Go long ol haf insaed long hem

Oli Mekem Lafet Mo Oli Lanem Sam Samting Tu—Ol Prapa Man Amerika

Oli Mekem Lafet Mo Oli Lanem Sam Samting Tu—Ol Prapa Man Amerika

Plante man oli ting se ol Prapa Man Amerika oli laef nomo long ol ples we i stap afsaed long taon. Be samting we i tru se bighaf blong ol olgeta oli stap laef long taon. Long 2015, long Jun namba 5 kasem 7, ol man long taon ya Niu Yok we i bigfala taon blong Amerika, oli holem lafet ya “Gateway to Nations.” Hemia wan lafet * blong ol Prapa Man Amerika. Sam Witnes blong Jehova long taon ya oli harem nius blong samting ya, nao oli mekem plan blong go. ?From wanem?

Ol Witnes blong Jehova oli transletem ol buk we i tokbaot Baebol i go long plante handred lanwis. Sam long ol lanwis ya hemia ol lanwis blong ol Prapa Man Amerika, olsem Blackfoot, Dakota, Hopi, Mohawk, Navajo, Odawa, mo Plains Cree. Taswe oli go long lafet ya, oli yusum ol tebol mo ol troli blong soemaot sam buk mo sam traket long ol lanwis ya. Wan long ol traket ya hemia You Can Trust the Creator!

Mo tu, websaet blong ol Witnes i gat ol video mo rikoding we oli stap long ol lanwis ya. Taswe ol Witnes ya oli plei plante long ol rikoding ya long olgeta we oli intres. Olgeta ya oli talem long ol Witnes se plante long ol pleplei, posta, mo ol samting we oli luk long lafet ya, oli stap long Inglis no Spanis nomo.

Plante man we oli kam long lafet ya oli sapraes long bigfala wok we ol Witnes oli mekem blong transletem ol buk i go long ol lanwis blong ol Prapa Man Amerika, mo oli glad tumas long wok we oli mekem blong tijim Baebol long ol bigfala taon mo ol ples we oli stap afsaed long taon. Wan long ol man we i stap lukaot long lafet ya i storian gud wetem ol Witnes ya, nao taem hem i kasem save wok we oli stap mekem, hem i askem blong stadi Baebol, hem i se “!Bae mi wet blong luk yufala bakegen blong mi save lanem moa long Baebol!”

Wan man mo waef blong hem tufala i kam lukluk ol buk long wan long ol tebol ya, be ol Witnes ya oli no save storian wetem tufala, from we sora blong tufala i fas. Be stret long taem ya, wan Witnes we i save saen lanwis i kamtru. Ale hem i storian wetem tufala blong 30 minit olsem, mo i givhan long tufala blong faenem wan asembli blong saen lanwis long eria we tufala i stap long hem.

I gat bitim 50 Witnes blong Jehova we oli joen long wok ya blong tijim Baebol long trifala dei blong lafet ya, mo ol man we oli go lukluk ol buk we oli soemaot, oli tekem bitim 150 long olgeta.

^ par. 2 Wan man we i stap stadi long laef blong ol man mo kastom blong olgeta, nem blong hem William K. Powers, i talem se long taem blong yumi, lafet ya i no joen wetem wosip, be hem i wan taem we ol man, ol woman, mo ol pikinini oli joen wan ples blong singsing mo danis.