Go long ol haf insaed long hem

Wan Spesel So Long Franis We Oli Soemaot Baebol

Wan Spesel So Long Franis We Oli Soemaot Baebol

Long 2014, i gat plante visita oli kam long Rouen International Fair long not blong Franis, mo oli sapraes taem oli luk wan smol rum we oli raetem stamba tok ya long hem, “Baebol—Yestede, Tede, mo Tumora.”

Afsaed long rum ya, oli putum ol skrin blong soem ol video we oli tokbaot ol olfala hanraet blong Baebol, mo samting ya i pulum intres blong plante man we oli luk. Taem ol man oli go insaed long rum ya, oli lanem plante moa samting long saed blong ol advaes blong Baebol, histri blong hem, mo olsem wanem ol save blong Baebol oli laenap gud wetem saens, mo tu olsem wanem oli seremaot Baebol long olgeta ples long wol.

Long so ya, oli soemaot olsem wanem Baebol i stap gud kam kasem tede mo naoia plante bilian man oli save ridim Baebol, oli ridim long buk we oli printim, no long kompiuta. Ol visita oli karem wan fri kopi blong Baebol ya New World Translation, we ol Witnes blong Jehova oli wokem, we i stap long bitim 120 lanwis.

Plante visita oli glad tumas long ol gudfala wok we ol Witnes oli mekem blong tokbaot mo seremaot Baebol long ol man. Wan woman we i wok wetem ol yangfala, i stap lukluk so ya we ol Witnes oli mekem mo i talem long wan grup blong ol yangfala se: “Baebol i wan impoten samting we mifala i lanem taem mifala gruap. Hem i wan buk we i laef. Evritaem we mi ridim Baebol, mi kasem ol gudfala advaes blong winim ol problem blong mi.”

Wan olfala woman we i gat 60 yia, i sapraes blong save se hem i save karem wan fri kopi blong Baebol. Hem i talem se: “!Yumi evriwan i mas ridim Baebol bakegen, from hem i wan samting we yumi nidim!”