Revelesen 1:1-20

  • Ol samting we God i givim long Jisas Kraes blong hem i soemaot (1-3)

  • Talem halo long ol seven kongregesen (4-8)

    • “Mi mi Alfa mo mi mi Omega” (8)

  • Tabu spirit i tekem Jon i go long dei blong Masta (9-11)

  • Vison we i soemaot se oli leftemap Jisas finis (12-20)

1  Hemia ol samting we God i givim long Jisas Kraes blong hem i soemaot, mo hem i soemaot long ol slef blong hem. Ol samting ya bambae oli hapen i no longtaem. Jisas i sanem wan enjel blong hem i go blong soemaot ol samting ya long Jon we i slef blong God,* mo enjel ya i yusum ol saen blong soemaot ol samting ya.  Slef ya i talemaot tok we God i givim mo i witnes long tok we Jisas Kraes i talemaot. Yes, hem i talemaot olgeta samting we hem i luk.  Man we i ridim profet tok ya long bigfala voes mo olgeta we oli harem tok ya mo oli folem, oli glad from we stret taem blong ol samting ya i klosap.  Mi Jon, mi raet i go long ol seven kongregesen we oli stap long provins ya Esia: Mi mi prea se “God ya we i stap we i stap, mo we i stap fastaem, bifo olgeta, mo we bambae i kam,” bambae hem i kaen long yufala mo i givim pis long yufala. Mo mi prea se ol seven spirit we oli stap long fored blong bigfala jea blong hem, olgeta tu bambae oli mekem olsem long yufala.  Mo mi prea se Jisas Kraes tu bambae i kaen long yufala mo i givim pis long yufala. Hem i “Tru Witnes,” hem i “fasbon we i faswan blong laef bakegen long ded,” mo hem i “Rula blong olgeta king long wol.” Hem i lavem yumi, mo hem i yusum blad blong hem blong mekem yumi kam fri long ol sin blong yumi,  mo i mekem yumi kam wan kingdom, yumi kam ol pris blong God blong hem, we i Papa blong hem. I gud yumi leftemap nem blong hem, mo paoa i blong hem oltaem gogo i no save finis. Amen.  !Yufala i luk! Bambae hem i kam long klaod, mo evri man wetem olgeta ya tu we oli sperem hem, bambae oli luk hem stret long ae blong olgeta. Mo from hem, olgeta laen blong man long wol bambae oli kilkilim jes blong olgeta from we oli sore tumas. Bambae i mas olsem. Amen.  Jehova* God i talem se: “Mi mi Alfa mo mi mi Omega,* mi mi God ya we i stap we i stap, mo we i stap fastaem, bifo olgeta, mo we bambae i kam. Mi mi God Ya We i Gat Olgeta Paoa.”  Mi Jon, mi brata blong yufala, mo from we mi man blong Jisas, mi tu mi stap kasem trabol olsem yufala, mo mi stanap strong olsem yufala, mo mi joen wetem yufala long kingdom. Mi stap long aelan ya Patmos, from we mi stap tokbaot God, mo mi stap tokbaot trutok long saed blong Jisas. 10  Tabu spirit i tekem mi mi go long dei blong Masta. Nao mi harem wan strong voes biaen long mi we i olsem wan trampet, 11  i talem se: “Olgeta samting we yu luk, yu raetemdaon long skrol, mo yu sanem i go long ol seven kongregesen ya: Efesas, Smana, Pegamam, Tuatira, Sadis, Filadelfia, mo Laodisia.” 12  Nao mi tanraon blong luk se hu i stap toktok long mi. Mo taem mi tanraon, mi luk seven ples blong putum laet we oli wokem long gol, 13  mo long medel blong olgeta, mi luk wan man we i olsem pikinini blong man. Klos blong hem i longfala go kasem leg blong hem daon, mo wan strap we oli wokem long gol i goraon long jes blong hem. 14  Mo hed mo hea blong hem i waet we i waet olsem sno, mo ae blong hem i olsem faea we i laet. 15  Leg blong hem i saen olsem gudfala kopa we oli bonem long faea, mo voes blong hem i bigwan olsem noes blong bigfala wotafol. 16  Hem i holem seven sta long raethan blong hem, mo wan longfala naef blong faet we i sap tu saed i stap kamaot long maot blong hem. Mo fes blong hem i olsem san we i saen long medel dei. 17  Taem mi luk hem, mi foldaon long leg blong hem, olsem we mi ded finis. Be hem i putum raethan blong hem long mi, mo i talem se: “Yu no fraet. Mi mi Faswan, mo mi mi Laswan, 18  mo mi mi man ya we i laef. Bifo mi ded, !be yu luk! Naoia mi laef, mo bambae mi laef oltaem gogo i no save finis, mo mi mi holem ol ki blong ded mo blong Beregraon.* 19  Oraet, yu yu mas raetemdaon ol samting ya we yu luk, ol samting we oli stap kamtru naoia, mo ol samting we bambae oli kamtru. 20  Tabu tokhaed blong ol seven sta we yu luk long raethan blong mi, mo ol seven ples blong putum laet we oli wokem long gol, i olsem: Ol seven sta ya oli minim ol enjel blong ol seven kongregesen. Mo ol seven ples blong putum laet, oli minim ol seven kongregesen.

Ol futnot

NT: “slef blong hem [Jisas].”
Yu luk Diksonari.
“Alfa” hem i fas leta long Grik alfabet mo “Omega” hem i las leta.
NT: “Hades,” hemia beregraon blong ol dedman. Yu luk Diksonari.