Go long ol haf insaed long hem

Tokbaot Hop Blong Baebol Long Paris

Tokbaot Hop Blong Baebol Long Paris

Long 30 Novemba kasem 12 Disemba 2015, Yunaeted Nesen i mekem wan bigfala miting (COP21) long Paris, Franis. Oli invaetem ol man long 195 defren nesen, blong oli kam wanples blong tokbaot olsem wanem blong fiksimap o daonem trabol, we ol man long fulwol oli stap mekem long saed blong weta. Klosap 38,000 man oli kam long miting ya, hemia i minim ol man blong gavman, ol saentis, ol man blong stadi long envaeronmen, mo ol bigfala bisnes man. Mo i gat plante taosen narafala man tu we oli visitim ol pablik ples klosap, blong lanem moa long saed blong klaemet jenis.

Nating we ol Witnes blong Jehova oli no joen long miting ya, be olgeta tu oli intres long envaeronmen. Taswe plante handred long olgeta oli joen long wan spesel kampen long Paris, blong tokbaot hop we i kamaot long Baebol, se long fiuja ol man bambae oli laef long wan wol we i klin, i no moa gat doti.

Long pablik transpot, wan Witnes i mitim wan man Peru we i werem kastom klos. Man ya i talem se nating we hem i helti mo i glad long laef we hem i gat antap long ol bigfala hil, be hem i stil wari long saed blong fiuja blong wol. Taem man ya i harem nambawan hop we Witnes ya i talem long hem, hem i glad tumas mo hemia i leftemap tingting blong hem, so wetem wan bigfala smael hem i tekem kad we i lidim hem i go long websaet ya www.jw.org.

Long wan tren, tu Witnes i mitim wan saentis blong Amerika we i stap stadi long envaeronmen. Man ya i sapraes blong harem se ol Witnes blong Jehova oli winim Four Green Globes long Green Building Initiative, mo i no wan taem nomo, be tu taem. Hemia from we tu niu bilding we ol Witnes oli wokem long Wallkill, Niu Yok, oli wokem long fasin we i no spolem envaeronmen. Man ya tu i glad blong tekem kad we oli givim long hem.

Plante man oli sapraes blong harem se ol Witnes tu oli intres long envaeronmen, from samting ya, oli promes se bambae oli jekem websaet blong yumi. Wan woman Kanada i harem se ol Witnes oli traehad blong protektem ples we ol pijin ya eastern bluebird oli mekem haos blong olgeta long hem, long Warwick, Niu Yok, ples we ol Witnes oli wokem niufala hedkwota long hem. Woman ya i talem se: “Bifo we mi joenem olgeta we oli traehad blong protektem envaeronmen, mi bin stap stadi long ol pijin. Mi no bin save se ol Witnes blong Jehova oli respektem bigwan ol laef samting long bus. !Bambae mi ridim ol buk mo go long websaet blong yufala, blong lanem moa long saed blong yufala!”