Go long ol haf insaed long hem

Haos We i Stap Long “Bigfala Ston”

Haos We i Stap Long “Bigfala Ston”

Long fulwol, ol Witnes blong Jehova oli gat 15 branj ofis we oli stap printim ol buk. Wan long olgeta hem i branj blong Sentrol Yurop, we i stap long Selters, Jemani. Hem i stap long wan ples we oli kolem Steinfels, we long lanwis blong Jemani i minim “Bigfala Ston.”

Long 23-25 Mei 2014, branj ofis blong Sentrol Yurop i invaetem ol man we oli stap raonabaot, ol bisnes man, ol man blong gavman, blong oli kam visitim branj ofis. Taetel blong program long ol dei ya se, “30 Yia Long Selters,” from we oli openem branj ofis ya long 21 Eprel 1984.

Long taem ya, i gat bitim 3,000 man we oli kam visit. Wan mea we i wok blong gavman klosap 30 yia, i talem se: “Oltaem mi mi glad blong go visitim branj ofis blong ol Witnes blong Jehova. Mi sapraes yet taem mi tingbaot olsem wanem oli bildim branj ofis ya long Steinfels, long yia 1979 kasem 1984.”

Ol Samting We Oli Hapen

Ol man we oli kam visit, oli go long wan rum blong luk histri blong ol Witnes blong Jehova long kantri ya, long ol 120 yia we oli pas. Oli singaot rum ya se, “Ol Man Blong Jehova Long Sentrol Yurop.” Mo naoia, rum ya i kam wan ples we ol man oli save visitim.

I gat wan narafala rum we ol man oli save go long hem, blong lukluk ol olfala Baebol. Eksampol, oli putum wan olfala Baebol blong Jemani we i kamaot long yia 1534, mo wan haf blong Baebol we Elias Hutter Polyglot i raetem, we i kamaot long yia 1599. Ol toktok insaed long Baebol ya, oli transletem i go long 12 defren lanwis. Mo tu, long rum ya oli soem ol pija mo ol video we oli tokbaot ol advaes blong Baebol we oli save givhan long laef blong ol man tede.

Ol man we oli kam visit, oli lanem fasin blong laef mo wok we ol man mo woman long branj ofis oli mekem. I gat bitim 1,000 man mo woman we oli wok long branj ofis ya. Faswan samting we ol visita oli lanem, hemia “Laef Long Branj Ofis.” Ol visita oli gat janis blong lukluk ol rum, kakae long lanj, mo lukluk ol narafala ples afsaed. Wan visita i talem se: “Mi mi sapraes blong luk se ples ya i naes tumas.”

Seken samting we ol visita oli lanem, hemia “Wok Blong Printim Ol Buk.” Ol visita oli visitim rum we oli printim ol buk long hem mo Dipatmen we i sanem ol buk i go long ol narafala kantri. Oli luk olsem wanem oli printim ol buk mo oli sanem i go long bitim 50 defren kantri. Wan visita i talem se: “Mi no bin save se ol Witnes blong Jehova oli stap long fulwol. Ol buk mo magasin blong olgeta i kasem olgeta ples long wol. I wan merikel blong luk se oli glad nomo blong mekem wok ya, nating se oli no kasem pei.”

Wan samting we i spesel long taem ya, hemia saen we i soemaot jw.org, we i Websaet blong ol Witnes blong Jehova. Ol yangfala mo ol olfala oli luk olsem wanem blong yusum jw.org mo oli luk ol video, mo oli kasem ansa blong ol kwestin blong olgeta.

Long en blong visit ya, plante visita oli glad mo oli sapraes blong luk gudfala wok we ol Witnes blong Jehova oli stap mekem long fulwol. Wan visita i talem se: “Mi mi gat plante rong tingting long saed blong ol Witnes blong Jehova. Ating naoia mi mas jenis tingting blong mi.” Wan woman i talem plante taem se: “Visit ya i mekem mi luk se mi mas joen gud wetem ol narafala.”

^ par. 17 Stat long 2014

^ par. 21 Stat long 2014

^ par. 24 Stat long 2014