Giaman: Ol Witnes blong Jehova oli no Kristin, taswe oli no mekem lafet blong Ista.

 Tru: Mifala i bilif se Jisas Kraes i save sevem yumi. Ale mifala i mekem bes blong mifala blong “biaen long hem.”—1 Pita 2:21; Luk 2:11.

 Giaman: Yufala i no bilif se Jisas i laef bakegen.

 Tru: Mifala i bilif se Jisas i laef bakegen. Mifala i luksave se hemia wan stamba bilif blong ol tru Kristin, mo mifala i tokbaot long ol man taem mifala i prij long olgeta.—1 Korin 15:3, 4, 12-15.

 Giaman: Taem yufala i no mekem lafet blong Ista, yufala i mekem ol pikinini blong yufala oli no glad.

 Tru: Mifala i lavem ol pikinini blong mifala. Mifala i traehad blong tijim gud olgeta mo blong mekem olgeta oli glad.—Taetas 2:4.

•   Lafet blong Ista i no stanap long Baebol.

•   Jisas i talem se yumi mas tingbaot taem we hem i ded, be i no taem we hem i laef bakegen. Evri yia, mifala i mekem wan spesel miting blong tingbaot ded blong hem, long dei we i stret long kalenda blong Baebol.—Luk 22:19, 20.

•   Mifala i bilif se God i no glad long lafet blong Ista, from we lafet ya i kamaot long kastom blong ol man bifo. Olgeta ya oli mekem wosip long wan giaman god we i blong givim plante pikinini. God i ‘no save letem we yumi mekem wosip long narafala god bakegen.’ Hem i harem nogud long man we i mekem ol fasin we hem i no glad long olgeta.—Eksodas 20:5; 1 King 18:21.

 Mifala i bilif se desisen blong mifala i stanap long Baebol. Baebol i talem se yumi mas ‘waes mo luksave mining blong ol samting,’ i winim we yumi folem kastom blong ol man. (Ol Proveb 3:21; Matiu 15:3) Sipos man i askem long mifala blong eksplenem bilif blong mifala long Ista, mifala i glad blong eksplenem long hem. Be mifala i respektem raet blong ol man wanwan blong mekem prapa desisen blong olgeta.—1 Pita 3:15.