Go long ol haf insaed long hem

Talemaot Hop Mo Leftemap Tingting Blong Ol Olfala

Talemaot Hop Mo Leftemap Tingting Blong Ol Olfala

Ostrelia i olsem plante narafala kantri we i gat plante olfala. Sam long ol olfala ya oli laef long ol haos we gavman i mekem blong olgeta, mo i gat man i stap blong lukaot long olgeta evri dei, mo givhan long olgeta taem oli sik.

I tru, se plante olfala we oli laef long ol ples olsem, oli nidim we man i givhan moa long olgeta, i no long saed blong bodi nomo, be long tingting tu. Samtaem oli harem se oli les, oli no gat fren, mo oli no naf blong mekem wan samting. Ol Witnes blong Jehova oli go givim hop long ol olfala ya mo mekem oli harem gud, taem oli mekem plan evri wik blong go visitim tu haos blong ol olfala long Portland, taon blong Victoria long Ostrelia.

Tokbaot Baebol Long Haos Blong Lukaot Long Ol Olfala

Ol Witnes oli mit wetem wan grup blong ol olfala mo oli tokbaot ol defren topik blong Baebol wetem olgeta, olsem ol gudfala stori blong laef blong Jisas. Jeson i talem se: “Mifala i ridim stori blong Baebol wetem ol olfala ya mo mifala i tokbaot wetem olgeta.” From we plante long ol olfala ya oli gat ol bigfala sik, ol Witnes oli givim hop tu long olgeta mo leftemap tingting blong olgeta taem oli tokbaot promes we God bambae i mekem blong finisim sik mo ded.

Toni we i wan Witnes i talem se: “!Long stat, mifala i tekem 30 minit nomo blong storian wetem olgeta, be ol olfala ya oli wantem se mifala i storian longtaem moa. Ale naoia mifala i tekem wan aoa blong storian, be wan long olgeta i talem se hem i wantem se mifala gohed blong tu aoa!” Nating se sam long ol olfala ya oli blaen, sam oli slip nomo long bed, mo sam oli no moa gat paoa blong holem samting, ol Witnes oli givhan long olgeta mo oli askem long olgeta tu blong oli talemaot tingting sipos oli wantem.

Taem we ol Witnes oli visitim ol olfala ya, oli singsing tu wetem olgeta blong presem God, be plante taem ol olfala ya oli wantem singsing moa. Wan long ol olfala ya we nem blong hem Jon, *i talem se: “Mifala i laekem tumas ol miusik blong yufala. I givhan long mifala blong kasemsave long God mo respektem hem.” !Judit wan long ol olfala we i blaen, hem i lanem baehat evri toktok blong ol singsing we hem i laekem!

Ol Witnes oli kea long wanwan long ol olfala ya. Wan long ol Witnes we nem blong hem Braen, i talem se sipos wan long ol olfala ya i no harem gud, bambae mifala i visitim hem long rum blong hem. Braen i se: “Mifala i toktok wetem olgeta blong save se oli harem olsem wanem. Samtaem mifala i kambak long wan nara dei blong luk sipos oli kamgud.”

“God i Sanem Yufala i Kam Long Mifala”

Plante long ol olfala ya oli laekem ol visit ya. Pita, wan long ol olfala we i joen oltaem blong storian, i talem se: “Mi no wantem mestem visit ya.” Judit i talem long woman we i stap lukaot long hem se: “!Tede hem i Wenesde! Plis yu rerem mi hareap blong mi save go long Baebol stadi. !Mi no wantem let!”

Ol olfala ya oli harem gud long samting we oli stap lanem, mo oli harem se oli kam klosap moa long God. Afta we mifala i tokbaot wan long ol tijing blong Jisas, Robet i se: “Mi neva kasem save vas ya long Baebol. !Naoia mi kasem save! Deved i lanem se i impoten blong prea, mo hem i talem se: “Mi luk se prea i givhan long mi blong frengud wetem God mo i mekem mi mi luksave se hem i stap.”

Ol olfala ya oli glad tumas blong save hop we Baebol i tokbaot long saed blong fiuja. Wan olfala we nem blong hem Linet, i talem tangkiu long ol Witnes, i se: “Tangkiu tumas blong karem gud nius blong Baebol i kam long mifala.” Wan narafala woman i talem se: “God i sanem yufala i kam long mifala.”

Magret i glad tumas long ol visit we ol Witnes oli mekem, mo naoia hem i stap go oltaem long ol miting long Haos Kingdom blong ol Witnes blong Jehova we i stap klosap long olgeta. Nating se hem i gat problem long helt mo i no naf blong go hem wan, hem i talem long ol Witnes se: “Yufala i givim hop long mifala evriwan.”

“Hemia Wan Nambawan Samting”

Ol wokman tu oli glad long ol visit we ol Witnes oli mekem. Ana we i wan Witnes, i talem se: “Ol wokman oli stap leftemap tingting blong ol olfala blong kam lesin from we oli makem se ol olfala ya glad moa afta we mifala i visitim olgeta.” Braen, we yumi tokbaot hem finis, i talem se: “Ol wokman long ples ya oli kaen mo oli givhan bigwan. Oli mekem evri samting blong givhan long mifala.”

Famle blong ol olfala ya oli glad tumas blong luk se ol olfala blong olgeta oli laekem ol storian olsem. Gel blong wan olfala i talem gudfala toktok long ol Witnes, i se: “Hemia wan nambawan samting we yufala i mekem blong mama blong mi.”

^ par. 7 Mifala i jenisim sam nem.