Go long ol haf insaed long hem

?I Gat Hamas Witnes Blong Jehova Long Fulwol?

?I Gat Hamas Witnes Blong Jehova Long Fulwol?

2019 Seves Yia *

Namba blong ol Witnes blong Jehova long fulwol

8,683,117

Ol kongregesen

119,712

Ol kantri we ol Witnes blong Jehova oli prij long olgeta

240

?Olsem wanem yufala i kaontem ol memba blong yufala?

Mifala i kaontem nomo ol Witnes blong Jehova we oli prij evri manis. (Matiu 24:14) Hemia i minim olgeta we oli baptaes finis olsem ol Witnes, wetem olgeta we oli no baptaes yet be oli naf blong prij.

?Man i mas givim mane blong kam wan memba?

Nogat. Man i no nid blong givim mane blong hem i kam wan Witnes, no blong kasem wan spesel wok long ogenaesesen blong mifala. (Ol Wok 8:​18-​20) Be, eniman nomo i glad blong givim mane mo hem i no nid blong talemaot nem blong hem. Wan Witnes i save givim samting we hem nomo i naf blong givim olsem taem, paoa mo ol samting we hem i gat, blong givhan long wok blong prij long fulwol.​—2 Korin 9:7.

?Olsem wanem yufala i save namba blong olgeta we oli prij oltaem?

Evri manis, ol Witnes oli fulumap ripot blong prij mo oli givim long kongregesen blong olgeta. Ol Witnes oli glad nomo blong givim ol ripot ya.

Ol kongregesen oli putum gud ol ripot ya, oli ademap ol total mo oli sanem ripot ya i go long branj ofis we i lukaot long olgeta. Biaen, branj ofis i sanem ol ripot ya i go long hed ofis blong ol Witnes long Amerika.

Long en blong evri seves yia, * i gat total namba blong ol Witnes blong Jehova long evri ples. Oli stap ademap ol namba ya blong faenemaot total namba blong ol Witnes long fulwol. Ol ripot blong wanwan kantri i stap long websaet blong yumi long haf ya “Raon Long Wol.” Ol ripot ya oli leftemap tingting blong yumi olsem oli mekem long ol faswan Kristin.​—Ol Wok 2:​41; 4:4; 15:3.

?Yufala i kaontem olgeta tu we oli joen wetem yufala be oli no prij?

Nating se mifala i no kaontem olgeta we oli no prij, be mifala i glad blong singaot olgeta blong kam long ol miting. Evri yia, plante long olgeta oli kam long miting blong Memoriol blong tingbaot ded blong Jisas. Mifala i faenemaot namba blong olgeta taem mifala i karem total namba blong evriwan we oli kam long Memoriol, mo long namba ya, mifala i tekemaot total namba blong ol Witnes long fulwol. Long 2019, i gat 20,919,041 man we oli kam long Memoriol mo oli no ol Witnes.

Plante man we oli no kam long ol miting blong mifala, oli glad blong stadi Baebol. Long 2019, mifala i mekem samwe long 9,618,182 Baebol stadi evri manis, mo long olgeta ya i gat sam we oli stadi long wan grup.

?From wanem namba blong ol Witnes we gavman i givim i bigwan moa long namba we yufala i givim?

Sensas Ofis blong Gavman i faenemaot namba blong ol Witnes, taem i askem ol man blong talemaot jos we oli stap go long hem. Eksampol, Ofis blong Sensas long Yunaeted Stet i talem se: “Oli kasem namba taem oli askem ol man blong talem wanem jos we oli stap go long hem. Namba ya i no kamaot stret long ol Witnes, be long ol man olbaot nomo.” Be, olgeta we oli prij mo oli givim ripot blong olgeta, hemia nao olgeta we mifala i kaontem se oli ol Witnes blong Jehova, be i no olgeta we oli stap talem nomo se oli ol Witnes.

^ par. 2 Wan seves yia i stat long 1 Septemba, kasem 31 Ogis long nekis yia. Eksampol, seves yia blong 2015 i stat long 1 Septemba 2014, kasem 31 Ogis 2015.

^ par. 16 Wan seves yia i stat long 1 Septemba, kasem 31 Ogis long nekis yia. Eksampol, seves yia blong 2015 i stat long 1 Septemba 2014, kasem 31 Ogis 2015.