Revelesen 14:1-20

  • Smol Sipsip mo wan handred foti fo taosen man (1-5)

  • Mesej we tri enjel oli stap talemaot (6-12)

    • Enjel antap long skae, i stap talemaot gud nius (6, 7)

  • Ol man we oli joen long Kraes mo oli ded, oli glad (13)

  • Tu man blong tekemaot kakae long wol (14-20)

14  Taem mi stap lukluk, mi luk Smol Sipsip i stap stanap long Hil Ya Saeon, mo i gat wan handred foti fo taosen man oli stap wetem hem. Ol man ya oli gat nem blong hem wetem nem blong Papa blong hem long fored blong olgeta.  Nao mi harem wan noes i stap kamaot long heven we i olsem noes blong plante wota mo bigfala tanda. Mo noes ya i olsem noes blong ol man we oli stap singsing mo oli stap plei long hap* blong olgeta.  Mo i olsem se oli stap sing long wan niufala singsing long fored blong bigfala jea blong king, mo long fored blong ol fo jerubim, mo long fored blong ol elda. Mo i no gat wan man i naf blong lanem singsing ya, ol wan handred foti fo taosen man ya nomo we God i pemaot olgeta long wol ya, oli naf blong singsing long hem.  Hemia ol man ya we oli no mekem doti fasin blong seks wetem woman, mo oli no mekem seks samtaem. Olgeta ya oli stap gohed oltaem blong biaen long Smol Sipsip long evri ples we hem i go long hem. God i pemaot ol man ya long ol narafala man, nao oli kam olsem ol fasfrut blong garen, we i blong givim i go long God mo long Smol Sipsip.  Mo i no gat wan giaman tok i kamaot long maot blong olgeta, mo i no gat samting nating i rong long olgeta.  Nao mi luk wan narafala enjel i stap flae antap long skae, i stap talemaot gud nius ya we i blong stap olwe, long olgeta man we oli stap long wol, long olgeta kantri, long olgeta laen, long olgeta lanwis, mo long olgeta grup blong man.  Hem i stap singaot bigwan, i se: “Yufala i mas fraet gud long God, mo yufala i mas leftemap nem blong hem, from we taem i kam finis blong hem i jajem ol man, taswe yufala i mas wosipim Man ya we i mekem heven mo wol, mo solwota mo springwota.”  Nao nambatu enjel i kam biaen long faswan ya, i talem se: “!Woman ya i foldaon finis! !Bigfala Babilon i foldaon finis! !Woman ya i mekem olgeta kantri oli dring waen blong hem, hemia enikaen doti fasin blong seks* we hem i wantem tumas blong mekem!”  Nao namba tri enjel i biaen long tufala ya, i singaot bigwan, i talem se: “Sipos man i wosipim wael anamol ya mo pija blong hem, mo i kasem wan mak long fored blong hem no long han blong hem, 10  bambae hem i dring waen tu we i no gat wota i miks wetem, we hemia i pija blong kros blong God. Waen ya oli kafsaedem i go long kap blong kros blong Hem. Mo faea mo salfa bambae i mekem hem i harem nogud tumas long fes blong ol tabu enjel, mo long fes blong Smol Sipsip. 11  Mo smok we i stap mekem olgeta oli harem nogud, i stap go antap oltaem gogo i no save finis. Olgeta ya we oli wosipim wael anamol mo pija blong hem, mo olgeta we oli kasem mak blong nem blong hem, oli harem nogud long dei mo long naet we oli no spel. 12  Hemia nao from wanem ol tabu man, hemia olgeta we oli stap obei long ol loa blong God, mo oli stap holemtaet bilif blong olgeta long Jisas, oli mas stanap strong.” 13  Nao mi harem wan voes i kamaot long heven, i talem se: “Yu raetemdaon tok ya: I stat naoia i go, ol man we oli joen long Masta mo oli ded, oli glad. Mo spirit i talem se yes, i gud oli spel long ol wok blong olgeta, from we ol samting we oli mekem i go wetem olgeta.” 14  Nao taem mi stap lukluk, mi luk wan waet klaod, mo wan man we i olsem pikinini blong man i stap sidaon long klaod ya. Hem i werem hat blong king we oli wokem long gol, mo i holem wan huknaef we i sap gud. 15  Nao wan narafala enjel i kamaot long haos tempol, i singaot bigwan, i talem long man ya we i stap sidaon long klaod se: “Yu yusum huknaef blong yu blong tekemaot ol kakae, from we naoia i stret taem blong tekemaot kakae, mo wol i olsem garen we ol kakae long hem oli raep finis.” 16  Mo man ya we i stap sidaon long klaod, i pusum huknaef blong hem i go long wol, nao i tekemaot ol kakae long hem. 17  Nao wan narafala enjel i kamaot long haos tempol we i stap long heven, mo hem tu i gat huknaef blong hem we i sap gud. 18  Nao wan narafala enjel bakegen we i lukaot long faea, i aot long olta, i kam. Nao hem i singaot bigwan, i talem long seken enjel ya we huknaef blong hem i sap gud, i se: “Yu yusum huknaef blong yu blong tekemaot ol rop blong grep long wol, from we ol grep ya oli raep finis.” 19  Nao enjel ya i pusum huknaef blong hem i go long wol, nao i katemaot ol rop blong grep long wol, mo i slingim olgeta i go long bigfala ples blong mekem waen, we hemia i pija blong kros blong God. 20  Nao afsaed long taon, ol hos oli gohed blong purumbut long ol grep ya long ples blong mekem waen, nao blad i kam fulap long ples ya, i kam antap gogo i kasem maot blong ol hos ya, mo blad ya i ron i go longwe samwe long wan taosen sikis handred stadia.*

Ol futnot

Hemia wan samting blong plei miusik we i gat string olsem gita, be i defren.
Grik: por·neiʹa. Yu luk Diksonari.
Hemia i samwe long 296 kilometa. Wan stadia hem i 185 meta. Yu luk Diksonari.