Ogenaesesen blong ol Witnes blong Jehova i stat long ol yia 1800. Long taem ya, i gat wan smol grup blong ol Baebol studen we oli stap klosap long Pittsburgh, Pennsylvania, long Amerika. Olgeta ya oli stat blong stadi gud long ol tok blong Baebol. Oli skelem ol tijing blong jos wetem ol tok blong Baebol. Ol samting we oli kasem save long hem, oli printim long ol buk, ol niuspepa mo long magasin ya we oli kolem Wajtaoa—i Talemaot Kingdom Blong Jehova.

 Wan long ol Baebol Studen ya hemia Charles Taze Russell. Russell i lidim wok ya blong tijim ol man long Baebol mo hem i fas man we i wokem Wajtaoa, be nating se i olsem, hem i no statem wan niufala skul. Russell mo ol narafala Baebol Studen (hemia nem blong grup ya), oli wantem tumas blong faenemaot tijing blong Jisas Kraes mo leftemap tijing ya. Mo tu, oli wantem folem ol fasin blong Kristin kongregesen bifo. Jisas i statem Kristin skul. From samting ya, mifala i tingbaot hem olsem man we i statem ogenaesesen blong mifala.—Kolosi 1:18-20.