Go long ol haf insaed long hem

Briten Foto Galeri 4 (Maj Kasem Ogis 2017)

Briten Foto Galeri 4 (Maj Kasem Ogis 2017)

Long foto galeri ya, yu save luk olsem wanem wok blong bildim niufala branj ofis blong ol Witnes blong Jehova long Briten i gohed long manis blong Maj mo Ogis 2017.

28 Maj 2017—Branj

Wan kontrakta i yusum bigfala trak blong pulum wan smol haos we i gat glas long fored blong hem, i kam long ples blong konstraksen. Haos ya oli putum long wan platfom antap we man i save stap long hem mo lukluk, hem i stap long ples blong konstraksen be i sef from wol i goraon long hem. Haos ya mo visita senta oli open fastaem long Mei 2017, mo long Ogis i gat bitim 17,000 visita we oli putum nem finis blong kam luk projek ya.

29 Maj 2017—Residens F

Ol kontrakta oli yusum wan tower crane blong muvum wan bigfala simen blok we oli joenem finis olsem frem blong wan bigfala tebel i go long Residen F, hemia faswan haos we oli bildim. From we i gat plante spes raon long ol bilding ya, i isi mo i kwik blong putum ol simen blok ya long ol stret ples blong olgeta we i no nid blong tektekemaot mo joenem bakegen.

7 Eprel 2017—Ol Residen

Oli stap wokem ol faef residen bilding semtaem. Long fored, ol kontrakta oli stap fasem ol waea bifo we oli kafsaedem simen blong fandesen blong Residen B. Biaen long raetsaed, oli stap pamem simen blong mekem slab blong flo blong Residen D. Biaen long lefsaed, tower crane i stap putum wan simen panel i rere blong eleveita i pas insaed mo ol step i go antap insaed long Residen E.

19 Eprel 2017—Branj

Wan memba blong tim we oli stap wokem ol fiting i wok wetem wan tul long ples we tu plastik paep blong wota i joen. Oli mekem tufala joen ya i hot nao tufala plastik ya i melt, mo oli joenem tufala. Hem i yusum tul ya blong stretem saed blong ol plastik raon long joen ya, afta oli testem sipos i strong mo i gud. Oli yusum klosap fo kilometa (2 mi) blong ol paep ya blong wota.

25 Eprel 2017—Ol Residen

Wan man i stap klinim wan niufala wotapruf kalvet. Oli wokem ol kalvet ya blong mekem se rod i save pas antap long rod blong wota mo mekem se wota blong ren i save ron i go long ol pul blong mekem se wota i no fulap olbaot long taem blong ren.

28 Eprel 2017—Residen F

Wan hasban mo waef tufala i wok long tim blong akitek, tufala i stap makem ples we korido bambae i stap long hem, hemia long graon flo.

5 Mei 2017—Ol Residen

Long saed i go long is, yu save luk pija blong faef residen we oli stap wok long olgeta yet. Long Septemba, oli finisim ol simen frem blong ol haos ya, mo wok long ol wol insaed long Residen F (biaen long raetsaed) i stat, oli stat blong plasta mo pentem bilding ya. Long semtaem, ol man blong wok oli leftemap ol wol mo fitim ol windo blong Residen E (biaen lefsaed). Ol tim blong akitek, elektrik, fiting, mo skafolding oli rere blong wok long Residen B, C, D (long fored).

18 Mei 2017—Ofis we i lukaot long wok ya

Robert Luccioni, wan helpa long Pablising Komiti blong Hed Kampani mo we i ovasia blong Worldwide Design/Construction Department (WDC), i mekem wan tok we i stanap long Baebol blong leftemap tingting blong ol tim blong konstraksen. WDC i lukaot long wok blong disaenem mo bildim ol niufala branj ofis, blong mekem se wok i ron gud mo i no kakae tumas mane.

25 Mei 2017—Branj

Ol wokman oli stap wokem simen slab blong flo blong haos we gas, kompiuta, mo olting blong elektrik bambae oli stap long hem. Long raetsaed, ol wokman oli stap yusum wan pam blong simen blong fulumap fandesen blong wan spesel fenis we i blong daonem noes we bambae i kamaot long ol samting insaed long haos ya.

7 Jun 2017—Residen E

Wan tim blong akitek i lukluk bakegen long plan bifo we oli makem flo blong stanemap ol aean frem long hem.

13 Jun 2017—Residen F

Wan man i stap stanemap ol aean frem blong ol wol aotsaed.

22 Jun 2017—Residen E

Oli setemap skafolding raon long Residens E, blong ol tim oli save klaem mo wok long ol afsaed wol.

11 Julae 2017—Residen F

Wan woman i stap pentem ol niufala windo long wan spesel pen blong protektem olgeta. Taem pen ya i drae i kam olsem wan plastik stika we i protektem ol windo ya taem oli stap wok, mo afta oli save karemaot taem wok i finis.

13 Julae 2017—Residen F

Wan tim blong wokem ol samting i testem presa insaed long ol paep aninit long flo we i blong mekem rum i wom long wan residen. Afta we oli testem oli jenisim sam samting we oli mas jenisim, biaen oli save kafsaedem simen antap long ol paep ya.

19 Julae 2017—Branj

Wan man i stap katem sam waelflaoa we nem blong hem turf long wan raonabaot aotsaed long men entrens blong branj. Flaoa i blokem ol rabis gras blong oli no gru. Hemia i givhan blong no spenem tumas taem mo paoa blong klinim ples ya we i stap klosap long wan bisi rod.

1 Ogis 2017—Ofis

Wan man i stap yusum GPS blong mekem sevei. Hem i stap makem wan ples we bambae i kam entrens blong ofis. Hem i yusum wan pin blong makem ples ya, mo i pentem pin ya blong man i save luk klia. Pat blong haos ya bambae i gat wan kijin long hem mo tu oli disaenem wan eria insaed blong i save kam wan ples blong kakae mo wan ples blong miting. Biaen long hem, hemia ol residen.

8 Ogis 2017—Ol Residen

Wan hasban mo waef i stap rerem ples blong kafsaedem simen blong wokem wan dren wota. Long biaen long tufala, hemia Residen E mo F, oli kavremap long ol plastik blong mekem we ol wok man i save gohed blong wok long ol manis blong kolkol taem.

9 Ogis 2017—Branj

Wan man i stap lanem olsem wanem blong yusum wan masin blong leftemap ol samting. Oli yusum masin ya blong leftemap ol blok ston we wanwan long olgeta i hevi olsem 70 kilo (154 lbs). Taem oli putum ol blok ston ya long stret ples blong olgeta, ale oli kafsaedem simen long saedsaed blong olgeta blong i holem olgeta i stap gud.

16 Ogis 2017—Branj

Taem oli pulum wan paep blong wota i go long ol stret ples blong hem, wan memba blong tim i mas holem paep ya i ben long stret ples blong hem. I gat klosap faef kilometa (3 mi) blong ol paep blong wota we oli nidim blong yusum long niufala branj ofis ya.

22 Ogis 2017—Residen E

Wan memba blong tim we i wok long aotsaed blong haos i stap katem ol brikis wetem wan drop daon elektrik so. Oli yusum ol haf brikis ya blong wokem wan naesfala paten blong ol brikis we nem blong hem Flemish bond. Mo bambae oli wokem ol wol long ol en blong ol residen bilding long spesel paten ya. Bambae oli nidim bitim 300,000 brikis blong flasem ol haos ya.