Go long ol haf insaed long hem

Ol Man Irelan Mo Briten Oli Kasem Gud Nius Long Prapa Lanwis Blong Olgeta

Ol Man Irelan Mo Briten Oli Kasem Gud Nius Long Prapa Lanwis Blong Olgeta

Ol Witnes blong Jehova oli traehad blong kasem ol man we oli toktok prapa lanwis blong Irelan mo Briten. *

Long Septemba 2012, mifala i lonjem websaet blong mifala, hemia jw.org long plante defren lanwis olsem lanwis Iris mo Wels, mo tu long lanwis Scotis Gaelic we i kamaot finis long websaet long Ogis 2014. Mifala i printim sam magasin long ol lanwis ya finis. Biaen, ?wanem i kamaot from?

Wan man we i gat skul finis, i karem wan traket long lanwis Scotis Gaelic, nao wantaem nomo hem i ridim long bigfala voes mo i stat blong krae. ?Wanem i tajem hem? Hem i sek long gudfala translesen blong traket ya mo i singaot bigwan se: “?Hu i tanem ol tok ya? !I nambawan!”

Taem jw.org i kamaot long lanwis Scotis Gaelic, long faswan manis nomo i gat samwe long 750 man oli visitim websaet ya.

Wan tija blong National University of Ireland, Galway, i talem long wan Witnes se hem i no intres long ol skul. Be taem hem i harem se hem i save tekem wan traket ya, The Bible—What Is Its Message? long lanwis Iris, hem i askem blong gat wan. Hem i talem se evri man oli mas kasem ol buk blong Baebol long prapa lanwis blong olgeta, mo hem i talem ol gudfala toktok long ol Witnes blong Jehova from wok we oli mekem blong givimaot ol buk long ol man Irelan long prapa lanwis blong olgeta.

Wan olfala woman i glad tumas taem hem i karem wan buklet long lanwis Wels, hem i se: “Blong talem stret, sipos yufala i bin givim buklet ya long Inglis, maet mi no tekem, be i gud tumas blong kasem wan long prapa lanwis blong mi.”

Long Ogis 2014, mifala i putum plante moa samting long lanwis Wels long jw.org, nao namba blong ol man we oli visitim websaet ya i dabol long sem manis ya.

“Mitufala i Toktok Sem Lanwis”

Afta we Jisas i eksplenem gud ol vas blong Baebol long tu disaepol blong hem, tufala i glad tumas, tufala i se: “Hem nomo ya. Taswe yumitu harem gud tumas long toktok blong hem long rod, taem hem i stap eksplenem gud ol tok ya blong Baebol.” (Luk 24:32) Plante taem laef blong ol man i jenis, taem oli kasem save gud ol trutok blong Baebol long prapa lanwis blong olgeta.

Wan man Wels we nem blong hem Emir i mared long wan Witnes blong Jehova, be hem i neva joen wetem woman blong hem blong wosip. Biaen, hem i kam fren wetem Russell we i wan Witnes. Emir i tokbaot samting we i jenisim tingting blong hem, i se: “Mi disaed blong stadi long Baebol taem Russell i kam luk mi wetem buk ya, ?Wanem Samting We Baebol i Rili Tijim? * Hem i givim buk ya long mi mo i talem se, ‘Buk ya i stap long lanwis Wels. Mo bae yumitu stadi long buk ya naoia.’” ?From wanem Emir i glad taem Russell i talem long hem blong i stadi long Baebol? Hem i se: “Yu luk, yumitu toktok sem lanwis, yumitu gat sem kalja, mo yumitu kasemsave long yumitu.” Emir i “harem gud tumas” taem hem i stadi long Baebol long prapa lanwis blong hem, from we hem i kasem save klia.

Ol Witnes blong Jehova bambae oli gohed blong givhan long ol man blong kasem save long God long prapa lanwis blong olgeta. Hemia lanwis we i kasem gud hat blong man.

^ par. 2 Briten, long haf ya i rifea long Inglan, Skotlan, mo Wels.

^ par. 11 Wan tul blong stadi long Baebol we Ol Witnes blong Jehova oli wokem.