (Jon 15:19; 17:16) Oli folem fasin blong Kraes we taem man i kilim hem, hem i no givimbak. Defren olgeta, oli lavem  ol enemi blong olgeta, mo oli prea tu from olgeta.—Matiu 5:44; Rom 12:17-21.

22 Antap long olgeta samting ya, ol trufala Kristin oli lukaotgud blong no joen nating long “Bigfala Babilon,” hemia olgeta giaman skul blong wol we oli gat fol from ded blong plante moa man. Tok blong God i talem se: “Blad blong ol profet mo blad blong ol man blong God i stap long hem. Yes, blad blong olgeta man we ol man oli kilim olgeta i ded, i stap long taon ya.” Taswe woning i kam long yumi se: “Ol man blong mi, yufala i kam. Yufala i kamaot long hem.”—Revelesen 17:6; 18:2, 4, 24.

23. ?Man we i kamaot long Bigfala Babilon i mas mekem wanem?

23 Taem man i aot long Bigfala Babilon, i no min nomo se hem i karemaot nem blong hem long wan jos blong i no moa memba blong hem. Hem i min se man ya i no mas laekem nating olgeta fasin we ol giaman skul ya oli agri long olgeta no we oli pulum ol man blong mekem, olsem nogud fasin long saed blong seks, joen long politik, mo ronem mane. (Ol Sam 97:10; Revelesen 18:7, 9, 11-17) !Plante taem ol fasin ya oli lidim man blong kilim narafala i ded!

24, 25. ?Wanem i mekem we God i save fogivim wan man we i sore from we hem i gat fol long ded blong narafala, mo wanem samting long Baebol we i pija blong samting ya?

24 Bifo we yumi joen long trufala wosip, wanwan long yumi i bin mekem defdefren fasin we i sapotem wol ya blong Setan. Mo from samting ya, yumi joen wetem wol ya long fol we hem i gat from ded blong plante milian man. Be naoia yumi jenisim ol fasin blong yumi finis, yumi wokem bilif long ransom sakrefaes blong Kraes, mo yumi givim laef blong yumi long God. From samting ya, God i glad long yumi mo hem i stap blokem gud yumi, blong i no gat samting i save spolem fasin fren we yumi gat wetem hem. (Ol Wok 3:19) Fasin ya we God i protektem yumi i olsem ol taon blong haed long Isrel bifo, we Baebol i tokbaot.—Namba 35:11-15; Dutronome 21:1-9.

25 ?Ol man oli mekem olsem wanem blong haed long ol taon ya? Sipos wan man Isrel i mestem nao i kilim wan narafala man i ded, hem i mas ronwe kwiktaem i go long wan long ol taon ya blong haed. Nao ol jaj long taon ya bambae oli mas lesin long kes blong hemia we i kilim narafala i ded, be i wan akseden nomo. Ale man ya bambae i mas stap long taon ya we i ples blong haed gogo kasem taem we hae pris i ded. Nao hem i fri blong go stap long narafala ples. !Hemia wan nambawan eksampol blong soemaot we God i gat sore mo hem i tinghae tumas long laef blong man! I gat wan samting tede we i mekem sem wok  olsem ol taon ya blong haed long Isrel bifo. Hemia ol samting we God i givim, we oli stanap long ransom sakrefaes blong Kraes, blong blokem yumi blong yumi no kasem panis blong ded, from we yumi evriwan, nating se yumi no minim olsem, be yumi brekem loa blong God long saed blong laef mo blad. ?Long tingting blong yu, presen ya we God i givim i rili sas? ?Olsem wanem yu save soemaot se yu tinghae long presen ya? Wan rod blong mekem olsem, hemia taem yu singaot ol narafala man blong olgeta tu oli kam long samting we i olsem taon blong haed tede. Mo yu mas mekem samting ya moa naoia we “bigfala trabol” i stap kam klosap tumas.—Matiu 24:21; 2 Korin 6:1, 2.

TALEMAOT GUD NIUS BLONG KINGDOM BLONG SOEMAOT SE YU TINGHAE LONG LAEF

26-28. ?Olsem wanem wok we yumi mekem tede i sem mak long wok blong profet Esikel? ?Olsem wanem blong stap oltaem long laef ya we God i lavem yumi?

26 Ol samting we ol man blong God oli stap mekem tede i mekem yumi tingbaot profet Esikel bifo, we Jeova i bin givim wok long hem blong i wajman blong talemaot ol jajmen blong Jeova long ol man Isrel. God i talem se: “Ol tok we mi stap givim long yu blong wonem olgeta, yu yu mas givim long olgeta.” Sipos Esikel i no mekem wok ya we God i givim long hem, bambae hem i gat fol from blad blong olgeta we bambae oli ded taem God i jajem Jerusalem. (Esikel 33:7-9) Esikel i obei, mo from samting ya, hem i no kasem panis from ded blong olgeta.

27 Tede, yumi stap kam klosap long taem we wol ya blong Setan bambae i lus. Taswe ol Witnes blong Jeova oli tinghevi mo oli tinghae tu long wok ya we God i putum long han blong olgeta, blong oli talemaot ‘dei we God i makem blong givimbak long ol man nogud’ we i laenap wetem gud nius blong Kingdom. (Aesea 61:2, NW; Matiu 24:14, NW) ?Yu yu joen fulwan long impoten wok ya? Aposol Pol i tinghevi long wok blong prij we God i putum long han blong hem. From samting ya, hem i save talem se: “Sipos wan long yufala i lus, be i no fol blong mi, from we mi mi no haedem wan samting long yufala, mi talemaot finis long yufala, olgeta samting we God i wantem.” (Ol Wok 20:26, 27) !Hemia wan nambawan eksampol blong yumi folem!

28 Be blong stap oltaem long laef ya we yumi kasem lav blong Jeova we i Papa blong yumi, yumi mas mekem moa i bitim we yumi tinghae long laef mo blad olsem Jeova i tinghae long hem. Yumi mas stap klin tu long lukluk blong God. Hemia samting we bambae yumi tokbaot long nekis japta.

^ par. 5 Wan niuspepa (Scientific American) i tokbaot tok ya we God i talem se “laef blong olgeta i stap long blad” mo i makem se: “I stret nomo blong tokbaot blad olsem wan pijatok blong minim laef. Be hem i no wan pijatok nomo, hem i wan trufala samting from we ol wanwan sel insaed long blad, man i nidim olgeta evriwan blong hem i save laef.”

^ par. 12 Lukluk Wekap! blong Ogis 2006, pej 3-12 (Franis mo Inglis nomo), we ol Witnes blong Jeova oli wokem.

^ par. 16 Ol diksonari blong ol wod blong Baebol oli talem se long Hibru lanwis, i luk olsem se ol toktok long vas ya “oli no yusum blong tokbaot mama ya nomo we i gat bel be i minim pikinini blong hem tu.” Mo tu, i gud blong makem we Baebol i no talem se loa ya i stret long woman we i gat bel hamas manis. Nomata sipos bebi ya i gru fulwan finis long bel no i jes stat nomo, be Jeova i luk hem olsem wan laef.

^ par. 70 Lukluk Sam Moa Save, long pej 215-216, blong klia moa long saed ya.