Go long ol haf insaed long hem

Gud Nius i Kasem Ol Man Sinti Mo Roma Long Jemani

Gud Nius i Kasem Ol Man Sinti Mo Roma Long Jemani

I gat plante man Sinti mo Roma we oli stap long Jemani. * I no longtaem i pas, ol Witnes blong Jehova oli wokem ol traket, ol buklet, mo ol video we oli tokbaot Baebol, i go long lanwis Romany * we i lanwis blong olgeta.

Long wan spesel kampen blong prij we ol Witnes blong Jehova oli mekem long Septemba mo Oktoba 2016, oli traehad blong serem ol save blong Baebol long lanwis Romany wetem ol man Sinti mo Roma we oli stap long ol defren taon long Jemani. Mo tu oli go long taon blong Berlin, Bremerhaven, Freiburg, Hamburg, mo Heidelberg. Mo oli mekem ol miting long lanwis Romany long Haos Kingdom blong olgeta.

Gudfala Frut We i Kamaot

Plante man Sinti mo Roma oli sapraes mo oli glad bigwan long kampen ya we ol Witnes oli mekem. Andre mo woman blong hem Esta we tufala i joen long kampen ya, tufala i talem se: “Ol man oli glad from we mifala i traehad blong storian wetem olgeta.” Plante oli glad tumas blong harem mo ridim Baebol long prapa lanwis blong olgeta. Wan yangfala woman i wajem video ya ?From Wanem i Gud Blong Stadi Baebol? long lanwis Romany, mo hem i no save bilivim nating. Mo hem i talem bakegen mo bakegen se, “!Lanwis blong mi ya!”

Wan Witnes we nem blong hem Matias, we i joen long kampen ya long taon blong Hamburg, i talem se: “Mi mo waef mitufala i joen wetem eit narafala Witnes blong prij long wan eria we i gat samwe long 400 man Sinti mo Roma oli stap long hem. Evri man we mifala i toktok long olgeta oli askem ol buk.” Betina, we hem tu i prij long taon ya Hamburg, i talem se: “Samfala oli krae taem oli luk ol buk long lanwis Romany, we ol Witnes blong Jehova oli wokem.” Plante oli stat ridim ol buk ya, mo oli karem sam kopi blong ol fren blong olgeta.

I gat bighaf blong ol man Sinti mo Roma oli glad blong kam long wan miting. Long olgeta we oli go long miting long taon blong Hamburg, i gat 94 long olgeta we oli neva go long wan Haos Kingdom bifo. Mo i gat 123 man we oli kam long wan miting long taon ya Reilingen, we i klosap long taon blong Heidelberg. Biaen, i gat faef man we oli toktok lanwis Romany oli askem blong stadi Baebol.

Long kampen ya, ol Witnes blong Jehova oli givimaot klosap 3,000 traket mo buklet. Ol Witnes oli storian long bitim 360 man Sinti mo Roma, mo 19 long olgeta oli stat blong stadi Baebol. Sam long olgeta oli talem se, “I naes tumas blong save se God i tingbaot mifala.”

^ par. 2 Ol man Sinti oli wan smol grup blong ol man we oli stap long Wes mo Sentrol blong Yurop. Mo ol man Roma oli wan smol grup blong ol man we oli blong Is mo Saotis blong Yurop.

^ par. 2 Encyclopædia Britannica Online i tokbaot se lanwis Romany i gat “60 o moa defdefren kaen fasin blong toktok.” Long atikol ya yumi yusum tok ya “Romany” blong tokbaot lanwis we ol man Sinti mo Roma oli yusum long Jemani.