Go long ol haf insaed long hem

Go long lis blong ol haf

 HAF 4

Yusum Mane Long Waes Fasin

Yusum Mane Long Waes Fasin

‘Yu mas mekem wan gudfala plan fastaem, nao biaen, bambae yu save win.’—Ol Proveb 20:18

Yumi mas gat mane blong givim samting we famle blong yumi i nidim. (Ol Proveb 30:8) Baebol i talem se: “Mane i save givhan blong mekem laef blong yu i gud.” (Prija 7:12) Taem man mo woman i mared, i no isi blong tufala i tokbaot mane. Be yutufala i no mas letem mane i spolem mared blong yutufala. (Efesas 4:32) Yutufala i mas agri fastaem long fasin blong spenem mane, mo yutufala i mas trastem yutufala.

 1 WAN GUDFALA PLAN

?BAEBOL I TALEM WANEM? ‘?Hu long yufala we i wantem wokem wan bigfala haos, be i no sidaon fastaem blong luk se mane blong hem bambae i naf no i no naf?’ (Luk 14:28) Yutufala i mas mekem wan gudfala plan blong yusum mane. (Amos 3:3) Yutufala i mas tingting gud fastaem long samting we yutufala i nidim, mo hamas mane we yutufala i mas spenem. (Ol Proveb 31:16) Nating se yutufala i gat mane, be i no nid blong yutufala i spenem mane olbaot nomo. I moagud yutufala i no mekem kaon. Yutufala i pem samting we i stret nomo long mane we yutufala i gat.—Ol Proveb 21:5; 22:7.

?YU SAVE MEKEM WANEM?

  • Sipos yutufala i gat sam mane i stap long en blong manis, i gud yutufala i tokbaot olsem wanem blong yusum mane ya

  • Sipos yutufala i sot long mane, yutufala i mas katemdaon sam samting we yutufala i spenem mane long hem. Maet yutufala i rerem kakae long haos, bitim we yutufala i go kakae long restoron

 2 YU NO HAEDEM WAN SAMTING

?BAEBOL I TALEM WANEM? Yumi mas mekem evri samting i “stret gud, i no long fes blong Masta blong yumi nomo, be long fes blong ol man tu.” (2 Korin 8:21) Yu talem klia, hamas mane yu stap kasem mo hamas mane yu stap spenem.

Sipos yu wantem pem wan samting we i sas, oltaem yutufala i mas tokbaot fastaem. (Ol Proveb 13:10) Sipos yutufala i mekem olsem, bambae pis i stap oltaem. Yu mas tingbaot se mane we yu kasem i no blong yu wan, be i blong famle.—1 Timoti 5:8.

?YU SAVE MEKEM WANEM?

  • Yutufala i mas agri long hamas mane we yutufala wanwan i save spenem, we i no nid blong askem narawan fastaem

  • Yutufala i no mas wet se problem blong mane i kamaot, nao yutufala i jes tokbaot, be yutufala i mas plan fastaem