Go long ol haf insaed long hem

Wan Laebri We i Isi Blong Karem

Wan Laebri We i Isi Blong Karem

Long 7 Oktoba 2013, ol Witnes blong Jehova oli talemaot JW Library app blong ol mobaelfon mo tablet. Oli wokem app ya we i fri nomo, blong man i save ridim Baebol mo stadi long hem. Long app ya, i gat 6 Inglis Baebol, olsem King James Version mo New World Translation of the Holy Scriptures we oli wokem bakegen long 2013. *

?Oli Wokem From Wanem?

Plante milian man oli yusum ol mobaelfon, tablet, mo kompiuta, long wok blong olgeta mo blong toktok long narafala. From we i gat ol Baebol mo buk blong stadi long jw.org finis, ?from wanem oli wokem JW Library?

Fas samting se, afta we man i daonlodem app ya, hem i no moa nidim Intenet blong go long hem. Seken samting se, app ya i mekem i isi blong faenem ol vas mo blong stadi long Baebol. ?From wanem yumi talem olsem?

JW Library i Givhan Blong Stadi Baebol

Taem yu openem JW Library, yu luk ol buk blong Baebol. Taem yu jusum wan buk, namba blong ol japta i kamaot. Nao kwiktaem nomo yu save faenem wan japta mo vas. I gat sam narafala samting tu blong givhan long man we i stadi Baebol:

  • Ol futnot oli soemaot narafala rod blong tanem sam vas mo sam narafala save

  • Ol refrens oli soemaot ol narafala vas we oli tokbaot sem samting

  • Yu “lukaotem” wan wod long Baebol, mo yu faenem evri vas we wod ya i stap long hem

  • Long stat blong evri buk, i talem ol bigfala tingting we oli stap insaed

  • Wan lis blong ol buk blong Baebol, weples mo wetaem oli raetem, mo ol yia we ol buk ya oli tokbaot

  • Ol map mo ol pija long kala, mo ol laen we oli makem ol yia long hem

JW Library i fri, olsem ol narafala buk blong ol Witnes blong Jehova. Bitim wan milian man oli daonlodem fri app ya finis, mo presen mane nomo i mekem se ol man oli save gohed blong yusum. (2 Korin 9:7) I gud yu traem daonlodem mo yusum spesel laebri ya we i isi blong karem.

^ par. 2 Long Jenuware 2014, oli ademap long app ya vas blong dei mo singbuk we ol Witnes blong Jehova oli yusum.