Revelesen 10:1-11

  • Wan strong enjel i holem wan smol skrol (1-7)

    • “Bambae hem i no moa save wet bakegen” (6)

    • Tabu tokhaed i kamtru fulwan (7)

  • Jon i kakae smol skrol (8-11)

10  Nao mi luk wan narafala strong enjel i aot long heven i kamdaon. Hem i werem klaod* olsem klos blong hem, mo i gat wan renbo long hed blong hem, mo fes blong hem i olsem san, mo ol leg blong hem oli olsem ol bigfala pos we i faea nomo,  mo wan smol skrol we i open finis i stap long han blong hem. Hem i putum raet leg blong hem i stap long solwota mo lef leg blong hem i stap long graon,  mo hem i singaot bigwan we voes blong hem i olsem laeon we i stap singaot bigwan. Taem hem i singaot olsem, voes blong seven tanda i toktok.  Nao taem ol seven tanda ya oli toktok, mi mi rere blong raetemdaon tok blong olgeta, be mi harem wan voes i kamaot long heven, i talem se: “Yu no raetemdaon, yu haedem ol samting we ol seven tanda ya oli talem.”  Nao enjel ya we i stap stanap long solwota mo long graon, hem i leftemap raethan blong hem i go long heven.  Nao blong mekem tok blong hem i strong, hem i talem nem blong God ya we i laef oltaem gogo i no save finis, we i mekem skae mo graon mo solwota, wetem ol samting we i stap long olgeta, i se: “Bambae hem i no moa save wet bakegen.  Long taem we namba seven enjel i rere blong blo long trampet blong hem, tabu tokhaed we God i talemaot long ol profet we oli slef blong hem, se hem i gud nius, hem i kamtru fulwan.”  Mo mi harem voes ya we i kamaot long heven, i toktok long mi bakegen, i se: “Yu go tekem skrol ya we i open finis long han blong enjel ya we i stap stanap long solwota mo long graon.”  Nao mi go long enjel ya, mi talem long hem blong i givim smol skrol ya long mi. Nao hem i talem long mi se: “Yu tekem mo yu kakae. Long maot blong yu bambae i swit olsem hani, be long bel blong yu bambae i konkon.” 10  Nao mi tekem smol skrol ya long han blong enjel ya, mo mi kakae. Mo long maot blong mi, i swit olsem hani. Be taem mi solemdaon finis, i mekem bel blong mi i kam konkon. 11  Nao mi harem wan tok i talem long mi se: “Yu mas talemaot bakegen profet tok we i tokbaot ol samting we bambae i kasem ol man blong olgeta grup blong man, mo ol man blong olgeta kantri, mo ol man blong olgeta lanwis, mo ol king.”

Ol futnot

NT: “wan klaod i kavremap hem.”