1 Korin 3:1-23

  • Ol man Korin oli gat tingting blong man yet (1-4)

  • God nao i stap mekem i gru (5-9)

    • Mitufala i joen wetem God blong mekem wok (9)

  • Yusum ol samting blong bildim haos we i no save bon long faea (10-15)

  • Yufala i tempol blong God (16, 17)

  • Waes blong wol i olsem wan krangke samting nomo long ae blong God (18-23)

3  Taswe ol brata, mi no save toktok long yufala olsem we mi stap toktok long ol man we spirit blong God i lidim olgeta, be mi toktok long yufala olsem we mi stap toktok long ol man we oli gat tingting blong man nomo, olsem we oli bebi yet long rod blong Kraes.  Mi mi fidim yufala long melek nomo be i no long strong kakae, from we yufala i no strong. Mo i tru se naoia tu yufala i no strong yet,  from we yufala i gat tingting blong man yet. Taem yufala i stap jalus long yufala mo yufala i stap raorao, ?yufala i no ting se yufala i gat tingting blong man, mo yufala i stap folem fasin blong ol narafala man?  Taem sam long yufala oli talem se: “Mi mi blong Pol,” mo ol narafala oli talem se: “Mi mi blong Apolos,” ?yufala i no ting se yufala i stap folem fasin blong ol man nomo?  ?Be Apolos hem i wanem? ?Mo Pol hem i wanem? Tufala i man blong wok nomo, yes Masta i givim wok long tufala wanwan, nao tufala i givhan long yufala blong yufala i bilif.  Mi mi planem kakae, Apolos i putum wota long hem, be God nao i stap mekem i gru,  taswe hem nao i mas kasem ona, be i no man ya we i planem mo man ya we i putum wota.  Man we i planem mo man we i putum wota, tufala i wan* nomo, be tufala wanwan bambae i kasem blesing we i stret long wok we tufala wanwan i mekem.  Yes, mitufala i joen wetem God blong mekem wok. Yufala i garen blong God we hem i stap wok long hem, mo yufala i haos we hem i stap wokem. 10  God i kaen long mi, taswe mi putum wan fandesen olsem wan man we i gat gudhan blong bildim haos,* be narafala man i bildim haos antap long fandesen ya. Be i gud ol man wanwan oli stap lukaot gud se oli stap bildim haos ya olsem wanem. 11  I no gat wan man i save putum wan narafala fandesen bakegen antap long hemia we i stap finis, we hemia Jisas Kraes. 12  Nao sipos wan man i bildim haos antap long fandesen ya, nao hem i yusum gol, no silva, no ol sas ston, no wud, no ol defren gras mo lif, 13  be i gat dei we bambae i soemaot se wok blong ol man wanwan i olsem wanem,* from we faea nao bambae i soemaot, mo faea nao bambae i pruvum se wok blong ol man wanwan i olsem wanem taem oli bildim haos ya. 14  Sipos wok we man i wokem antap long fandesen ya i stanap yet, hem bambae i kasem blesing. 15  Sipos faea i bonem wok blong wan man, bambae hem i lusum olting blong hem be hem bambae i laef, be hemia bambae i olsem we ol narafala oli pulumaot hem long faea. 16  ?Yufala i no save se yufala i tempol blong God, mo se spirit blong God i stap long yufala? 17  Sipos wan man i spolem tempol blong God, bambae God i spolem hem, from we tempol blong God i tabu, mo yufala nao i tempol ya. 18  I nogud wan man i stap giaman long hem wan: Sipos wan long yufala i ting se hem i waes long fes blong ol man long wol* ya, i gud hem i kam krangke, olsem nao hem i save kam waes. 19  Waes blong wol ya i olsem wan krangke samting nomo long ae blong God, from we Baebol i talem se: “Hem i yusum ol trik blong ol waes man blong kasem olgeta.” 20  Mo Baebol i talem bakegen se: “Jehova* i save se tingting blong ol waes man i blong nating nomo.” 21  Taswe, i nogud man i stap tok flas from ol samting we man i mekem, from we olgeta samting oli blong yufala. 22  Nating se Pol, no Apolos, no Kefas,* no wol, no laef, no ded, no ol samting we oli stap naoia, no ol samting we bambae oli kam, be olgeta samting oli blong yufala, 23  mo yufala i blong Kraes, mo Kraes i blong God.

Ol futnot

NT: “wok wetem wan tingting.”
NT: “olsem bos we i waes, i lidim ol wok.”
PT: “wanwan bambae i kam long klia ples.”
Yu luk Diksonari.
Yu luk Diksonari.
Narafala nem blong hem Pita.