Go long ol haf insaed long hem

Go long lis blong ol haf

 LAEF BLONG OL KRISTIN

Holemstrong Long Ol Stret Fasin Blong Jehova

Holemstrong Long Ol Stret Fasin Blong Jehova

Jehova i putumap sam stret fasin we ol man oli mas folem. Eksampol, hem i no wantem se man mo woman we i mared i seraot. (Mt 19:4-6, 9) Hem i no laekem nating enikaen doti fasin blong seks. (1Ko 6:9, 10) Mo tu, hem i givim advaes long saed blong ol klos mo hea, blong ol man blong hem oli stap defren long ol narafala.—Du 22:5; 1Ti 2:9, 10.

Tede, plante man oli sakemaot ol stret fasin blong Jehova. (Ro 1:18-32) Oli letem tingting blong ol man blong wol i gat paoa long klos, hea mo fasin blong olgeta. Plante oli mekem ol samting we i leftemap ol nogud fasin, mo oli tok nogud long olgeta we oli no mekem ol fasin ya.—1Pi 4:3, 4.

From we yumi ol Witnes blong Jehova, yumi mas gat strong tingting blong holemstrong long ol stret fasin blong hem. (Ro 12:9) ?Olsem wanem blong mekem samting ya? Yumi mas lukaotgud blong mekem ol fasin we Jehova i glad long hem. Be yumi mas mekem ol samting long laef blong yumi tu i laenap wetem ol tingting blong hem. Eksampol, taem yumi stap jusum ol klos mo stael blong hea, maet yumi save askem se: ‘?Ol jus blong mi oli laenap wetem tingting blong Jehova o Baebol? ?Klos mo hea blong mi i soemaot se mi mi wan Kristin?’ O taem yumi jusum wan program long TV no wan muvi blong wajem, maet i gud yumi askem se: ?Bambae Jehova i glad long program o muvi ya? ?Program o muvi ya i leftemap stret fasin no rabis fasin? ?Bambae i mekem se voes blong hat blong mi i no moa strong? (Sam 101:3) ?Bambae i mekem se wan long famle o wan narafala i foldaon?’—1Ko 10:31-33.

?From wanem i impoten tumas we yumi holemstrong long ol stret fasin blong Jehova? I no longtaem Jisas bambae i spolem ol neson blong wol ya mo ol man we oli stap mekem rabis fasin. (Esik 9:4-7) Olgeta nomo we oli mekem samting we God i wantem bambae oli no lus. (1Jo 2:15-17) Taswe i gud we naoia, yumi mekem ol fasin we i stret long ae blong Jehova, blong olgeta we oli luk ol gudfala fasin blong yumi oli leftemap Jehova.—1Pi 2:11, 12.

?Klos mo hea blong mi i soemaot se mi holemstrong long stret fasin?

WAJEM VIDEO YA KAM FREN BLONG JEHOVA—WAN MAN, WAN WOMAN, BIAEN YU ANSA LONG OL KWESTIN YA:

  • ?From wanem i waes blong laef folem ol stret fasin blong Jehova?

  • ?From wanem i gud we ol papa mo mama oli stat blong tijim pikinini long ol stret fasin blong Jehova stat taem hem i smol yet?

  • ?Olsem wanem ol yangfala mo ol olfala oli save givhan long ol man blong oli kasem ol blesing we i kamaot long Jehova?