Go long ol haf insaed long hem

Wan Wok We i Sevem Laef Blong Ol Man

Wan Wok We i Sevem Laef Blong Ol Man

Long Tabasco, wan taon blong Meksiko, ol man oli gat fasin ya blong kilim olgeta bakegen i ded mo fasin ya i kam antap bigwan. Taswe long 2017, ol Witnes blong Jehova oli mekem wan spesel wok blong tu manis mo oli seremaot bakegen wan wekap blong 2014 we taetel blong hem se Why Go On?—Three Reasons to Keep Living.” wok ya i givhan bigwan long ol man.

Givhan Long Stret Taem

Fostino we i wan Witnes, i prij long wan woman we i stap wari from boe blong hem we i gat 22 yia. Boe ya i gat sik ya we tingting blong hem i foldaon mo i traem blong kilim hem wan i ded. Woman ya i no save olsem wanem blong givhan long boe blong hem. Be taem Fostino i givim wekap ya long hem, hem i talem se: “Hemia nao samting we boe blong mi i nidim.” Long nekis dei, Fostino i gobak visitim boe blong woman ya, mo tufala i tokbaot ol advaes blong Baebol we oli stap long magasin ya. Fasin blong boe ya i stap jenis afta we Fostino i stap gohed blong visitim hem. Fostino i talem se: “Mi luk se naoia tingting blong hem i kwaet moa mo hem i glad.” Boe ya i tokbaot ol samting tu we hem i lanem wetem smol brata blong hem, we hem tu i kasem sem sik ya.

Karla, we i laef long Huimanguillo city, i yusum magasin ya blong givhan long wan fren blong hem long skul. Hem i se: “Mi luk wan gel long klas blong mi we i gat 14 yia i stap harem nogud. Mi go toktok long hem mo hem i tokbaot problem we famle blong hem i gat. Be taem mitufala i stap toktok, mi luk ol soa long lef han blong hem.” Gel ya i stap katkatem han mo leg blong hem. Hem i harem se i nogat man i laekem hem, mo i no nid blong hem i laef. Karla i givim Wekap! ya long hem. Afta we gel ya i ridim Wekap! ya, hem i talem long Karla se i olsem we oli raetem magasin ya blong hem stret. Hem i smael mo i talem se hem i kasemsave nao se laef i impoten.

I gat wan man long taon ya Villahermosa we i stap harem nogud. Hem i bin lusum wok blong hem, mo woman blong hem i ronwe long hem mo lego ol pikinini i stap wetem hem. Nating se hem i stap prea long God blong i givhan long hem be hem i gohed yet blong harem nogud. Ale hem i wantem kilim hem wan i ded, be stret long taem ya, tu Witnes blong Jehova, Matin mo Mikael i noknok long doa blong hem. Hem i openem doa mo tufala i givim Wekap! ya long hem. Taem man ya i luk taetel blong magasin ya, hem i harem olsem se God i ansarem prea blong hem. Matin mo Mikael i leftemap tingting blong hem wetem sam vas blong Baebol mo sam dei biaen taem tufala i kambak blong visitim hem, man ya i no moa harem nogud olsem fastaem. Naoia tufala i stap stadi Baebol wetem hem tu taem long wan wik.

Ol Presina Oli Kasem Gud Nius

Ol Witnes oli visitim ol prisen haos tu long taon ya, mo oli givhan long ol presina blong kasem save from wanem yumi laef. Oli soem sam video, wan tok we i kamaot long Baebol mo oli storian long saed blong risen from wanem yumi laef we magasin ya i tokbaot. Ol presina mo ol sekiuriti tu oli glad long ol visit ya. Wan presina i talem se: “Mi traem blong kilim mi wan i ded tri taem. Sam man oli talem long mi se God i kea long mi, be oli neva soem long Baebol se samting we oli talem i tru. Be ol samting we yufala i talem, oli rili leftemap tingting blong mi.”

Ol man oli luksave ol wok ya we ol Witnes oli mekem. Sekretari we i lukaot long saed blong helt i talem ol gudfala toktok from traehad we ol Witnes oli mekem blong givhan long ol man. Mo, wan niuspepa i tokbaot wok ya we ol Witnes oli mekem mo taetel blong wok ya se “Oli Go Blong Faet Agensem Fasin Blong Kilim Yu Wan.”